VAROMA 5 - Chasu New Testament 1967

Ntunda ja mwitikijo

¹ Iki twekinakenje kutarirwa kitea chefuma he mwitikijo, natukete mporere na Mrungu he vuntu vwa Mfumwa wetu Yesu Kristo.

² Eye heye twevonie he nzia ya mwitikijo kufikia mbonea ii eyo tweimuke heyo; na kuizihirwa he ikuji la ngazo ya Mrungu.

³ Neri si icho du, mira natuizihirwe hata he mavwasi; twekimanya iti vwasi ndima yavwo ni kuete kugumirija;

⁴ na ndima ya kugumirija ni kudinda; na ndima ya kudinda ni ikuji;

⁵ na ikuji telisonisha; ambu lukundo lwa Mrungu lwakenja kukufutwa na he ngoro jetu ni Mpeho Wedi uswi tweinkiwe.

Lukundo lwa Mrungu luvonekia he kifwa cha Kristo

⁶ Ambu aho twevasoka igheri lekinafike, Kristo efwie vuntu vwa vavivi.

⁷ Ambu ni kizinya mntu ekifwa vuntu vwa mkitea, mira usiche kiidimika mntu kufwa vuntu vwa mntu wedi.

⁸ Mira Mrungu evonyesha lukundo lwakwe ye mwenye he uswi, ambu Kristo efwie vuntu vwetu, aho twecheri vabanu.

⁹ Mira chekelile mno twekinakenje kuinkwa kitea vuntu vwa sakame yakwe, tunekijwa he oro kwa mburi yakwe.

¹⁰ Ambu kakicha aho twecheri vanzo, tukakundanywa na Mrungu he kifwa cha Mwana wakwe; twekinakundanywe tunezikakijwa he nkalamo yakwe.

¹¹ Neri si icho du, mira tuzihirwa he Mrungu he Mrungu vuntu vwa Mfumwa wetu Yesu Kristo, eye heye iki tweghuhie icho kikundanyo.

Kifwa kifuma he Adamu, nkalamo ifuma he Kristo

¹² Heicho, sa vuntu mabanu eingie he si ii vuntu vwa mntu mmwe, na he ibanu ilo, kifwa; huvo kifwa kikavafikia vantu vose ambu vose vebanie;

¹³ ambu viziomo vyesinaza mabanu ekireho he ii si, mira mabanu teetarwa hesina viziomo.

¹⁴ Mira kifwa kikatetia hata vala vesebanie ibanu lefwanane na ibanu lakwe Adamu, e fwanyanyi ya ula eneza.

¹⁵ Mira kila kiinkwa tekiikee sa lila iteshanyo; ambu ukinakiche he kubana kwa ula mmwe vajinki vefwie, ni kuvecha mno mbonea ya Mrungu, na kiinkwa cheho he mbonea ya mntu mmwe Yesu Kristo, kinezika vuntu vwa vala vajinki.

¹⁶ Neri kiringanyo cha ula mntu mmwe ebanie, tekiringane na kila kiinkwa cha mbonea, ambu mlaho wezie vuntu vwa mntu mwe, ukaete ibigho; mira kiinkwa cha mbonea chezie vuntu vwa mabanu mangi, kikaete kutarirwa kitea.

¹⁷ Ambu ukinakiche he kubana kwa mntu mmwe, kifwa kikatetia vuntu vwa ula mmwe, vala veghuha mbonea nyingi na kila kiinkwa cha kitea vekelile haiwa, venetetia he nkalamo vuntu vwa ula mmwe, Yesu Kristo.

¹⁸ Iki ra, he mburi ya ibanu imwe vantu vose vechwiiwe ibigho, nirehuvo, he kirongire kimwe cha kitea, vantu vose venetarirwa kitea chena nkalamo.

¹⁹ Ambu kakicha he kubera kwa mntu mmwe, vantu vajinki veingijwe he miikarire ya vabanu, nirevwo he kusikia kwa mmwe, vantu vajinki vaingijwa he miikarire ya vakitea.

²⁰ Mira viziomo vyeingie nesa lila ibanu lizike oka ibaha, na mabanu ekinanete, mbonea ikaongejika kukela;

²¹ nesa sa vuntu mabanu eketie nzinya he kifwa, nirehuvo he vuntu vwa kitea mbonea itetie mhaka nkalamo ya kae na kae he Yesu Kristo Mfumwa wetu.