VAROMA 9 - Chasu New Testament 1967

Lusoyoyo lwakwe Paulo he kusaitikija kwa Vayuda

¹ Niteta idi he Kristo, siteta mongo, izii langu la ngoro lekinitetia vunwa he Mpeho Wedi,

² iti nina lusoyoyo lubaha na kiwajo chesisia he ngoro.

³ Ambu mi mwenye nekiveiwa kuomba iti nizirwe na kutanywa ne Kristo, vuntu vwa vandughu vangu, mbari yangu he Kristo, vuntu vwa vandughu vangu, mbari yangu he kimwiri;

⁴ evo Vaisraeli, veghoshijwe vana ni ila ngazo na viaghano, na kuinkwa myomongwa na vutasi vwa Mrungu na viravo vyakwe;

⁵ evo vaku vavo, na hevo hakafuma Kristo, he nzia ya kimwiri. Niye eho wanga he vintu vyose, Mrungu ekazwa kae na kae. Amen.

Viariro vya Mrungu tevinavuka

⁶ Si iti kiteto cha Mrungu chavuka. Ambu si vose e va lukolo lwa Israeli veoka Vaisraeli.

⁷ Neri vose teveoka vana kwa kuti ni va lukolo lwakwe Abrahamu, esire: “Va kwa Isaki, nivo veneitangwa lukolo lwako;”

⁸ nikwo kuti, si vana va kimwiri e vana va Mrungu, mira ni vana va kila kiravo vetarwa kuoka lukolo.

⁹ Ambu kiteto cha kiravo ni iki: “He igheri sa ili nineza, ne Sara eneketa mwana.”

¹⁰ Neri si icho du, mira ne Rebeka naye, ekikenja kutika ndeni he ula mmwe eye vava wetu Isaki,

¹¹ ambu hala vala vana vesinamoghwa, neri vesinaronga kintu chedi kana kivivi, nesa kikundire cha Mrungu cha kusaghura kikoloke, neri esi vuntu vwa mirongire, mira vuntu madunganyo a ula eitanga,

¹² etiwe huvu: “M’baha enemrongia mdori ndima.”

¹³ Sa vuntu cheandikwe: “Namkunda Yakobo, mira Esau namdaa.”

Mrungu tena ibaa

¹⁴ Iki tuti ze? He Mrungu hena ibaa? Icho hai!

¹⁵ Ambu emvwirire Mose: “Ninemvoneia ula nemvoneia, ninemwondia ula nemwondia.”

¹⁶ Iki kari ni huvo, si he kuidima kwa ula eenda kana ula edindika, esire he ula evoneia, eye Mrungu.

¹⁷ Ambu maandiko eteta he mburi yakwe Farao, kuti: “Cheshigha nekikuvika ni iti nivonyeshe nzinya jangu hewe, izina langu libirikirwe he isanga lose.”

¹⁸ Iki ra kakicha ni huvo, ye eenda kumvoneia emvoneia, na ye eenda kumghosha mkuji, emghosha mkuji.

Mrungu ni mretetia

¹⁹ Kangi uneniti: “Hanini echeri eshagha? Ambu ni ani ekanana na kurekera kwakwe?”

²⁰ Hai! si huvo, We mntu; niwe ani wemgharusha Mrungu? Hamao, kila cheterumbwa, kimti ula ekirumbie: “Hanini wekinirumba huvu?”

²¹ Kana mrevumba, h’ii, tena nzinya he ivumba, ibonge imwe la ivumba kurumba kintu chena shima, na kumwe kintu chesina shima?

²² Ni kini ra, kakicha Mrungu he kuenda kuvonyesha oro yakwe, na kufunyirija nzinya yakwe, he kugumirija kubaha, ezizimije vila vya oro vyeringanywe iti vikondike,

²³ kangi nesa afunyirije ngazo yakwe mbaha he jila ntanu ja mbonea, ejiharehe too kae jikete ngazo;

²⁴ nivo va uswi etuitange, sire Vayuda du, mira hata Vakiisanga?

²⁵ Ni sa vuntu etetie he Hosea: “Vala ese vantu vangu ninevaitanga vantu vangu, Na mkunde wangu ula eseki mkunde wangu.”

²⁶ Kangi kineoka, hala hantu vekitiwe: “Unywi temu vantu vangu, Aho veneitangwa: ‘Vana va Mrungu ekalama.’”

²⁷ Yesaya naye etetie he Vaisraeli, ekiti: Itaro la vana Israeli, nziaho ni sa mshangagha wa bahari, venekijwa ni vala veshele du.

²⁸ Ambu Mfumwa enekolosha mburi yakwe he isanga, ekiikenja na kuichwa.”

²⁹ Kangi sa vuntu Yesaya erongeteta: “Nanga Mfumwa wa marivati tekitushighiie lukolo, Twekioka sa Sodoma, twekifwanyanywa na Gomora.”

Cheshigha Israeli ekigwa

³⁰ Iki tuti ze? Iti vantu Vakiisanga vesiratera singisirya, veinkiwe singisirya; mira ni ila singisirya yefuma he mwitikijo;

³¹ mira Vaisraeli vekiratera viziomo vya singisirya, tevefikiie kila kiziomo.

³² Hanini? Ni hala vesikaratere he nzia ya mwitikijo, esire sa kwa nzia ya mirongire. Vakakwangwala he lila ibwe lehosha,

³³ sa vuntu cheandikwe: “Rereha, nivika kula Sayuni, ibwe lekwangwaja na ikamba legusha; Na ula emwitikija tekasonike.”