VAROMA 14 - Chasu New Testament 1967

Kuvagumirijija vashokeri

¹ Ula e msoka wa mwitikijo, mghujieni, mira musimlahe madunganyo akwe.

² Mntu mmwe ena mwitikijo, ela vyose; mira ula e msoka, ela mbogha.

³ Ula ela asim’bereshe ula esila, neri ula esila asimlahe ula ela; ambu Mrungu emkundie.

⁴ We niwe ani wemlaha mzoro wa ungi? He mfumwa wakwe mwenye ye eimuka kana kugwa. Yee, eneimukijwa, ambu Mfumwa eidima kumwimukija.

⁵ Mntu mmwe egimbika misi kumwe kukela ila ingi, ungi egimbika yose cheringane. Kila mntu nakoneshe he kucha kwakwe mwenye.

⁶ Ye egimbika msi eugimbika he kumshimia Mfumwa; na ula ela, ela he Mfumwa, ambu emwanjela Mrungu. Kangi ye esila, tela he Mfumwa, naye eramwanjela Mrungu.

⁷ Ambu tehena wa hetu eikaa na moo vuntu vwakwe mwenye, kana tehena efwa vuntu vwakwe mwenye.

⁸ Ambu kakicha tuikaa na moo, tumwikaia Mfumwa, kana kakicha tufwa, tufwa he Mfumwa. Heicho, kari tuikaa na moo kana tufwa, tu mari ya Mfumwa.

⁹ Ambu heicho, Kristo efwie kangi akaketa wa moo, nesa aoke Mfumwa wa vala vefwie na vala vereho.

¹⁰ Mira we o, h’ii! hanini wemlaha mndughu wako? kana we, h’ii! hanini wem’bera mndughu wako? ambu uswi vose tuneimuka mozya he kichumbi cha mlaho cha Mrungu.

¹¹ Ambu heandikwe: “Sa vuntu mi nekalama, nivwo vuntu Mfumwa eti, Kila ikunkuro linenidunkutia, Na kila lumi lunemkaza Mrungu.”

¹² Heicho ni huvo, kila mntu he uswi eneteta mburi jakwe mwenye mozya he Mrungu.

¹³ Heicho tusizikelahana, mira keba chwani huvu: Mntu asikete kintu cha kumkwangwaja mndughu kana kumgusha.

¹⁴ Nemanyije kangi nekoneshe nezo he Mfumwa Yesu, iti tehena kintu kivivi he kifumo chacho; mira he ula ekivona iti ni kivivi, he uo kintu kila ni kivivi.

¹⁵ Kangi mndughu wako ekivihijwa ni kijo, washigha kutongia he lukundo. Mntu ula Kristo efwie vuntu vwakwe usimkonde vuntu vwa kijo chako.

¹⁶ Heicho, uvwo vwedi vwenyu vusilangwe uvivi.

¹⁷ Ambu vufumwa vwa Mrungu si kula kana kunwa, esire ni kitea na mporere na kuizihirwa he Mpeho Wedi.

¹⁸ Ambu ula emrongia Kristo ndima he vintu ivyo, emwizihija Mrungu, kangi ekundwa ni vantu.

¹⁹ Iki kari ni huvo, naturatere mburi ja mporere na mburi jeve he kujengana.

²⁰ Usikonde ndima ya Mrungu vuntu vwa kijo. Kididi, vyose ni vyedi; mira ni kivivi he mntu ula ela kwa kukukwangwaja.

²¹ Ni chedi kusala nyama kana kusanwa mvinyo kana kuteta kintu kingi chochose, echo hecho mndughu wako ekwangwajwa.

²² Ula mwitikijo wena nawo uikae nawo hewe mwenye mozya he Mrungu. Mrela vwedi ni ula esikulaha mwenye he mburi ila eikundie.

²³ Mira, ula eganganya, kakicha ela, akenja kulahwa kuti ena masa, ambu telie kwa mwitikijo; na kila cheketwa chesifuma he mwitikijo, ni ibanu.