YOHANE 1 - Chasu New Testament 1967

Kivokio

¹ Aho kivoko hekina Kiteto, na uo Kiteto ekiho ha Mrungu, na uo Kiteto neki Mrungu.

² Uo kuvoka ekiho he Mrungu.

³ Vyose vyeharehike he uo; na esi he ye tehena cho cheharehike he vila vyeharehwe.

⁴ Heye niho hekina nkalamo, na iyo nkalamo ne kianga cha vantu.

⁵ Na icho kianga kiangaa he kija, neri kija tekikiidime.

⁶ Hekina mntu etumiwe kufuma ha Mrungu, izina lakwe niye Yohane.

⁷ Uo eziie vuonwa, iti atetie kianga vuonwa, nesa vose vaitikije vuntu vwakwe.

⁸ Uo sekiye kila kianga, mira ezie iti atetie kila kianga vuonwa.

⁹ Hekina kianga kijenye, chemwangaja kila mntu, chekiza he si ii.

¹⁰ Ekiho he si ii, he mburi yakwe si ii ikavoneka, neri ii si teimmanyije.

¹¹ Ezie hakwe, mira vala e vakwe tevemghuhie.

¹² Mira vose vemghuhie, vala veitikija izina lakwe, evainkie nzinya kuoka vana va Mrungu;

¹³ vemoghiwe, si kwa sakame, neri kwa mikundire ya mwiri, kana mikundire ya mntu, mira he Mrungu.

¹⁴ Na uo Kiteto akaoka mwiri, akatua hetu; na uswi tukavona ngazo yakwe, ngazo sa ya Mwana ere mmwe efuma he Vava; eizue mbonea na idi.

¹⁵ Yohane akamtetia vuonwa, akatetisha ekiti, “Uu niye nemtetie kuti, ‘Ye eza nyuma hemi ekinirongorire; ambu ekiho mi nesinate.’”

¹⁶ Ambu he kuizuiwa kwakwe, uswi vose tweghuhie mbonea na mbonea.

¹⁷ Ambu myomongwa yeinkijwe kwa mkono wakwe Mose; mbonea na idi vyezie kwa mkono wakwe Yesu Kristo.

¹⁸ Tehena anamvona Mrungu narini; Mrungu Mwana remmwe, eho he Vavee, niye emmanyishe.

Yohane M’batizi emtetia Yesu vuonwa

¹⁹ Na uvu nivwo vuonwa vwakwe Yohane, Vayuda vekinatume vatasi na Valevi kufuma Yerusalemu iti varemvwija, “We u muni?”

²⁰ Naye akakunda, neri tekanie; akakunda akati, “Mi simi Kristo.”

²¹ Vakamvwija, “Cheikee ze? Niwe Elia?” Akati, “Mi siye.” “We niwe ula mroti?” Akagharusha, “Hai.”

²² Niho vakamti, “Niwe ani? nesa tuvone cha kuvagharusha vala vetutumie. We mwenye ukutize?”

²³ Akati, “Mi ni izii la mreamberija uko nyika, ‘Rongajani nzia ya Mfumwa!’ sa vuntu mroti Yesaya etetie.”

²⁴ Na vala vetumiwe vekifumie ha Vafarisayo.

²⁵ Vakamvwija, vakamti, “Hanini ra webatiza kakicha siwe Kristo, kana Elia, kana ula Mroti?”

²⁶ Yohane akagharusha, akati, “Mi nibatiza kwa mpombe. Ghati he unywi heimuke yye mwesimmanyije.

²⁷ Ni ula eza nyuma hangu, eye chesinifwenye mi kuhalaja mkoa wa kiratu chakwe.”

²⁸ Ivyo vyerongike uko Betania sela ila ya Yordani, hantu Yohane ekibatizia.

²⁹ Hala yavo hakwe akamvona Yesu ekimzia, akati, “Rereha Mwana ng’onji wa Mrungu, etika mabanu a ii si!

³⁰ Uu niye nemtetie nekiti, ‘Heza mntu nyuma hangu, eye ekinirongorire; ambu ekiho mi sekiho.’

³¹ Neri mi nesekimmanyije; mira nesa afunyirijwe he Vaisraeli, nicho cheshighie mi nekiza kubatiza na mpombe.”

³² Yohane akateta vuonwa ekiti, “Nemvonie Mpeho ekisea sa nziva kufuma uko wanga, naye akaikaa wanga heye.

³³ Neri mi nesekimmanyije; mira ula enitumie kubatiza na mpombe, uo enivwirire, ‘Uo wenezamvona Mpeho ekisea na kuikaa wanga heye, uo niye ebatiza na Mpeho Wedi.’

³⁴ Nami nevonie, kangi nekoneshe iti uu ni Mwana wa Mrungu.”

Varateri va kuvoka

³⁵ Hala yavo kangi Yohane ekiimuke na varateri vakwe veri.

³⁶ Akamrereha Yesu ekivecha, akati, “Rereha Mwana ng’onji wa Mrungu!”

³⁷ Vala varateri veri vakamsikia ekiteta, vakamratera Yesu.

³⁸ Yesu akagharuka akavavona vekimratera, akavati, “Muenda ni?” Vakamti, “Rabi (ni kuti, ‘Mcheji’), uikaa hio?”

³⁹ Akavati, “Nzoni muvone.” Vakatonga vakavona hantu eikaa. Vakaikaa hakwe ula msi. Nao neki marongo a saa ikumi.

⁴⁰ Andrea mjinawe Simioni Perto, neki mmwe wa vala veri, vemsikie Yohane, vakamratera Yesu.

⁴¹ Uo akaronga mvona Simioni, mjinawe mwenye. Akamti, “Twamvona Mesia (ni kuti, ‘Kristo’).”

⁴² Akamtonja he Yesu. Yesu naye akamrereha, akati, “We niwe Simioni mwana Yohane. Nawe uneitangwa Kef” a (nikwo kuti, “Petro kana, Ikamba)”.

⁴³ Hala yavo hakwe Yesu akaenda kutonga Galilaya, naye akamvona Filipo. Yesu akati, “Niratera.”

⁴⁴ Filipo naye neki mntu wa Betsaida, mkaa wa muzi wavo Andrea ne Petro.

⁴⁵ Filipo akamvona Natanaeli, akamti, “Twamvona ula eandikwe ni Mose he myomongwa na varoti, Yesu mwana Yosefu, mntu wa Nazareti.”

⁴⁶ Natanaeli akamti, “Kive kintu chedi kifume Nazareti?” Filipo akamti, “Nzo uvone.”

⁴⁷ Niho Yesu akamvona Natanaeli ekimzia, akateta mburi jakwe, “Rereha Mwisraeli wa idi, heye hesina ikombere.”

⁴⁸ Natanaeli akamti, “Waidima ze kunimanya?” Yesu akagharusha, akamti, “Aho Filipo esinakuitanga, hala weho kijusi he mkuu, nekirekuyoya.”

⁴⁹ Natanaeli akamgharusha, “Rabi, we u Mwana wa Mrungu, niwe mfumwa wa Israeli.”

⁵⁰ Yesu akagharusha, akamti, “Kila nakuti nekuvonie kijusi he mkuu, nicho waitikija? Unevona vintu vibaha kukela ivyo.”

⁵¹ Akamti, “Kididi, kididi, nimutio, Munevona uko wanga hejuvuke, na vamalaika va Mrungu vekikwea na kumseia Mwana wa Mntu.”