YOHANE 2 - Chasu New Testament 1967

Mlondolo wa Kana

¹ Msi wa katatu hekina mlondolo uko Kana, muzi wa Galilaya; na mlala wavo Yesu ekiwaho.

² Yesu naye ekirerarikwa he mlondolo hamwe na varateri vakwe.

³ Aho mvinyo ukinavaduikie, mlala wavo Yesu akamti, “Vesina mvinyo.”

⁴ Yesu akamti, “Mcheku, tuna ni mi nawe? saa yangu yesinafika!”

⁵ Mlala wavo akavati vandima, “Chochose enemuvwira, kiketeni.”

⁶ Hala hekina misungi mtandatu ya mabwe, nayo yevikiwe ho vuntu vwa kiziomo cha Vayuda cha kukuzerija, msungi mmwe uingia mbuta mbiri kana ntatu.

⁷ Yesu akavati, “Izujani misungi mpombe!” Vakaiizuja limbu.

⁸ Akavati, “Iki tahani mumtwaie mzatara mbao!” Vakatonja.

⁹ Na ula mzatara mbao ekinasaghe ila mpombe yeokie mvinyo, neri temanyije hantu yefumie, mira vandima vo vemanyije, kila evo vetahie ila mpombe, ula mzatara mbao akamwitanga mzalondola,

¹⁰ akamti, “Kila mntu erongainkija mvinyo ula wedi; aho vantu vekikenja kukoja, niho akanaete ula mchalachala; we wekirevika mvinyo ula wedi na iki.”

¹¹ Icho nicho kivokio cha maluvengo Yesu eketie, nacho ekiketiie uko Kana wa Galilaya, akafunyirija ngazo yakwe, na varateri vakwe vakamwitikija.

¹² Nyuma ya ivyo akasea mhaka Kapernaumu, ye na mlala wavo na vandughu vakwe, na varateri vakwe; vakaikaa uko misi esi mingi.

Kuhaghia nyumba ya mtaso

¹³ Na Pasaka ya Vayuda yekiho hafuhi; Yesu naye akakwea mhaka Yerusalemu.

¹⁴ Hala he nyumba ya mtaso akavona vantu vekitaghija ng’ombe na magonji na nziva, na vazakoranya fedha veikae si.

¹⁵ Akahareha mosha wa nzighi, akavafunya vose he nyumba ya mtaso na magonji na ng’ombe; akakufuta fedha ja vala vekoranya fedha, akakubunua meza javo;

¹⁶ akavati vala evo vekitaghija nziva, “Vushani ivi aha; musioshe nyumba ya Vava wangu nyumba ya kuzorania.”

¹⁷ Varateri vakwe vakakumbuka iti cheandikwe, “Kiru cha nyumba yako kinenila!”

¹⁸ Niho Vayuda vakagharusha vakamti, “Ni luvengo ani wetuvonyesha aho weketa huvo?”

¹⁹ Yesu akagharusha, akavati, “Bajani ii nyumba ya mtaso, nami he misi mitatu nineiimukija.”

²⁰ Niho Vayuda vakati, “Ii nyumba ya mtaso yejengiwe miaka makumi mane na mtandatu, nawe uneiimukija he misi mitatu?”

²¹ Mira ye etetie mburi ya nyumba ya mtaso ya mwiri wakwe.

²² Ingeri ekinavuke he vefwie, varateri vakwe vakakumbuka iti ekitetie huvo, vakaitikija kila cheandikwe na kila kiteto Yesu etetie.

²³ Aho eho Yerusalemu he misi mibaha marongo a Pasaka, vantu vajinki vakaitikija izina lakwe, vekinavone maluvengo akwe eaketie.

²⁴ Mira Yesu tekuitikijishe hevo; kila ye ekivamanyije vose;

²⁵ neri teendie iti mntu amvwire mburi ya mntu; ambu ye mwenye ekimanyije vyeho ndeni he mntu.