VAROMA 16 - Chasu New Testament 1967

Ngezya jakwe mwenye

¹ Nimugurija rumburya wetu Foibe, e mndima wa kanisa leho Kenkrea;

² mumghuhie he Mfumwa, sa vuntu chevatara vezerire; mumghenje he vintu vyose eneenda henyu; ambu naye eokie mraghenja vantu vajinki, erenighenja hata mi.

³ Nikezijani Priska ne Akila, veronga ndima hamwe nami he Kristo Yesu,

⁴ vekuinkije hata kuchwiwa singo vuntu vwa moo wangu, evo nevaanjela, neri simi du, mira hata makanisa ose a Vakiisanga;

⁵ nikezijani na kanisa leho he nyumba yavo. Nikezijani Epaineto, mkunde wangu, e wa kuvoka he Kristo uko Asia.

⁶ Nikezijani Maria, ekubinushe mno he vuntu vwenyu.

⁷ Nikezijani Androniko ne Yunia, e vandughu vangu, vechungiwe hamwe nami, vena nguma yedi he ntume; evo verongeoka vakwe Kristo hemi.

⁸ Nikezijani Ampliato, mkunde wangu he Mfumwa.

⁹ Nikezijani Urbano, mndima hamwe nami he Kristo, ne Stakisi, mkunde wangu.

¹⁰ Nikezijani Apele, ula ezumirwe he Kristo. Nikezijani vantu va kaa hakwe Aristobulo.

¹¹ Nikezijani Herodiani, mndughu wangu. Nikezijani vantu va kaa hakwe Narkiso veho he Mfumwa.

¹² Nikezijani Turfaina neTrifosa, verekudindija mno he Mfumwa. Nikezijani Persusi, mkunde ekudindija mno he Mfumwa.

¹³ Nikezijani Rufo, esaghurwe he Mfumwa, na mlala wavo ere mlala wetu.

¹⁴ Nikezijani Asinkrito, Flegoni, Herme, Patroba, Herma, na vandughu veho hamwe naye.

¹⁵ Nikezijani Filologo ne Yulia ne Nerea na rumburye, ne Olimpa na vezerire vose veho hamwe navo.

¹⁶ Kezyanyani na kubwitana kwezerire. Makanisa ose akwe Kristo amukezya.

¹⁷ Vandughu, nimusemba, rerehani vala veketa marenge na mburi jekwangwaja, jeomanya ila michejire mwekuchejije; mutane navo.

¹⁸ Ambu vala veikee huvo tevemrongia Mfumwa wetu Kristo ndima, esire ndeni javo venye, na he viteto vyenyutume vya kukugerekanya veisha ngoro ja vantu vanana.

¹⁹ Ambu kusikia kwenyu kwavafikia vantu vose; heicho niizihirwa vuntu vwenyu, mira nienda iti unywi muoke vakiugho he chedi, na varundu he kivivi.

²⁰ Na Mrungu wa mporere enemangamnyanyarisha Shetani kijusi he mavato enyu. Mbonea ya Mfumwa wetu Yesu Kristo na iikae hamwe na unywi.

²¹ Timoteo eronga ndima hamwe nami, emukezya, ne Lukio, ne Yasoni ne Sosipatro vandughu vangu.

²² Mi Tertio, neandike barua ii, nimukezya he Mfumwa.

²³ Gayo, mkaa wangu na wa kanisa lose, hata ye emukezya. Erasto, mnjama wa muzi, emukezya, ne Kwarto mndughu wetu. [

²⁴ Mbonea ya Mfumwa wetu Yesu Kristo na iikae hamwe na unywi vose. Amen.]

Kumkaza Mrungu

²⁵ Iki nakazwe ye eveiwa kumudindija, sa vuntu Mburi Yedi yangu yevwo, na he kubirikira kwakwe Yesu Kristo, cheteghane na ula mfunukuro wa ila mpiso yekivisike too kae na kae,

²⁶ ikafunyirijwa he igheri iki kwa maandiko a varoti, ikamanyika he vaisanga vose sa vuntu Mrungu wa kae na kae eazere, nesa vagurishe mwitikijo.

²⁷ Niye Mrungu mwenye du ena viugho. Ngazo ni yakwe Yesu Kristo, kae na kae. Amen.