VAROMA 8 - Chasu New Testament 1967

Nkalamo he Mpehongwa

¹ Ikira, tehena mlaho he vala veho he Kristo Yesu.

² Ambu kiziomo cha Mpeho wa nkalamo ula eho he Kristo Yesu anikombola, nikatana na kiziomo cha mabanu na kifwa.

³ Ambu vila vyeherire he viziomo kila vyegerirwe vusoka ni mwiri, Mrungu, he kumtuma Mwanawe mwenye he fwanyanyi ya mwiri wa mabanu, he vuntu vwa mabanu, akavija mabanu he mwiri;

⁴ nesa maazero a myomongwa akoloshwe he uswi twesianga kimwiri, mira he vila vya kimpeho.

⁵ Ambu vala veratera mwiri vedunganya vya kimwiri; mira vala veratera Mpeho vedunganya vya kimpeho.

⁶ Ambu madunganyo a mwiri ni kifwa; mira madunganyo a mpeho ni nkalamo na mporere.

⁷ Ambu madunganyo a mwiri ni vunzo he Mrungu, ambu teesikia viziomo vya Mrungu, neri teeidima kusikia.

⁸ Vala veratera mwiri teveidima kumwizihija Mrungu.

⁹ Mira kakicha Mpeho wa Mrungu etue he unyiwi, temuratera mwiri; mira muratera mpeho. Mira ula esina Mpeho wakwe Kristo, uo si wakwe.

¹⁰ Kakicha Kristo eikaa he unywi, mwiri wenyu wafwa he vuntu vwa mabanu; mira mpeho wenyu ekalama vuntu vwa kitea.

¹¹ Mira, kakicha Mpeho wa ula emvushije Yesu he vefwie eikaa he unywi, ula emvushije Kristo Yesu he vefwie, enekalamija hata miri yenyu yefikiwa ni kifwa, kwa Mpeho wakwe ula eikaa he unywi.

¹² Ikira, kakicha ni huvo, vandughu, tu varando, si va mwiri nesa tuikae he kuratera vintu vya mwiri;

¹³ ambu kakicha muikaia kuratera vintu vya mwiri, muenda kufwa; mira kakicha mwekikoma mihiro ya mwiri kwa Mpeho, munekalama.

Vana va Mrungu

¹⁴ Ambu vose vetonjwa ni Mpeho wa Mrungu, avo nivo vana va Mrungu;

¹⁵ kwa kuti temughuhie mpeho wa vuzoro eete fole, mira mweguhie mpeho wa kughoshwa vana, eye he uo tuitanga: “Aba, Vava.”

¹⁶ Mpeho mwenye eteta vuonwa hamwe na mpeho wetu kuti, uswi tu vana va Mrungu;

¹⁷ kakicha ra tu vana, tu vapali, verapala ha Mrungu, vepala hamwe ne Kristo; twekirishwa vwasi hamwe naye, ni iti tunakazwe hamwe naye.

Ngazo ila yeneza

¹⁸ Ambu mavwasi a igheri ili niatara iti si kintu sa ila ngazo twenefunukurirwa.

¹⁹ Ambu virumbe vyose navyo viteisha kianda na nkwina iti vana va Mrungu vafunukurwe.

²⁰ Ambu virumbe vyose navyo vyetekundiiwa kukondika; si he mikundire yavyo, esire he vuntu vwa ula evikundiie nesa vikete kiariro;

²¹ ambu virumbe navyo vinekombolwa vifunywe kizoro cha kukondika, viingie he vukomboli, vifikie vwedi vwa vana va Mrungu.

²² Ambu twemanyije iti virumbe vyose navyo viluluma hamwe, navyo vitarajwa hamwe mhaka iki.

²³ Neri sivyo du; mira hata uswi venye twerongeinkwa Mpeho, na uswi turadiha he ngoro jetu twekiinda kughoshwa vana, evwo vukomboli vwa mwiri wetu.

²⁴ Ambu twekijijwe kwa ikuji; mira ikuji lekinavoneka ilo si ikuji kangi. Ambu ni ani ekivika ikuji he kila ekivwene?

²⁵ Mira twekivika ikuji he kila twesikivwene, tukiinda kwa kugumirija.

²⁶ Nirehuvo Mpeho naye etughenja he vusoka vwetu, ambu tetumanyije kuomba sa vuntu chetutara; mira Mpeho mwenye etuombia kwa kululuma kwesiveteta.

²⁷ Na ula esaka ngoro emanyije madunganyo a Mpeho vuntu eikee, kila evasembia vezerire vuntu Mrungu ekunda.

²⁸ Na uswi twemanyije iti he vintu vyose Mrungu eronga vyedi hamwe na vala yemkunda, ni vala ekundie kuvaitanga too aho.

²⁹ Ambu vala evamanyije too kivoko, evasaghure to kivoko, vafwanyanywe na Mwana wakwe, nesa ya aoke wa nteruka he vandughu vajinki.

³⁰ Na vala evasaghure too kivoko nivo evaitange; na vala evaitange nivo evataririe kitea; na vala evataririe kitea, nivo evakazie.

Lukundo lwa Mrungu

³¹ Iki tuti ze he ivyo? Kakicha Mrungu eimuke na uswi, ni ani enetuidima?

³² Ye esimshighie Mwana wakwe mwenye, mira emwinkije he vuntu vwetu vose, eneshigha ze kutuinka vintu vyose hamwe nayye?

³³ Ni ani enevarengeha vala Mrungu evasaghure? Mrungu niye evatarira kitea.

³⁴ Ni ani enetulaha? Kristo Yesu niye efwie; yee, na kukela ivyo akavuka he vefwie, naye eho he mkono wa kume wa Mrungu, kangi niye etuombia.

³⁵ Ni ani enetutanya na lukundo lwakwe Kristo? H’ii! ni vwasi, kana ni vusovu, kana kuririeshwa, kana nza, kana sakaja, kana mpwasi, kana mhandwi?

³⁶ Sa vuntu cheandikwe, iti: “He vuntu vwako tushinda komwa di, Tutarwa sa magonji a kukomwa.”

³⁷ Mira he ivi vintu vyose, tuvota, na kwetu ni vuntu vwa ula etukundie.

³⁸ Ambu nakenja kumanya cha idi iti, neri kifwa, neri nkalamo, neri vamalaika, neri venye kifumwa, neri vila vyeho, neri vila vyeneza, neri venye nzinya,

³⁹ neri vyeho uko wanga, neri vyeho uko si, neri vingi vyovyose vyerumbiwe teviidima kunitanya na lukundo lwa Mrungu lweho he Kristo Yesu Mfumwa wetu.