YAKOBO 2 - Chasu New Testament 1967

Chetara kuvaketia vazuri na vakiva

¹ Vandughu vangu, musikete mwitikijo wa Mfumwa wetu Yesu Kristo, Mfumwa wa ngazo, kwa kusomboa vantu.

² Ambu mntu mwenye mpete ya dhahabu na suke jedi ekiingia he sinagogi jenyu; na kangi he kiingia mkiva, ena suke jesakae,

³ na unywi mwekimshimia ula edokie suke jedi, na kumti: “We ikaa aha hantu hedi;” na kumti ula mkiva: “We imuka hala,” kana: “Ikaa he maghu angu,”

⁴ huvo tamwaketa sombo hena ngoro jenyu, muoka varechwa mburi vena madunganyo mavivi?

⁵ Vandughu vangu vakunde, sikijani, kanao! Mrungu tesaghure vakiva va ili isanga vaoke vazuri va mwitikijo na varepala vufumwa evaravie vala vemkundie?

⁶ Mira unywi mwamwima mkiva shima. Kanao, vazuri tevemutunguluka unywi na kumutika he vitala?

⁷ Tevefalaja lila izina ledi mweitangiwe?

⁸ Mira mwekikolosha kila kiziomo cha kifumwa sa vuntu cheandikwe: “Mkunde mghenji wako sa we mwenye, muronga chedi.”

⁹ Mira mwekisomboa vantu, mubana na kulahwa ni viziomo iti muvareteshanya.

¹⁰ Ambu kila mntu wose egurisha viziomo vyose, mira ekikonda kimwe, akonda vyose.

¹¹ Ambu ula etetie: “Usishinde, nireye etie: “Usikome.” Heicho, nziaho tushindie, mira wekomie, waoka mrekonda viziomo.

¹² Tetani ra unywi na kuhira sa vantu venelahwa kwa kiziomo cha vukomboli.

¹³ Ambu mlaho teuna mbonea he ula esina mbonea. Mbonea ikukaza kukela mlaho.

Mwitikijo na mihiro

¹⁴ Vandughu vangu, kive ze, mntu ekiti ena mwitikijo mira esina mihiro? Ula mwitikijo uidima kumkija?

¹⁵ Kakicha mndughu wenyu wa kiume kana wa kiche, eho kituhu na kuduikiwa ni kijo,

¹⁶ na mntu wa henyu ekivati: “Kutongireni na mporere, mureota moto na kuighuta,” mira asivainke vila miri yavo yeenda, kinevaghenja ni?

¹⁷ Nirehuvo, na mwitikijo, kakicha teuna mihiro, wefwie wo mjenye.

¹⁸ Mira mntu eneti: “We una mwitikijo, nami nina mihiro.” Nivonyesha mwitikijo wako hesina mihiro, nami ninekuvonyesha mwitikijo wangu kwa mihiro yangu.

¹⁹ We uitikija iti Mrungu ni mmwe; uketa chedi. Mashetani nao eraitikija na kuzingiza.

²⁰ Mira uenda kumanya, we mntu wesikintu, iti mwitikijo hesina mihiro teuna ntunda?

²¹ Hamao, vava wetu Abrahamu tetarirwe iti ni mkitea vuntu vwa mihiro, aho ekimwitikija Isaki mwanawe he meza ya mtaso?

²² Uvona iti mwitikijo werongie ndima hamwe na mihiro yawo, na iti mwitikijo wekoloshwe kwa mihiro.

²³ Maandiko ala etetie akakoloshwa: “Abrahamu emwitikije Mrungu, ukatarirwa heye iti ni kitea; naye akaitangwa mmbwie wa Mrungu.

²⁴ Mwavona ra iti mntu etarwa iti ni mkitea vuntu vwa mihiro yakwe; si he mwitikijo wo mjenye.

²⁵ Nirehuvo ne Rahabu, ula mreshinda, itio, tetarirwe iti ni mkitea vuntu vwa mihiro, aho ekivaghuhia vala vazighani, akavafunya na nze he nzia ingi?

²⁶ Ambu savuntu mwiri wesina moo wefwie, nirehuvo, na mwitikijo hesina mihiro, wefwie.