VAROMA 7 - Chasu New Testament 1967

Mfwanano wa mabanu

¹ Vandughu temumanyije, -ambu niteta na vala vemanyije viziomo,- iti kiziomo kimtetia mntu hala ereho?

² Ambu mche na mghosiwe emchungiwe ni kiziomo he mghosiwe ereho; mira mghosiwe ekifwa achunguiwa kila kiziomo he mghosiwe.

³ Igheri mghosiwe ereho kakicha ekiketa mme ungi, eitangwa mrashinda. Mira mghosiwe ekifwa achunguiwa, techungwa ni icho kiziomo; iki si mrashinda kangi hata ekighuhwa ni mme ungi.

⁴ Huvo vandughu vangu, hata unywi mwefwiie myomongwa, he vuntu vwa mwiri wakwe Kristo, nesa muidime kuoka mari ya ungi, ula evukie he vefwie, nesa tumgerire Mrungu ntunda.

⁵ Ambu aho twecheri he mwiri, tama ja mabanu, jila jekiwaho vuntu vwa myomongwa, jerongie ndima he marungo etu, mhaka tukamoghia kifwa ntunda.

⁶ Mira iki twachunguwa he myomongwa, twafwiia kila kiikarire chekitukinda, nesa uswi tuidime kuronga ndima he kiikarire kishaa cha kimpeho, si he kiikarire cha maandiko.

Myomongwa na mabanu

⁷ Ingeri tuti ze? Myomongwa ni mabanu? Icho hai! mira sekimanya mabanu esire vuntu vwa kiziomo; ambu nesekimanya kumotoka, myomongwa yesetie: “Usimotoke.”

⁸ Mira mabanu evonie kapengere he lila iamoro, akanietia kila mbare ya kumotoka. Ambu mabanu hesina viziomo efwie.

⁹ Nami nekiho moo aho kuvoka hesina viziomo; mira lila iamoro lekinaze, mabanu akakalama, nami nikafwa.

¹⁰ Nikavoka lila iamoro leete moo iti hangu leetie kifwa.

¹¹ Ambu ibanu lekinavone kapengere he iamoro, likaniisha, na he icho likanikoma.

¹² Heicho myomongwa yezerire, na lila iamoro lezerire, na la kitea, kangi ni ledi.

¹³ H’ii, kila e chedi chaoka kifwa hemi? Icho hai! mira, nesa mabanu amanyike iti ni mabanu kididi, eetie kifwa hemi vuntu vwa kila chedi, nesa he lila iamoro, mabanu azikeoka mavivisha.

Vimoghwa viri vya kimuntu

¹⁴ Ambu twemanyije iti myomongwa kifumo chayo ni cha kimpeho, mira mi ni wa kimwiri, netaghiwe he mabanu.

¹⁵ Ambu simanyije cho neronga; ni hala kila nekikundie sikironga; mira kila nekiviihiwa nicho nekironga.

¹⁶ Mira kakicha nironga kila nesikikundie, nizumira kila kiziomo iti ni chedi;

¹⁷ iki ra, simi mwenye neronga icho, esire lila ibanu leho ndeni hemi.

¹⁸ Ambu nemanyije iti ndeni hemi, nikwo kuti ndeni he mwiri wangu, teheikaa chedi; ambu kuenda nienda, mira kuronga kila e chedi siveiwa.

¹⁹ Ambu kila chedi nekikundie sikironga, mira kila kivivi nesikikundie nicho nekironga.

²⁰ Heicho, kakicha kila nesikikundie nicho nekironga, simi mwenye nekironga, esire lila ibanu letue hemi.

²¹ Huvo nivona kiziomo iki, kuti hemi neenda kuronga kila e chedi, kila kivivi nicho cheho hafuhi.

²² Ambu niizihirwa ni kiziomo cha Mrungu he mntu wa uko ndeni;

²³ mira nivona kiziomo kingi he marungo angu, cheomanya kila kiziomo cha madunganyo angu, na kunighosha nkore ya kila kiziomo cha mabanu eho he marungo ango.

²⁴ Vwasi vwangu, mi mkiva! niani enenikania he mwiri uu wa kifwa?

²⁵ Niti navahache he Mrungu he Yesu Kristo Mfumwa wetu! Heicho, kari ni huvo, mi mwenye na kucha kwangu nirongia kiziomo cha Mrungu ndima, mira he mwiri wangu nirongia kiziomo cha mabanu ndima.