VAROMA 6 - Chasu New Testament 1967

Vumwe ne Kristo tevukunda mabanu

¹ Ingeri tuti ze? Tuzikebana nesa mbonea izikeneta?

² Icho hai! Uswi twefwie he mabanu tuneidimaze kuikaa kangi na mabanu?

³ Kana temumanyije iti uswi vose twebatizwe hena Kristo Yesu twebatizwe he kifwa chakwe?

⁴ Henaicho twejikiwe hamwe naye he m’batizo he kifwa chakwe, nesa sa vuntu Kristo evukie he vefwie he vuntu vwa ngazo ya Vavee, nirehuvo, na uswi tutongie he nkalamo shaa.

⁵ Ambu sa vuntu twegurane naye he sumpa ya kifwa chakwe, huvo tunegurana naye he sumpa ya kuvuka kwakwe he vefwie;

⁶ twekimanya kiteto iki iti mntu wetu wa kae evambiwe he msalaba hamwe naye, nesa mwiri wa mabanu ukondike, tusirongie mabanu ndima kangi;

⁷ ambu ula efwie atarirwa kita, atana na mabanu.

⁸ Mira kakicha twefwie hamwe ne Kristo, tuitikija iti tunekalama hamwe naye;

⁹ twekimanya iti Kristo ekinavuke he vefwie tefwa kangi; neri kifwa tekimtetia kangi.

¹⁰ Ambu he kula kufwa kwakwe, efwiie mabanu kantu kamwe; mira he kula kukalama kwakwe, emkalamia Mrungu.

¹¹ Huvo na unywi kutareni iti he mabanu mwefwie, na vena nkalamo ha Mrungu he Kristo Yesu.

¹² Heicho, mabanu asitetie miri yenyu yefwa, ikashigha mukaratera mhelele wayo;

¹³ neri musiinkije marungo enyu akaoka mata a vuvivi he mabanu, mira kuinkijeni venye he Mrungu, sa vefunyijwe he kifwa kuetwe he nkalamo, na marungo enyu he Mrungu aoke mata a kitea;

¹⁴ ambu mabanu teekamutetie unywi, kila mwesiho kijusi he viziomo, mira kijusi he mbonea.

Mfwanano wa vuzoro

¹⁵ Nikwo kuti ze? Tubane kila twesiho kijusi he viziomo, mira tweho kijusi ya mbonea? Icho hai!

¹⁶ Temumanyije iti he ula eye mwekuinkije heye kuoka vazoro vakwe he kumsikia, mwaoka vazoro va ula mwemsikia iti ni vuzoro mabanu vweete kifwa, kana kuti ni vuzoro vwa kusikia vweete kitea?

¹⁷ Mira Mrungu nakazwe ambu mweki vazoro va mabanu, mira mukasikia kwa ngoro jenyu ila mbare ya icha mwevikiwe, kijusi helo;

¹⁸ mwekinakombolwe mwekitanywa na mabanu, mukaoka vazoro va kitea.

¹⁹ Niteta kimntu vuntu vwa vusoka vwa miri yenyu. Ambu sa vuntu mweinkije marungo enyu aoke a ihani na kubera kantu kajinki, nirehuvo, iki inkijani marungo enyu ahirire kitea nesa muzerijwe.

²⁰ Ambu aho mwe vazoro va mabanu, mwekitanie na kitea.

²¹ Ni lumazo ani mwevonie misi ila he vintu ivyo mwevisikiwa soni iki? Ambu msio wa vintu ivyo ni kifwa.

²² Mira iki mwekinakombolwe, na kuikaa hae na mabanu, na kughoshwa vazoro va Mrungu, muna lumazo lwenyu, nalwo ni kuzerijwa, msio wakwo ni nkalamo ya kae na kae.

²³ Ambu mhako wa mabanu ni kifwa, mira kiinkwa cha Mrungu ni nkalamo ya kae na kae he Kristo Yesu Mfumwa wetu.