YOHANE 17 - Chasu New Testament 1967

Uombo m’baha wakwe Yesu

¹ Viteto ivyo Yesu evitetie; akavusha meso kurereha uko wanga, akati, “Vava, saa yakenja kufika. Mkaze Mwanao, nesa Mwana wako naye akukaze we.

² Sa vuntu wemunkie nzinya he vyose vyena mwiri, nesa vose wevamunkie avainke nkalamo ya kae na kae.

³ Na nkalamo ya kae na kae ni ii: Vakumanye we Mrungu eremmwe wa idi, ne Yesu Kristo ula wemtumie.

⁴ Mi nakukaza he si ii, nakenja ila ndima weninkie iti niironge.

⁵ Na iki, Vava, unikaze mi hamwe nawe, he ngazo ila nekina nayo hamwe nawe si ii yesinaoka.

⁶ Izina lako nalimanyisha he vantu vala wevainkie he si ii, neki vako, ukavaninka mi, na kiteto chako vakigura.

⁷ Iki vamanya iti vyose weninkie vifuma hako.

⁸ Ambu viteto weninkie navo navainka; navo vakavighuhia, vakamanya cha kididi iti nifumie hako, vakaitikija iti we niwe wenitumie.

⁹ Mi nivaombia avo; siiombia si ii, esire vala wevaninkie, ambu avo ni vako.

¹⁰ Vala vose e vangu ni vako, na vala e vako ni vangu; nami nakazwa hevo.

¹¹ Neri mi siho wa he si ii, mira ava vo veho he si ii, nami niza hako. Vava ezerire, uvarinde he izina lako vala wevaninkie; nesa vaoke mmwe sa vuntu uswi tweikee.

¹² Hala nena navo nevaindie he izina lako welininkie, nikavarera; neri tehena mmwe wavo etekie, esire ula mwana wa kuteka nesa iandiko likoloke.

¹³ Na iki niza hako; na ivi viteto niviteta he si ii, nesa vakete kuizihirwa kwangu kwekoloke hevo.

¹⁴ Mi nevainkie kiteto chako; na ii si ikavavihiwa; kila vo esi va si ii, sa vuntu nami nesi wa si ii.

¹⁵ Mi siomba iti uvavushe he si ii; mira uvarinde he ula mvivi.

¹⁶ Vo esi va si ii, sa vuntu nami nesi wa si ii.

¹⁷ Uvazerije na ila idi; kiteto chako nicho idi.

¹⁸ Sa vuntu wenitumie he si ii, nami nevatumie avo he si ii.

¹⁹ He vuntu vwavo nikuzerija mwenye, nesa navo vazerijwe he idi.

²⁰ Neri si avo du nevaombia; mira hata vala veneniitikija vuntu vwa kiteto chavo.

²¹ Vose vaoke mmwe; sa vuntu we, Vava, weho hemi nami hewe; vo navo vaikae he uswi; nesa si ii iidime kuitikija iti niwe wenitumie.

²² Nami ila ngazo weninkie, nami navainka; nesa vaoke mmwe sa vuntu na uswi twe mmwe.

²³ Mi hevo, nawe hemi, nesa vaoke vekoloke he vumwe; nesa si ii imanye iti niwe wenitumie, ukavakunda vo sa vuntu wenikundie mi.

²⁴ Vava, avo weninkie nienda vaikae nami hantu hose neho, nesa vaveiwe kurereha ngazo yangu weninkie; ambu wenikundie too msingi wa si ii wesinavikwa.

²⁵ Vava mwenye kitea, si ii teikumanyije; mira mi nekumanyije, na avo vamanya iti niwe wenitumie.

²⁶ Nami nevamanyishe izina lako, kangi ninezikalimanyisha; nesa lula lukundo wenikundie mi luikae hevo, nami niikae hevo.”