VAROMA 3 - Chasu New Testament 1967

Mavwijo egharushwa

¹ Iki Myuda ekelile heni? Na kutavanwa kuve heni?

² Kuve mno he kila nzia. Cha kuvoka kuti nivo vesigirirwe maazero a Mrungu.

³ Iki ni kize, kakicha kumwe hevo teveitikije? H’ii, kusaitikija kwavo kunevusha kitengo cha Mrungu?

⁴ Icho hai! Mrungu naoke mkitengo, na kila mntu ni mmongo; sa vuntu cheandikwe: “Nesa umanyike iti una kitea he viteto vyako, Uvote wekiingia he milaho.”

⁵ Mira tuti ze, kakicha vuvivi vwetu vukonesha kitea cha Mrungu? H’ii! Mrungu ni mtungulu ekisikia oro? (Niteta kimntu)

⁶ Icho hai! ambu kakicha ni huvo Mrungu eidima ze kulaha ii si?

⁷ Mira kakicha kweri ya Mrungu yazikafunukura shima yakwe vuntu vwa mongo wangu, hanini necheri lahwa iti ni m’banu?

⁸ Hanini twesiti: sa vuntu twechungijwa, na sa vuntu vangi vezikateta iti tuteta huvo; Natuhire vivivi nesa vyedi vize? evo kulahwa kwavo kwena singisirya.

Kuteshanya kwa mntu he si ii yose

⁹ Nikini ra, tu vedi kuvecha vangi? Hai, neri hadori! Ambu twakenja kuvasitaka Vayuda na Vagriki iti hata vo vetetiwa ni mabanu

¹⁰ sa vuntu cheandikwe, iti: “Tehena mkitea neri mmwe.

¹¹ Tehena etwarije; Tehena emwenda Mrungu.

¹² Vose vetekie, vevoie vose chwe; Tehena eronga chedi, hai! neri mmwe.

¹³ Mirangi yavo ni mbira yeho mwaji, Veghosha maluhi avo a kukengerira. Vusungu vwa bili vuho he miomo yavo.

¹⁴ Miomo yavo yeizue viraro na kusulumira.

¹⁵ Maghu avo esara kuita sakame.

¹⁶ Kukondika na kuganganya viho he nzia javo.

¹⁷ Neri tevemanyije nzia ya mporere.

¹⁸ He meso avo tehena kumfoleka Mrungu.”

¹⁹ Heicho, twemanyije iti mburi jose myomongwa yejiteta, ijiteta he vala vetetiwa ni myomongwa, nesa kila momo ujivwe, na ii si yose iikae kijusi he mlaho wa Mrungu;

²⁰ ambu tehena mntu mwenye mwiri enetarwa iti ni mkitea mozya heye, he mirongire ya viziomo; ambu kumanya mabanu kuetwe ni viziomo.

Kutaririwa kitea he mwitikijo vuntu vwakwe Kristo

²¹ Mira iki kitea cha Mrungu chafumirira esi cha viziomo, nacho kitetiwa vuonwa ni myomongwa na varoti,

²² ni kitea cha Mrungu cheho he vuntu vwa mwitikijo he Yesu Kristo, he vose vemwitikija. Ambu tehena mtekano;

²³ vose vebanie, na kuduikiwa ni ngazo ya Mrungu;

²⁴ vetarirwa kitea sutwa kwa mbonea yakwe he nzia ya vukomboli vweho he Kristo Yesu;

²⁵ eye Mrungu emvikie aoke kikundanyo vuntu vwa mwitikijo he sakame yakwe, nesa avonyeshe kitea chakwe, he vuntu vwa kugumirija kwa Mrungu he mabanu ose erongore kuketwa;

²⁶ nesa he marongo aa avonyeshe kitea chakwe, nesa aoke Mkitea, na kumtarira kitea ula emwitikija Yesu.

²⁷ Kukukaza kuohi? Kwafingiwa nze. Ni he kiziomo cheikee ze? Ni he kiziomo cha mihiro? Hai! Mira ni kiziomo cha mwitikijo.

²⁸ Huvo tuvona iti mntu etarirwa kitea kwa mwitikijo, si kwa mirongire ye viziomo.

²⁹ Kanao, Mrungu ni Mrungu wa Vayuda du? Sireye Mrungu hata wa Vakiisanga? Yee, nireye hata wa Vakiisanga;

³⁰ kakicha kididi ni Mrungu mmwe, enetarira kitea kwa mwitikijo uo uo vala vetavanwe hata vala vesitavanwe.

³¹ Iki tuvusha viziomo vuntu vwa uo mwitikijo? Icho hai! mira hantu ha kuvikonda, tuzika kuvikonesha.