YOHANE 12 - Chasu New Testament 1967

Maria wa Betania emvira Yesu mafuta

¹ Ingeri heshele misi mtandatu Pasaka ifike, Yesu akafika Betania, hantu Lazaro ekiikaa, ula Yesu emvushije he vefwie.

² Niho vakamharehia kijo cha chahemagheri uko. Marta akapipirika; ne Lazaro neki mmwe wa vala veikae he kijo hamwe naye.

³ Niho Maria akaghuha ratili ya mafuta a nardo edi ena zora mbaha, akamvira Yesu he maghu, akamhanguja maghu na nywii jakwe. Na ila nyumba ikaizua mpungo ya ala mafuta.

⁴ Niho Yuda Iskarioti mmwe wa varateri vakwe, eye eneremrengeha, akati,

⁵ “Hanini aa mafuta esekitaghwa na dinari maghana matatu jikainkwa vakiva?”

⁶ Naye etetie huvo si kwa kuvavoneia vakiva; mira ni kila eki mkea, naye niye mzagura mfuko, akaghuha vila vyegerirwe hewo.

⁷ Niho Yesu akati, “Mshighe, ambu eavikiie msi wa kujikwa kwangu.

⁸ Ambu vakiva munanavo misi yose; mira mi temuna nami misi yose.”

⁹ Niho vantu vajinki he Vayuda vakamaka iti ye ewaho; navo vakaza, si vuntu vwakwe Yesu du, mira iti vamvone hata Lazaro, eye Yesu emvushije he vefwie.

¹⁰ Vabaha va vatasi vakachila iti vamkome hata uu Lazaro;

¹¹ ambu he vuntu vwakwe vajinki he Vayuda vakuvusha na mondo, vakamwitikija Yesu.

Kuingia Yerusalemu kwa mng’aro

¹² Msi wa keri vantu vajinki vezie he msi m’baha, vekisikia iti Yesu eza Yerusalemu;

¹³ vakaghuha matambi a misala, vakafuma na nze kuramzana, vakalonzisha vekiti, “Hosiana! Mwenye lutelwedi ni ula eza he izina la Mfumwa, mfumwa wa Israeli.

¹⁴ Yesu ekivona ndama ya njoe akakwea heyo, sa vuntu cheandikwe:

¹⁵ “Usifoleke m’bora Sayuni! Rereha, mfumwa wako eza, Evekiwe ni ndama ya njoe.”

¹⁶ Ijo mburi varateri vakwe tevekijuvukiwe nijo aho kuvoka, mira Yesu ekinakazwe, niho vekumbuka iti eandikiwe ivyo, na iti vekinakazwe, niho vekumbuka iti eandikiwe ivyo, na iti vekimrongiie huvo.

¹⁷ Niho va luvungano vala vekiho hamwe naye hala ekimwitanga Lazaro kufuma he mbira, ekimvusha he vefwie, vakamtetia vuonwa.

¹⁸ Nicho cheshigha, luvungano vekitonga kumzana, kila vekisikie iti aronga luvengo ulwo.

¹⁹ Niho Vafarisayo vakavwirana venye kwa venye, “Yoani ra iti tehenacho mweveiwa; rerehani isanga lose limratera.” Iombi la Vagriki

²⁰ Hekina Vagriki vasiku he vala vantu vekweie kuratasa he ula musi mbaha.

²¹ Avo vakamswia Filipo, mntu wa Betsaida ya Galilaya, vakamsemba vekiti, “Mfumwa, uswi tuenda kumvona Yesu.”

²² Filipo akatonga akamvwira Andrea; niho Andrea ne Filipo vakamvwira Yesu.

²³ Yesu naye akavagharusha, akati, “Saa yafika Mwana wa Mntu akazwe.

²⁴ Kididi, kididi, nimutio, Kabeu ka ngano kekisagwa he msau, kakafwa, kerakaa huvo ko kajenye; mira kekifwa, kemoghisha.

²⁵ Ye ekunda moo wakwe eneutesha; na ula evihiwa moo wakwe he si ii, eneukija mhaka he nkalamo ya kae na kae.

²⁶ Mntu ekinitumikia, naniratere, na hantu mi neho, niho hantu na mndima wangu enerahaikaa. Kangi mntu ekinitumikia, Vava enemshimia.

²⁷ Iki ngoro yangu ila vwasi, nami niti ze, ‘Vava unikanie he saa ii?’ mira ni vuntu vwa icho, nicho cheshigha nekifikia ii saa.

²⁸ Vava ukaze izina lako.” Niho hakaza izii kufuma uko wanga, “Nalikaza, nami ninelikaza wa.”

²⁹ Niho luvungano veimuke hafuhi vakasikia, vakati, “Haketa mrurumo;” vangi vakati, “Malaika ateta naye.”

³⁰ Yesu akagharusha, akati, “Izii ilo teliketike vuntu vwangu, mira ni he vuntu vwenyu.

³¹ Iki mlaho wa si ii uho; iki m’baha wa si ii enetaghwa na nze.

³² Aho mi nekinekwejwa wanga ya isanga, ninevajuta vose na hangu.”

³³ Etetie huvo kwa kuvonyesha iti, ni kifwa ani enerefwa.

³⁴ Niho luvungano vakamgharusha, “Uswi twesikie he myomongwa iti Kristo eikaa kae na kae; nawe uti ze iti kimtara Mwana wa Mntu kukwejwa? Uu Mwana wa Mntu ni ani?”

³⁵ Niho Yesu akavati, “Kianga kireho na unywi kakenda kadori. Tongani aho mwerena na icho kianga, kija kisiremuidima; ambu ula etongia he kija temanya hantu etonga.

³⁶ Igheri mwerena na kianga.” Yesu ekinatete huvo, akatonga, akakuvisa vasimvone.

Vayuda tevemwitikije, mira va kumwe vemwitikije kimpiso

³⁷ Mira nziaho erongie maluvengo mangi huvo mazya hevo, tevemwitikije;

³⁸ nesa kikoloke kila chetetiwe ni mroti Yesaya ekiti: “Mfumwa, ni ani eitikije mburi jetu? Kangi mkono wa Mfumwa wemfunukurirwe ani?”

³⁹ Nicho chashigha vo vasiidime kuitikija; ambu Yesaya etetie kangi:

⁴⁰ “Evatuntushe meso, Akaghosha ngoro javo nkuji; Vasirevona na meso avo, Vakajuvukiwa na ngoro javo, Na kugharuka nesa nivakije.”

⁴¹ Ivyo viteto Yesaya evitetie, kila ekivonie ngazo yakwe, akalanga mburi jakwe.

⁴² Mira hata he vabaha hekirena vajinki vwmwitikije; mira he vuntu vwa Vafarisayo tevekughambie boo, nesa vasirechwiiwa nzighi he sinagogi.

⁴³ Ambu vekikundire nguma ya vantu kuvecha nguma ya Mrungu.

Kifuhi cha mafundisho akwe Yesu mozya he vantu

⁴⁴ Yesu naye akaketa na izii ibaha, akati, “Ye eniitikija mi, teniitikija mi esire ula enitumie.

⁴⁵ Na ula enirereha mi emrereha ula enitumie.

⁴⁶ Mi nezie nesa nioke kianga cha si ii, nesa kila mntu eniitikija mi asiikae he kija.

⁴⁷ Na mntu ekisikia viteto vyangu ekisavigurisha, mi simlaha; ambu mi sizie kulaha si ii, esire kukija si ii.

⁴⁸ Ye enisua mi, esikunda viteto vyangu, hena ye anemlaha; kiteto icho nekitetie, nicho chenemlaha msi wa mkengelejo.

⁴⁹ Ambu sitetie vyangu mwenye; mira Vava enitumie, Ye mwenye eniazere cho neneteta na cho neneghamba.

⁵⁰ Nami nemanyije iti iazero lakwe ni nkalamo ya kae na kae; heicho ivyo mi neteta, niteta sa vuntu Vava enivwirire.”