YOHANE 20 - Chasu New Testament 1967

Kuvuka he vefwie kwakwe Yesu

¹ He msi wa kuvoka juma, Maria Magdalena akatonga he mbira chaheyavo kere, hecheri na kija; akavona lila ibwe lavushwa he mbira.

² Niho akasara, akafika hakwe Simoni Petro na ula mrateri ungi eye ekikundiwe ni Yesu, akavati, “Vamvusha Mfumwa he mbira, neri tetumanya hantu vemvikie.”

³ Niho Petro akavuka hamwe na ula mrateri ungi, vakatonga he mbira.

⁴ Vakadindika vose veri; ula mrateri ungi akadindika kumkela Petro, akarongafika he mbira.

⁵ Akakodeka akasungia, akavona vila vitambaa vya shanda hala si; mira teingie.

⁶ Niho Simoni Petro naye eza ekimratera, akaingia ndeni he mbira; akarereha vitambaa vuntu vyeho hala si;

⁷ na ila mhaluma wekiho he mtwi wakwe; teuho hamwe na vila vitambaa, wevunguluswe ukavikwa kihawo.

⁸ Niho ula mrateri ungi naye akaingia, eye erongefika he mbira, akavona na kuitikija.

⁹ Ambu tevekinajuvukiwa ni iandiko, iti kimtara kuvuka he vefwie.

¹⁰ Niho vala varateri vakatonga kangi na kaa havo.

Yesu ekufunyirija he Maria Magdalena

¹¹ Mira Maria ekireimuka nze hafuhi na mbira, ekiia. Aho ekiraia huvo, akakodeka akasungia na hala ndeni he mbira.

¹² Akavona vamalaika veri, vena suke nyewa, veikae si, mmwe he mtwi, mmwe he maghu hala hantu kimba chakwe Yesu chekiyejwe.

¹³ Navo vakamti, “Mcheku uiani?” Akavati, “Nikila vamvusha Mfumwa wangu, neri mi simanyije hantu vemvikie.”

¹⁴ Naye ekikenja kuteta huvo, akagharuka nyuma, akamvona Yesu eimuke, asimanye iti ni Yesu.

¹⁵ Yesu akamti, “Mcheku, uiani? Umwenda ani?” Naye akadunganya iti we ni mrinji wa mghunda, akamti, “Mfumwa, kakicha niwe wemghuhie nivwira hantu wemvikie, nami ninemvusha.”

¹⁶ Yesu akamti, “Maria!” Ye akagharuka, akamtetia kwa Kiebrania, “Raboni!” (ni kuti, “Mcheji wangu.”)

¹⁷ Yesu akamti, “Usinigure; ambu sinakwea kutonga he Vava. Mira tonga he vandughu vangu, urevavwira, Nikwea kutonga he Vava wangu naye ni Mrungu wenyu.”

¹⁸ Maria Magdalena akatonga, akavaukulila varateri mburi kuti, Namvona Mfumwa, na iti enivwirire huvo.

Yesu ekufunyirija he varateri vakwe

¹⁹ Heoka chahemagheri msi ula wa kuvoka juma, hala hantu varateri vekiho, malighwi efingiwe he kufoleka Vayuda; Yesu akaza, akaimuka aho ghati, akavati, “Mporere imuikaie.”

²⁰ Naye ekinatete huvo akavavonyesha maghanza akwe, na kivaju chakwe. Niho vala vakaizihirwa vekinamvone Mfumwa.

²¹ Niho Yesu akavati kangi, “Mporere imuikaie; sa vuntu Vava enitumie mi, nami nimutuma unywi.”

²² Naye ekikenja kuteta huvo akavafuta, akavati, “Ghuhani Mpeho Wedi.

²³ Vala mwenevavushija mabanu, vavushijwa; na vala mwenevachungia mabanu, vachungiwa.”

Yesu ekufunyirija he Toma

²⁴ Mira mmwe wa vala ikumi na veri, Toma, eitangwa Mmaza, tekiwaho hamwe navo aho Yesu ekiza.

²⁵ Niho varateri vangi vakamti, “Twamvona Mfumwa.” Akavati, “Mi nekisavona he maghanza akwe nkovu ja misumari, na kugera kichaa changu hantu ha misumari, kangi na kuvika mkono wangu he kivaju chakwe, mi sikaitikije neri.”

²⁶ Niho misi mnane yekivecha, varateri vakwe vekiho he nyumba kangi, ne Toma eki hamwe navo. Yesu akaza, maluvwi efingiwe, akaimuka aho ghati, akati, “Mporere imuikaie.”

²⁷ Ekikenja akamti Toma, “Ete kichaa chako aha; urerehe maghanza angu; kangi ete mkono wako ugure kivaju changu; neri usioke esiitikija, mira mraitikija.”

²⁸ Toma akagharusha, akamti, “Mfumwa wangu na Mrungu wangu!”

²⁹ Yesu akamti, “Kila wanivona, waitikija; varela vwedi ni vala veitikija vesinavona.”

Cheshigha ii Mburi Yedi yekiandikwa

³⁰ Hena maluvengo angi mangi Yesu earongie mozya he varateri vakwe, esiandikwe he iki kitabu.

³¹ Mira aa eandikwe nesa muidime kuitikija iti Yesu niye Kristo, Mwana wa Mrungu. Na he uko kuitikija, mukete nkalamo he izina lakwe.