YOHANE 13 - Chasu New Testament 1967

Yesu evaoja varateri vakwe maghu

¹ Ingeri msi m’baha wa Pasaka wesinafika, Yesu ekimanya iti saa yakwe yafika, eyo enefumia he si ii kutonga he Vavee, naye kila evakundie vantu vakwe he si ii, akavakunda mhaka mginto.

² He igheri la kijo cha chahemagheri; Shetani naye akenja kumgera Yuda, mwana Simioni Iskarioti, ngoro ya kumrengeha;

³ Yesu ekimanya iti Vava emunkie vyose he mikono yakwe, na iti efumie ha Mrungu, kangi etonga ha Mrungu,

⁴ akavuka he kijo; akavika suke jakwe na mondo, akaghuha mhaluma, akakudoka he kikwidi.

⁵ Ekikenja akagera mpombe he bakuli, akavoka kuvaoja varateri maghu, akaahanguja na ula mhaluma ekudokie.

⁶ Huvo akaza he Simoni Petro. Uu akamti, “Mfumwa, We unioje mi maghu?”

⁷ Yesu akagharusha, akamti, “Cho neketa we tukakimanye iki; mira unezakimanya uko nyuma.”

⁸ Petro akamti, “We tukanioje maghu neri.” Yesu akamti, “Nekisakuoja, tuna sanga nami.”

⁹ Simioni Petro akamti, “Mfumwa, si maghu du, mira hata mikono yangu na mtwi wangu.”

¹⁰ Yesu akamti, “Ye ekenjije kukuoja, tekimvaie wa esire kuoja maghu, ambu eelile mwiri wose; na unywi mwaela, mira si vose.

¹¹ Ambu ekimanyije ula eneramrengeha, nicho chashigha ekiti, “Si vose mweelile.”

¹² Niho ekikenja kuvaoja maghu, na kughuha suke jakwe, na kuikaa si kangi, akavati, “H’ii! mwatwarija ivyo namuketia?

¹³ Unywi muniitanga Mcheji, na Mfumwa; na huvwo nivwo, ambu nivwo vuntu neikee.

¹⁴ Huvo, ukinakiche mi ne Mfumwa na Mcheji, nemuojije maghu, huvo kimutara kuojana maghu venye na venye.

¹⁵ Ambu namuinka fwanyanyi; nesa sa vuntu nemuketiie, na unywi mureketa huvo.

¹⁶ Kididi, kididi, nimutio, Mzoro si m’baha kumvecha mzima wakwe, neri mzatumwa si m’baha kumvecha ula emtumie.

¹⁷ Mwekimanya ivyo, muvarela vwedi mwekiviketa.

¹⁸ Siteta mburi yenyu vose; nemanyije vala nevasaghure; mira ni iti iandiko likoloshwe: ‘Ula elie kijo changu anivishijija kihaga chakwe.’

¹⁹ Too iki nimuvwira vyesinaoka, nesa vyekineoka, muidime kuitikija kuti nimi Ye.

²⁰ Kididi, kididi, nimutio, “Ye emghuhia mntu wowose nenemtuma, enighuhia mi; na ula enighuhia mi emghuhia ula enitumie.”

Yesu emanyisha mrenge iti ni ani

²¹ Yesu ekikenja kuteta huvo, akasononoya he ngoro, akakonesha ekiti, “Kididi, kididi, nimutio, Mmwe wenyu enenirengeha.”

²² Varateri vakarerehana vekitatanya, iti emlanga ani.

²³ Hekina mmwe wa varateri vakwe, ekiighamie he mpafu yakwe Yesu, eye ula Yesu ekimkundishe.

²⁴ Niho Simioni Petro akamkonya na mkono, akamti, “Vwija, emlanga ani?”

²⁵ Ingeri ye ekuighamije huvo hafuhi na mpafu yakwe Yesu, akamti, “Mfumwa, ni ani?”

²⁶ Niho Yesu akagharusha, “Ni ula nenemtovejija itoghi na kumunka.” Akatoveja itoghi, akamunka Yuda, mwana Simoni Iskarioti.

²⁷ Ekikenja lila itoghi Shetani akamwingia. Niho Yesu akamti, “Vyo weronga, vironge fia.”

²⁸ He vala veikae hala he kijo tehena emanyije neri cheshigha ekimvwira huvo.

²⁹ Ambu va kumwe vedunganye, kila Yuda eye ekitika mfuko, usiche Yesu emtie, “Zora kila tweenda he ii mbao; kana iti ainke vaakiva kintu.

³⁰ Niho uo ekinakenje kula lila itoghi, akafuma hala indi. Naho neki kio.

Iazero ishaa: Mukundane

³¹ Niho uo ekinafume, Yesu akati, “Iki Mwana wa Mntu akazwa, Mrungu naye akazwa heye.

³² Kakicha Mrungu akazwa heye, Mrungu naye enemkaza heye, kangi enemkaza hala indi.

³³ Unywi vana vadori, heshele kakenda kadori nerena unywi; munenienda; na sa vuntu nevavwirire Vayuda iti, ‘Hantu mi netonga temuidima kuza;’ nirehuvo, munivwira na unywi.

³⁴ Nimuinka iazero ishaa, Mukundane. Sa vuntu mi nemukundie unywi, na unywi kundanani huvo.

³⁵ Huvo vantu vose venemanya iti mu varateri vangu mwekikundana unywi venye na venye.

Vuroti vwa kukana kwakwe Petro

³⁶ Simoni Petro akamti, “Mfumwa, utonga hi?” Yesu akagharusha, “Hantu netonga tuveiwa kuniratera iki; mira uneniratera uko nyuma.”

³⁷ Petro akamti, “Mfumwa, hanini mi nesiidima kukuratera iki? Mi nineinkija kuho kwangu vuntu vwako.”

³⁸ Yesu akagharusha, “H’ii! We uneinkija kuho kwako vuntu vwangu? Kididi, kididi, nikutio, Nkuruvi teikaambe wesinanikana kantu katatu.”