YOHANE 11 - Chasu New Testament 1967

Lazaro evushwa he vefwie

¹ Hekina mntu muwaji, Lazaro wa Betania, wa muzi wavo Maria ne Marta mjinawe.

² Maria ni ula ekimvirire Yesu Mfumwa mafuta epupuntika, akamhanguja maghu na nywii jakwe, eye rumburye Lazaro ula ekiwaa.

³ Niho vala varumburye vakatuma ntume hakwe vekiti, “Mfumwa, ula wemkundie teveiwa.”

⁴ Yesu ekinasikie, akati, “Vuwaji uvu si vwa kifwa, mira ni vuntu vwa ngazo ya Mrungu, nesa Mwana wa Mrungu akazwe hevwo.

⁵ Na Yesu ekimkundie Marta na Mjinawe ne Lazaro.

⁶ Ekinasikie iti teveiwa, niho akaikaa hala hantu ekireho misi miri.

⁷ Kangi nyuma ya ivyo akavti varateri vakwe, “Natutongeni wa Yudea.”

⁸ Vala varateri vakamti, “Rabi, izana zana niho Vayuda vekienda kukubigha mabwe, nawe utonga wa uko?”

⁹ Yesu akagharusha, “Hamao, saa ja he msi si ikumi na mbiri? Mntu ekitonga hemsi tebigha chaa, kila evona kianga cha si ii.

¹⁰ Mira ekitonga kio ebigha chaa; ambu kianga tekiho heye.”

¹¹ Ekinatete huvo, kangi nyuma ya ivyo, akavati, “Mmbwie wetu Lazaro ashinjia; mira nitonga niremvusha.”

¹² Niho vala varateri vakamti, “Mfumwa, kakicha ashinjia enebanda.”

¹³ Mira Yesu etetie mburi ya kifwa chakwe; vo vakadunganya iti eteta mburi ya kushinjia lughohe.

¹⁴ Niho Yesu akavavwira boo, “Lazaro afwa.

¹⁵ Mi niizihirwa vuntu vwenyu kila nesekiho uko, nesa muidime kuitikija; mira natutonge hakwe.”

¹⁶ Niho Toma eitangwa Mmaza, akavati vatateri vaghenji, “Tutongeni na uswi turefwa hamwe naye.”

¹⁷ Niho Yesu ekifika akamkicha aikaa he mbira misi mine.

¹⁸ Betania wekiho hafuhi na Yerusalemu, kiringanyo cha maili mbiri huvu;

¹⁹ na vantu vajinki he Vayuda vekizie havo Marta ne Maria kuvatuja, vuntu vwa rumburye.

²⁰ Niho Marta ekinasikie iti Yesu ezie, akatonga kumzana; Maria naye ekiho kula nyumba.

²¹ Niho Marta akamti Yesu, “Mfumwa, nanga wekiwaha, rumburya tekifwa ye.

²² Mira na ere iki nemanyije iti cho wenemwomba Mrungu, Mrungu enekunka.”

²³ Yesu akamti, “Rumburyo enevuka he vefwie.”

²⁴ Marta akamti, “Nemanyije iti enevuka wa he kuvuka kwa vefwie msi wa mkengelejo.”

²⁵ Yesu akamti, “Mi nimi uko kuvuka he vefwie na nkalamo. Ye eniitikija mi, na akatefwa enekalama;

²⁶ na kila eho moo, ekiniitikija mi, tekafwenye neri kae na kae. Uitikija huvo?”

²⁷ Akamti, “Yee Mfumwa, mi nakuitikija iti we niwe Kristo, Mwana wa Mrungu, ula eza he si ii.”

²⁸ Ekikenja kuteta huvo, akatonga akamwitanga mjinawe eye Maria; akamvwira kwa mpiso, “Mcheji ewaha, ekuitanga.”

²⁹ Naye ekirasikia akavuka fia, akamswia.

³⁰ Na Yesu asanafika he kamuzi; mira ekireho hala hantu Marta emzaniie.

³¹ Niho vala Vayuda vekina ne Maria kula nyumba vekimtuja, vekinamvone vuntu evuka fia na kufuma, vakamratera; vekidunganya iti kana etatonga kula he mbira nesa areiia ho.

³² Maria ekinafike hala hantu Yesu ekiho, ekiramvona, akagwa he maghu akwe, akamti, “Mfumwa, nanga wekiwaha, rumburya tekifwa ye.”

³³ Yesu ekinamvone ekiia, na vala Vayuda vemratere vekiia, akaluluma na kuwajwa he ngoro,

³⁴ akati, “Mwemvikie hio?” Vakamti, “Mfumwa, nzo urerehe.”

³⁵ Yesu akaseja masoji.

³⁶ Niho Vayuda vakati, “Rereha vuntu emkundie.”

³⁷ Mira va kumwe vakati, “Hama uu ekimtambaruje ula ituntu meso, tekiidima kumkinda uu asifwe?”

³⁸ Niho Yesu ekiluluma kangi he ngoro yakwe, akafika he mbira. Nayo neki mpanga, na wanga heyo hevikiwe ibwe.

³⁹ Yesu akati, “Vushani ilo ibwe.” Marta rumburye ula efwie, akamti, “Mfumwa, iki enunka; ambu yoo ni msi wa kane ekinafwe.”

⁴⁰ Yesu akamti, “Mi sikuvwirire iti wekiitikija unevona ngazo ya Mrungu?”

⁴¹ Niho vakavusha lila ibwe. Yesu akavusha meso na wanga, akati, “Vava, nikuanjela ni kila we wenisikie.

⁴² Nami nekiremanya iti unisikia misi yose; mira he vuntu vwa ulu luvungano lweimuke aha, nicho cheshigha nekiteta huvo, nesa vaidime kuitikija iti niwe wenitumie.”

⁴³ Naye ekinakenje kuteta huvo, akaitanga na izii ibaha, “Lazaro, fuma nze!”

⁴⁴ Ula efwie akafuma na nze, echungiwe shanda maghu na mikono, vusho vwakwe vwechungiwe na mhaluma. Niho Yesu akavati, “Mchungueni, mumshighe atonge.”

Vabaha va vatasi veteta njama ya kumkoma Yesu

⁴⁵ Niho Vayuda vajinki vala vezie hakwe Maria vekivona vila eketie, vakamwitikija.

⁴⁶ Mira va kumwe vakatonga he Vafarisayo, vakavavwira vila Yesu eketie.

⁴⁷ Niho vabaha va vatasi na Vafarisayo vakavunganya chila, vakati, “Tuneghendaze? ambu uu mntu eronga maluvengo mangi.

⁴⁸ Twekimshigha huvu vantu vose venemwitikija; kangi Varoma navo veneza kutaha isanga letu na mbari yetu.”

⁴⁹ Mntu mmwe hevo, Kayafa, eki mtasi m’baha ula mwaka, akavati, “Unywi tehenacho mwemanyije neri;

⁵⁰ neri temudunganya iti kiiziha, mntu mmwe afwe vuntu vwa vantu; nesa mbari nzima isiteke.”

⁵¹ Icho kiteto tekitetie kwa kumanya kwakwe mwenye; mira kila eki mtasi m’baha mwaka ula, erotie iti Yesu enefwa vuntu vwa iyo mbari.

⁵² Neri si vuntu vwa iyo mbari du; mira na iti avunganye hamwe vana va Mrungu vezarike.

⁵³ Too msi ula vakachila mburi ya kumkoma.

⁵⁴ Heicho Yesu tezeanga kangi he Vayuda kwa kukufunyirija; mira akafuma uko, akatonga hantu hafuhi na nyika, mhaka he muzi weitangwa Efraimu; akaikaa ho hamwe na varateri vakwe.

⁵⁵ Pasaka ya Vayuda yekiho hafuhi; vantu vakakwea kufuma he mighunda mhaka Yerusalemu Pasaka yekinafike, nesa vakuzerije.

⁵⁶ Niho vo vakamwenda Yesu, vakateta vereimuka kula he nyumba ya mtaso, “Muti ze, tekaze neri he uu msi m’baha?”

⁵⁷ Na vabaha va vatasi na Vafarisayo vekifunyije momo iti mntu ekimanya hantu eho, atwae mburi, nesa vaidime kumgura.