VAROMA 15 - Chasu New Testament 1967

¹ Mira uswi twena nzinya, kitutara kutika vusoka vwa vala vesina nzinya, neri tekitutara kukuizihija venye.

² Kila mmwe wetu namzihije mghenji wakwe, nesa avone chedi, ajengwe.

³ Ambu Kristo naye tekuizihije ye mwenye; mira sa vuntu cheandikwe: “Viraro vya vala vekurarie vyanigura.”

⁴ Ambu vila vyose vyerongeandikwa vyeandikwe kutucheja uswi, nesa he kuinda na ituja la maandiko, tukete ikuji.

⁵ Na Mrungu mreinda na ituja aimunke kugwia hamwe unywi venye cheteghane he Kristo Yesu;

⁶ nesa he ngoro mwe na he momo mmwe muinde kumkaza Mrungu Vava wa Mfumwa wetu Yesu Kristo.

Mburi Yedi he Vakiisanga

⁷ Heicho mughuhiane unywi venye na venye, sa vuntu Kristo naye etughuhiie, nesa Mrungu akazwe.

⁸ Ambu nimutio, Kristo eokie mndima wa varatavanwa, nesa avonyeshe idi la Mrungu, na kukonesha vila viravo vaku veinkiwe;

⁹ kangi nesa Vakiisanga vamkaze Mrungu vuntu vwa mbonea yakwe; sa vuntu cheandikwe: “Heicho ninekuanjela ghati he Vakiisanga, Nami nineimbia izina lako.”

¹⁰ Kangi eti: “Izihirwani Vakiisanga hamwe na vantu vakwe.”

¹¹ Kangi wa: “Unywi Vakiisanga vose, m’bumijeni Mfumwa; Unywi vantu vose, mtogoleni.”

¹² Na kangi Yesaya eti: “Heneketa kikolo chakwe Yese, Na ula enevuka kutetia Vakiisanga; Niye Vakiisanga venemwarira.”

¹³ Iki Mrungu wa ikuji amuizuje kuizihirwa kwose na mporere he kuitikija, nesa muzike haiwa kuketa ikuji he nzinya ya Mpeho Wedi.

Paulo evasemba kwa kuvaandikia boo

¹⁴ Vandughu vangu, nakoneshwa mi mwenye he mburi jenyu iti na unywi mweizue vwedi, mweizujwe kucha kwose, kangi muidima kuchundana.

¹⁵ Mira nimuandikia kwa nereko kukela he mafungu kumwe a ii barua, sa kutumukumbusha, he ila mbonea neinkiwe ni Mrungu,

¹⁶ nesa nioke mndima wakwe Kristo Yesu he Vakiisanga, nirongie Mburi Yedi ya Mrungu ndima ya vutasi, nesa Vakiisanga vaoke itasi lekundike, lekikenja kuzerijwa ni Mpeho Wedi.

¹⁷ Huvo, nina cha kukukazia he Kristo Yesu mozya he Mrungu.

¹⁸ Ambu siidima kulanga kintu Kristo esikiketie he ndima yangu, nesa Vakiisanga vaveiwe kusikia, kiteto kana he mirongire,

¹⁹ he nzinya ja maluvengo na vimako, kwa nzinya ja Mpeho Wedi, kuravokia uko Yerusalemu na mondo na mondo hewo mhaka Iliriko, nakenja kubirikira Mburi Yedi yakwe Kristo kwa kukolosha;

²⁰ huvo nikakudoka kubirikira Mburi Yedi, nisirebirikira aho hantu izina lakwe Kristo lekenjije kulangwa, nesa nisirejenga he msingi wa mntu ungi;

²¹ mira sa vuntu cheandikwe: “Vala vesinabirikirwa mburi jakwe venevona, Na vala vesekinasikia venekisikia venetwarija.”

Kurekera kwakwe Paulo mwenye

²² Icho nicho cheshigha nekikindwa kantu kajinki kuza henyu.

²³ Mira iki kwa kuti sina kapengere kangi he myondo ii, kangi too miaka mijinki yevecha, nina nkwina kuza henyu;

²⁴ igheri lose nenezoka uko Spania, nineza henyu. Ambu niarira kuvonana na unywi aho nekizoka na kuerekejwa ni unywi, ngoro yangu itundanywe ni unywi.

²⁵ Mira iki nitonga Yerusalemu kurarongia vezerire ndima;

²⁶ ambu chevaizihire vantu va Makedonia na Akaya kusanga vuntu vwa vala vezerire veho uko Yerusalemu e vakiva.

²⁷ Yee, chevaizihire, kangi veokie varando vavo. Ambu kakicha Vakiisanga veketie sanga he vintu vyavo vya kimpeho, chevatarire kuvarongia ndima he vintu vyavo vya kimwiri.

²⁸ Heicho nekikenja iyo ndima yavo na kuvavikia isimbiko la iyo ntunda ninevechija henyu nekitonga Spania.

²⁹ Nami nemanyije iti nekiza henyu nineza na lutelwedi lwakwe Kristo lwekoloke.

³⁰ Vandughu, nimusemba he Mfumwa wetu Yesu Kristo na he lukundo lwa Mpeho, kudindijeni hamwe nami he maombi enyu he vuntu vwangu mozya he Mrungu;

³¹ nesa nikaniwe he vala vesiitikije veho uko Yudea, na kangi ndima yangu nena nayo uko Yerusalemu ikunduke he vezerire;

³² nesa nifike henyu neizihirwe, sa vuntu Mrungu ekunda, niidime kuhema hamwe na unywi.

³³ Mrungu wa mporere naikae na unywi vose. Amen.