YOHANE 16 - Chasu New Testament 1967

¹ “Viteto ivyo nemuvwirire, nesa musirevihiwa.

² Venemuchwia nzighi he sinagogi; yee, saa iza, eyo kila mntu emukoma enedunganya iti emtasa Mrungu.

³ Na ivyo venemuketia, kila vesimmanyije Vava neri mi.

⁴ Mira namuvwira ivyo, nesa aho iyo saa yekifika, muvikumbuke iti mi nekimuvwirire. Semuvwirire ivyo too kuvoka, ambu nekiho hamwe na unywi.

⁵ Mira iki mi nitonga ha ula enitumie, neri tehena mmwe wenyu enivwija, ‘Utonga hio?’

⁶ Mira kila namuvwira huvo, ngoro jenyu jaizua kushinirwa.

⁷ Mira mi nimuvwira echo cha idi; ni chedi he unywi, mi nivuke; ambu mi nekisavuka, uo Mraghenja tekaze he unywi; mira mi nekitonga ninemtuma he unywi.

⁸ Naye ekikenja kuza, uo enekonesha si ii he mburi ya mabanu, na kitea, na mlaho

⁹ He mburi ya mabanu, kila vesiniitikija mi;

¹⁰ he mburi ya kitea, kila mi netonga he Vava, neri temunivona kangi;

¹¹ he mburi ya mlaho, ambu ula m’baha wa si ii akenja kuchwiiwa.

¹² Nirena vijinki vya kumuvwira, mira temukaviidime iki.

¹³ Mira ye ekiza uo Mpeho wa idi, enemutonja amuingije he idi yose; ambu tekatete vyakwe mwenye, mira vyose enesikia eneviteta, enemumanyisha hata mburi ja vintu vyeneza.

¹⁴ Ye enenikaza mi; ambu eneghuha he vila e vyangu amwukulile.

¹⁵ Na vyose Vava ena navyo ni vyangu; nicho chashigha nekiti, eneghuha he vila e vyangu, amwukulile.

Kuaghanya

¹⁶ “Kakenda kadori temukanivone waa; na kangi kakenda kadori munenivona.”

¹⁷ Niho kumwe he varateri vakwe vakatiana, “Ni kiteto ani icho eti, ‘Kakenda kadori temukanivone,’ na ‘kangi kakenda kadori munenivona?’ na icho, ‘Ambu nitonga ha Vava?’”

¹⁸ Niho vakati, “Ni kiteto ani eteta, icho: ‘Kakenda kadori?’ Tetumanya cho eteta.”

¹⁹ Yesu akamanya iti veenda kumvwija, akavati, “Icho nicho mwevwijana, iti netetie: ‘Kakenda kadori temukanivone, na kangi kakenda kadori munenivona?’

²⁰ Kididi, kididi, nimutio, Unywi muneia na kuwela, mira si ii ineizihirwa; unywi munesononoya, mira lusoyoyo lwenyu lunegharuka luoke kuizihirwa.

²¹ Mche ekichunguka, ena kushinirwa ambu saa yakwe yafika; mira ekinachunguka, tekumbuka kangi vula vwasi vuntu vwa kuizihirwa, iti hamoghwa mntu he si ii.

²² Huvo unywi iki muna kushinirwa; mira mi ninemuvona wa, na ngoro jenyu jeneizihirwa, na kuizihirwa kwenyu tehena enemughumba.

²³ Kangi uo msi temukanivwije kintu neri kimwe. Kididi, kididi, nimutio, Mwekiomba Vava kintu chochose he izina langu enemuinka.

²⁴ Mhaka iki temunaomba kintu he izina langu; ombani na unywi munevona; kuizihirwa kwenyu kukoloke.

²⁵ Ivyo nevitetie na unywi kwa visoma; saa iza nesikareteta wa na unywi kwa visoma, mira ninemuinka boo mburi jakwe Vava.

²⁶ Msi uo muneomba he izina langu; neri simuti mi ninemuombia he Vava;

²⁷ ambu Vava mwenye emukundie kila unywi mwanikunda mi, na kuitikija iti mi nefumie he Vava.

²⁸ Nefumie he Vava, nami nikaza aha he si ii; kangi nishigha si ii nitonge he Vava.”

²⁹ Aho varateri vakwe vakati, “Rereha, iki uteta boo, neri tuteta kivisoma.

³⁰ Iki twamanya iti we wemanyije vinti vyose, neri tuenda mntu akuvwije; heicho tuitikija iti wefumie he Mrungu.”

³¹ Yesu akagharusha, “H’ii! Iki mwaitikija?

³² Rereha, saa yezie, yee, yakenja kuza, niho mwezarika kila mmwe kihakwe, munishighe mi mwenye; mira siho mwenye, ambu Vava eho hamwe nami.

³³ Nemuvwirire ivyo nesa mukete mporere hemi. Aha he si ii muna vwasi, mira dindwani ni ngoro; mi navota si ii.”