YAKOBO 3 - Chasu New Testament 1967

Kutetia lumi

¹ Vandughu vangu, musioke vacheji vajinki, mwekimanya iti tunelahwa masa mabahisha.

² Ambu uswi vose tukwangwala he vintu vijinki. Mntu esikwangwala he kuteta, uo ni mntu ekoloke, eveiwa kukinda mwiri wakwe wose sa he lijamu.

³ Rerehani tugera lijamu he myomo ya farasi, nesa jitusikie, huvo tugharusha mwiri wajo wose.

⁴ Kangi rerehani meli; nziaho ni mbaha sani, na kutikwa ni nkungu mbaha, igharushwa ni sukani ndorisha, hantu hose m’baha wayo ekundie.

⁵ Nirehuvo lumi nalwo ni irungo idori, nalwo lukubaa mno. Rereha vuntu moto mdori weshota mshitu m’bahisha.

⁶ Na lumi ni moto; ni isanga leizue vuvivi, ulwo lumi, lwevikiwe hena marungo etu, nalwo nilwo lwegera mwiri wose kivivi, luraterija kushotera mirumbirwe, na cheasha moto uo kifuma he gehena.

⁷ Ambu kila mbare ya nyama, na ya madeghe, na ya vyebulutika, na ya vintu vyeho he bahari, virishwa, kangi vyanarishwa ni vantu.

⁸ Mira lumi tehena eidima kulurisha; ni luvivi lwesihema, lweizue vusungu vweete kifwa.

⁹ Helwo tum’bumija Mrungu Vava, na helwo turara vantu verumbiwe kwa fwanyanyi ya Mrungu.

¹⁰ Hena momo ula ula hefuma lutelwedi na kiraro. Vandughu vangu, tekive ivyo vioke huvo!

¹¹ Hamao, kisima kimwe kifunya mpombe yenona na yevava?

¹² Kanao! Vandughu vangu, mkuu uidima kugera ufuta, kana mzabibu ugera nkuyu? Nirehuvo, kisima tekiidima kufunya mpombe ya munyu na mpombe yenona.

Kiugho cha idi na cha mongo

¹³ Niani henyu echee kangi ena viugho? Avonyeshe ndima jakwe kwa mitongire yakwe yedi, he vuhoo na kiugho.

¹⁴ Mira mwekiketa kiru chena vukai na mavoo he ngoro jenyu, musikubumije, neri musitete mongo he vila vya idi.

¹⁵ Viugho ivyo tevifuma uko wanga, mira ni vya kimasanga, vya miikarire ya kimntu, na ya ki Shetani.

¹⁶ Ambu aho hantu hena kiru na mavoo, niho hantu hena mvulugho, na kila mihiro mivivi.

¹⁷ Mira kiugho chefuma uko wanga, cha kuvoka ni cheelile, kangi ni cha mporere, na vuhoo, kienda kusikija kila mntu, cheizue mbonea na ntunda jedi, tekina sombo, tekina lung’ong’o.

¹⁸ Na ntunda ja kitea jihandwa hena mporere na he vala veenda mporere.