VAROMA 2 - Chasu New Testament 1967

Na ere Vayuda verena nzune ila ila

¹ Heicho, we mntu wose welaha, tuna cha kukukania; ambu he ivyo wemlaha mghenji navyo, ukalaha navyo we mwenye, iti u mnzune ambu vila welahia navyo nirevyo weketa.

² Na uswi twemanyije iti mlaho wa Mrungu ni wa idi he vala veronga ivyo.

³ We mntu, wevalaha vala veronga ivyo, nawe mwenye weraronga ivyo, h’ii! udunganya iti unetesya mlaho wa Mrungu?

⁴ Kana utadaa vwedi vwakwe vujinki na kurimia kwakwe na kugumirija kwakwe, usimanye iti vwedi vwa Mrungu vukukota nesa uchwe mti?

⁵ Mira he vuntu vwa vukuji vwako, na ngoro yako yesichwa mti, ukuvanzia oro he ula msi wa oro, na mfunukuro wa singisirya wa Mrungu wenefunukurirwa;

⁶ eye eneremriha kila mntu kiringanyo cha mihiro yakwe,

⁷ vala evo kwa kurimia he kuronga vyedi, veenda ngazo na shima na kusakondika, veneinkwa nkalamo ya kae na kae;

⁸ na vala vena irenge, vesisikia idi, mira vekunda ibaa, venefikiwa ni oro na ibigho;

⁹ heneketa vukiva na vwasi he kila ngoro ya mntu eketa vivivi, kuvokia Myuda na Mgiriki na ye;

¹⁰ mira ngazo na shima na mporere he kila mntu eronga vyedi, kuvokia Myuda na Kgriki naye;

¹¹ ambu Mrungu tena sombo.

¹² Ambu vose vebanie hesina viziomo veneteka hesina viziomo, na vose vebanie hena viziomo venelahwa na viziomo.

¹³ Ambu si vala vesikia viziomo vena singisirya mozya he Mrungu, esire vala veronga viziomo venetarwa iti ni venye singisirya.

¹⁴ Ambu Vakiisanga vesina viziomo vekironga he miikarire yavo vila vyeho he myomongwa, ava vesina viziomo, venye vekuokia viziomo.

¹⁵ Avo vevonyesha shima ya myomongwa yeandikwe he ngoro javo, izii la ngoro javo lekivatetia vuonwa, na madunganyo avo o majenye, ekivasitaka kana kuvakania;

¹⁶ he msi ula Mrungu ekinelaha mpiso ja vantu, kiringanyo cha Mburi Yedi yangu he Kristo Yesu.

¹⁷ Mira we kari uitangwa Myuda, na kuarira myomongwa na kukukaza he Mrungu,

¹⁸ na kumanya mikundire yakwe, na kukunda vila e vyedi, nawe wechejijwe he myomongwa,

¹⁹ na kumanya cha idi iti we mwenye u mrongori wa matuntu, na kianga cha vala veho he kija,

²⁰ mrechunda varundu, mcheji wa vana vadori, eikee sa ena icha na idi he myomongwa;

²¹ we wecheja vaghenji, tukucheja we mwenye? We webirikira iti mntu asiive, we mwenye uiva?

²² We weti mntu asishinde, we mwenye ushinda? We wevihiwa ni mirungu, utaha he nyumba ja mtaso?

²³ We wekukaza na myomongwa, ukonda shima ya Mrungu kwa kubera myomongwa?

²⁴ Ambu izina la Mrungu lifalajwa he Vakiisanga vuntu vwenyu, sa vuntu cheandikwe.

²⁵ Ambu kutavanwa kuve kakicha ugurisha viziomo, mira wekioka mrekonda viziomo, kutavanwa kwako kwaoka kusatavanwa.

²⁶ Kakicha ul esitavanwe egura maazero a myomongwa h’ii, kusatavanwa kwakwe tekukatarwe iti ni kutavanwa?

²⁷ Na ula esitavanwe kimsimo ekigurisha myomongwa, enekulaha we wena maandiko kangi wena kitavani, uko ukonda myomongwa.

²⁸ Ambu ye si Myuda e Myuda kwa nze du, neri kitavani si kila cha nze du, he mwiri;

²⁹ mira ni Myuda e Myuda uko ndeni, na kitavani ni cha ngoro, cha kimpeho, si he maandiko. Echo nguma yacho yesifuma he vantu, esire he Mrungu.