VAROMA 12 - Chasu New Testament 1967

Moo mshaa

¹ Heicho vandughu, nimusemba he mbonea ja Mrungu, inkijani miri yenyu ioke itasi lena moo, lezerire, lemwizihija Mrungu, niwo mtaso wenyu weteghane.

² Neri musiraterije kiisanga; mira mugharushwe madunganyo enyu aghoshwe mashaa, nesa muidime kumanya chaidi kikundire chedi cha Mrungu chemwizihija, chekoloke.

Nzia yeve he viinkwa vya Kimpeho

³ Ambu he mbonea nevoneiwe nimvwira kila mntu wa henyu: Asidunganye vibaha kukela vuntu chemtara kudunganya; mira akete madunganyo a kiringanyo, sa vuntu Mrungu emghavie kila mntu kiringanyo cha mwitikijo.

⁴ Ambu sa vuntu he mwiri mmwe twena marungo majinki, neri marungo ose teeronga ndima mwe,

⁵ nirehuvo na uswi twevajinki, tu mwiri mmwe he Kristo, na marungo kila mmwe he mghenji wakwe.

⁶ Heicho kila twena viinkwa vyetekane, he kiringanyo cha mbonea tweinkiwe; kari ni vuroti, turote kiringanyo cha mwitikijo;

⁷ kari ni kuronga ndima ngwa, tuikae he kuronga ndima; mrecheja, he kucheja;

⁸ mrerunga, he kurunga; mwori, aore na ngoro yeelile; mreimukia, akudoke; mrevoneia, kwa kuizihirwa.

Mitongire ya Kikristo

⁹ Lukundo lusikete lung’ong’o; vihiwani kila e kivivi, muandakane na kila e chedi.

¹⁰ He lukundo lwa kindughu, mukundane unywi venye kwa venye; he shima, mwekivarongoja vaghenji;

¹¹ he kukudindia, si veleghele; mwekikudoka he ngoro jenyu, mwekimrongia Mfumwa ndima;

¹² he ikuji, mwekiizihirwa; he vwasi, mwekirimia; he kuomba, zikani;

¹³ he vila vyeendwa ni vezerire, muteishe kuora; he kughuhia vagheni, mukudindije.

¹⁴ Vainkeni lutelwedi vala vemurieriesha; inkijani lutelwedi, neri musirare.

¹⁵ Izihirwani hamwe na vala veizihirwa; iani hamwe na vala veia.

¹⁶ Mugwie hamwe he madunganyo enyu unywi venye na venye. Musirekere vibaha, mira mukunde kubinushwa ni vila visoka. Musikuvone venye iti mwechee.

¹⁷ Musimrihe mntu kivivi kwa kivivi. Ringanyani vila e vyedi mozya he vantu vose.

¹⁸ Chekive, he mondo wa henyu, mukete mporere na vantu vose.

¹⁹ Vakunde, musichwe sire, mira tesyani oro ya Mrungu, ambu heandikwe: “Sire ni yangu, nimi nenechwa, nivwo vuntu Mfumwa eti.”

²⁰ Mira munzo wako esikie nza, munke chala; ena nkiru, munke chanwa; ambu wekiketa huvo, umvikia nkenengo he mtwi wakwe.

²¹ Usivotwe ni vuvivi, mira we vota vuvivi kwa vwedi.