YOHANE 10 - Chasu New Testament 1967

Isanzu la magonji

¹ “Kididi, kididi, nimutio, Ula esiingia he mvera wa isanzu la magonji, mira eingia mondo, uo ni mkea na mkibonda.

² Eingiia he mvera ni mrisha wa magonji.

³ Uo mlughojo emjuvuia, magonji nao esikia izii lakwe; naye eaitanga magonji akwe kwa mazina ao, na kuaramosha.

⁴ Naye ekinafunya magonji akwe ose na nze, earongorira; na ala magonji emratera, ambu emanyije izii lakwe.

⁵ Mgheni teekamratere neri, mira enemwaha; ambu teemanyije mazii a vagheni.”

⁶ Yesu evavwirire icho kisoma mira vo tevejuvukiwe ni ijo mburi evavwirire.

Mi nimi mrisha wedi

⁷ Ingeri Yesu akavati wa, “Kididi, kididi, nimutio, Mi nimi mvera wa magonji.

⁸ Vose venirongorire ni vakea na vakibonda; mira magonji teevasikie.

⁹ Mi nimi mvera; mntu ekiingia hemmi enekia; eneingia na kufuma, kangi enevona ndisha.

¹⁰ Mkea tezia kingi esire kuiva, na kukoma na kukonda; mi nezie nesa vakete nkalamo, kangi vaivone fwa.

¹¹ “Mi nimi mrisha wedi. Mrisha wedi einkija kuho kwakwe vuntu vwa magonji.

¹² Mntu wa mhako, esiye mrisha, kila magonji esi akwe, evona ighinga lekiza, akashigha magonji na kuaha; na ighanga liagura na kuazara.

¹³ Ula eaha kila e mntu wa mhako; tena luserekena na magonji.

¹⁴ Mi nimi mrisha wedi; vala e vangu nevamanyije; na vala e vangu venimanyije mi;

¹⁵ sa vuntu Vava enimanyije, nami nemmanyije Vava. Nami niinkija kuho kwangu vuntu vwa magonji.

¹⁶ Nirena magonji angi, esi a isanzu ili; ao nao kinitara kuaete; na izii langu enelisikia; niho heneketa ifyo imwe na mrisha mmwe.

¹⁷ Nicho cheshigha Vava ekinikunda, kila neinkija kuho kwangu nesa ninakughuhe wa.

¹⁸ Tehena ekunighunba, mira nitakuinkija, kangi nina nzinya ya kukughuha wa. Iazero ilo nelighuhie ha Vava wangu.”

¹⁹ Hakaketa wa kughavanyika he Vayuda, vuntu vwa ivyo viteto.

²⁰ Vajinki hevo vakati, “Uu ene mpepo, kangi eghuruka; hanini mwemsikija?”

²¹ Vakumwe vakati, “Viteto ivyo si vya mntu ena mpepo. H’ii! mpepo eveiwa kutambaruja matuntu meso?”

Yesu eho Yerusalemu he msi m’baha wa kukumbuka kuzerijwa kwa nyumba ya mtaso

²² Kula Yerusalemu hekina msi m’baha wa kukumbuka kuzerija nyumba ya mtaso; neki igheri la kiho.

²³ Yesu naye ekivechavecha he nyumba ya mtaso, he lukumbi lwakwe Salomoni.

²⁴ Niho Vayuda vemjunguluka, vekimti, “Unetulighighisha ngoro jetu mhaka rini? Kakicha we niwe Kristo utuvwire boo.”

²⁵ Yesu akavagharusha, “Nanamuvwira, mira unywi temuitikija. Ndima ijo nejionga he izina la Vava wangu nijo jenitetia vuonwa.

²⁶ Mira unywi temuitikija, ambu temuho ghati he magonji angu.

²⁷ Magonji angu enisikia izii langu; nami niamanya, nao eniatera.

²⁸ Nami niainka nkalamo ya kae na kae; neri teekazeteka narini; kangi tehena mntu eneanipekula he mkono wangu.

²⁹ Vava wangu eaninkie ni m’baha kuvecha vose; neri tehena mntu eveiwa kuapekula he mkono wa Vava wangu.

³⁰ Mi ne Vava tu mmwe.”

Vunzo vwa Vayuda

³¹ Vayuda vakatoa mabwe kangi iti vam’bighe.

³² Yesu akavagharusha, “Nemuvonyeshe ndima jedi nyingi jefuma ha Vava, he ijo ndima-o, ni ihi mwenibighia mabwe?”

³³ Vayuda vakamgharusha, “He vuntu vwa ndima yedi tetukubigha mabwe; mira ni kila we wemfalaja Mrungu, na kila we we mntu ukughosha Mrungu we mwenye.

³⁴ Yesu akavagharusha, “Hama tekiandikwe he myomo yenyu, kuti, ‘Mi netie, ni unywi mirungu?’

³⁵ Ukinakiche evaitange mirungu kila veziiwe ni kiteto cha Mrungu (maandiko teeveiwa kukondika);

³⁶ h’ii! ula eye Vava emzerije, akamtuma he si ii, unywi muti, ‘Umfalaja Mrungu,’ ni hala netie, ‘Mi ni Mwana wa Mrungu’?

³⁷ Kakicha sironga ndima ja Vava wangu, musiniitikije;

³⁸ mira nekijironga, nziaho temuniitikija mi, itikijani jila ndima; nesa muidime kumanya na kutwarija iti Vava eho hemi, nami niho he Vava.”

³⁹ Vakaenda kangi kumgura, mira akapuchuluka he mikono yavo.

⁴⁰ Akatonga wa na sela ya Yordani, mhaka hala hantu Yohane ekibatizia hala kuvoka, akakaa uko.

⁴¹ Vantu vajinki vakamswia, vakati, “Yohane terongie luvengo neri, mira vyose Yohane etetie he mburi ya uu neki vya idi.”

⁴² Vajinki vakamwitikija uko.