VAROMA 13 - Chasu New Testament 1967

Kuvasikia vazatetia

¹ Kila mntu nasikie vubaha vwetetia; ambu tehena vubaha vwesifumie ha Mrungu; na vula vwewaho vweazerwe ni Mrungu.

² Huvo, ye em’bera mratetia ekanana na iazero la Mrungu; na vala vekanana venekuetie mlaho.

³ Ambu vala vetetia tevefolesha vantu vuntu vwa mihiro yedi, mira ni vuntu vwa mihiro mivivi. Iki uenda usimfoleke mratetia? Ronga vyedi, nawe unekazwa niye;

⁴ ambu ye ni mndima wa Mrungu hewe vuntu vwa vyedi. Mira wekironga vivivi, foleka; ambu terakutikira mhandwi sutwa; kila e mndima wa Mrungu echwa sire he mrehira vivivi he vuntu vwa oro.

⁵ Heicho kitara kusikia, si vuntu vwa ila oro du, mira hata he vuntu vwa izii la ngoro.

⁶ Heicho wa muiha kodi; kila vo e vandima va Mrungu vetuaronga ndima iyo iyo.

⁷ Vainkeni vose vila vyevatara: mntu wa kodi, kodi; mntu wa mshanjo, mshanjo; ye etara fole, fole; ye etara shima, shima.

Lukundo lwa kindughu

⁸ Musiavwe chochose ni mntu, esire kukundana; ambu ula emkunda mgheni akolosha kiziomo.

⁹ Ambu kula kuti: “Usishinde, usikome, usiive, usimotoke;” na herena iamoro lingi lolose, lisankanywa he kiteto iki, kuti: “Mkunde mghenji wako sa we mwenye.”

¹⁰ Lukundo telumketia mghenji kivivi; huvo lukundo nilwo kikolosho cha viziomo.

Kuzengelela kwa misi yakwe Kristo

¹¹ Yee, twekimanya igheri, iti saa ya kuvukia he lughohe yafika; ambu iki lukanio lwetu luho hafuhi na uswi kukela hala twekivoka kuitikija.

¹² Kio kivecha, hafika kucha; heicho tukuhambue mirongire ya kija, na kudoka mata a kianga.

¹³ Vuntu chetara he msi, natutonge na shima; si he kuliisha na kuengea, si he uvura na kushinda, si he mavoo a kiru.

¹⁴ Mira mdokeni Mfumwa Yesu Kristo, neri musisoseje mwiri mukarekweja mhelele wawo.