VAROMA 11 - Chasu New Testament 1967

Kudawa kwa Israeli sikwo mginto

¹ Heicho nivwija: H’ii! Mrungu edaie mbari yakwe? Icho hai! Ambu mi nami ni Mwisraeli, mmwe wa lukolo lwakwe Abrahamu, mntu wa mbari yakwe Benyamini.

² Mrungu tedaie vantu vakwe, evamanyije too kuvoka. Kana temumanyije vuntu maandiko ngwa eteta he Elia? vuntu evasitake Vaisraeli mozya he Mrungu;

³ “Mfumwa, vavakoma varoti vako, vabaja meza jako ja mtaso, niremi du neshele, kangi nami veraenda kunikoma.”

⁴ Mira lila igharusho la Mrungu litize? “Nekushejijie vantu viku mfungate vesinamdunkutia Bali.”

⁵ Heicho nire huvo, hata igheri ili la iki hena veshele vesaghurwe he vuntu vwa mbonea.

⁶ Mira kakicha ni mbonea, si he vuntu vwa mirongire kangi, aho mbonea teyekioka mbonea kangi.

⁷ Ingeri cheikee ze? Kila Israeli ekienda tekivonie, na vala vesaghurwe vakakivona, mira vala vangi vakaghoshwa vakuji.

⁸ Sa vuntu cheandikwe: “Mrungu evainkie ngoro yya lughohe, nesa meso asivone, neri masikio asisikie, mhaka msi wa yoo.”

⁹ Davidi naye eti: “Meza yavo na ivaokie na mtegho, Na kintu cha kukwangwalija, na mariho hevo;

¹⁰ Meso avo agerwe kija nesa vasivone, Uinamiie mghongo wavo misi yose.”

¹¹ Heicho niti: H’ii! vetekwangwala nesa vagwe do? Icho hai! Mira he iteshanyo lavo, lukanio lwavafikia Vakiisanga, nesa vo venye vagerwe kiru.

¹² Iki kakicha iteshanyo lavo laoka vuzuri vwa si ii, na kuduika kwavo kwaoka vuzuri vwa Vakiisanga, h’ii! kukoloka kwavo tekuvecha mno?

Lukio he Vakiisanga; mfwanano wa kuguranywa

¹³ Mira niteta na unywi mwe Vakiisanga. Heicho, kila ne ntume wa vantu Vakiisanga, nikaza ndima yangu.

¹⁴ Hangi kive iti nivagere kiru, vala e vandughu vangu kimwiri, nakukija va kumwe vavo.

¹⁵ Ambu kakicha kutaghwa kwavo kweetie kukundanywa kwa si ii, iki kukundanywa kwavo kuneoka ni, kakicha si nkalamo nyuma ya kifwa?

¹⁶ Kangi, kakicha vila vya kuvoka vyezerire, nirehuvo na sima yose; na kakicha kikolo chezerire, nire huvo na matambi.

¹⁷ Ambu kakicha matambi angi echwiwe, nawe mzeituni wa sakeni ukaguranywa heo, ukaketa vumwe na kikolo cha mzeituni na kunora kwacho,

¹⁸ usikukazze he ala matambi; kakicha ra ukukaza, siwe wetikie kikolo mira kikolo nicho chekutikie we.

¹⁹ Mira we uneti: “Matambi ala echwiwe nesa nuguranywe ho.”

²⁰ Ni chedi, echwiwe kwa kusaitikija kwao, nawe weimuke he mwitikijo wako. Usikubae ra, mira foleka.

²¹ Ambu kakicha Mrungu tevoneie ala matambi a kimoghwa, neri we tekakuvoneie.

²² Rereha ra, vwedi vwa vukai vwa Mrungu; he vala vegwie, vukai, mira hewe, vwedi vwa Mrungu, wekiikaa he uvwo vwedi; kakicha sivwo, we nawe unerachwiwa huvo.

²³ Kangi hata vo, kakicha vekisaikaa he kusaitikija kwavo, veneguranywa; ambu Mrungu eidima kuvaguranya wa.

²⁴ Ambu, kakicha we wechwiwe na kuvushwa he mzeituni weki wa sakeni he kimoghwa, ukaguranywa hantu eseki ha kimoghwa, he mzeituni wedi; si kukela mno vala e va kimoghwa, kive kuguranywa he mizeituni eki wavo venye.

Kikundire cha Mrungu cha kukenjija ni kuvoneia vose

²⁵ Ambu vandughu, sienda mwekisamanya mpiso ii, nesa musikuvone iti mwechee; iti Vaisraeli kumwe veingiwe ni vukuji, mhaka kukoloka kwa Vakiisanga kufike.

²⁶ Huvo Vaisraeli vose venekia; sa vuntu cheandikwe: “Mkija eneza kufuma Sayuni; Enemtanya Yakobo na mabero akwe.

²⁷ Na iki nicho kiaghano changu navo, Nekinevavushija mabanu avo.”

²⁸ Heicho, he vuntu vwa Mburi Yedi veokie vanzo vuntu vwenyu; mira he vuntu vwa kula kusaghurwa, vaoka vakunde he vuntu vwa vaku vetu.

²⁹ Ambu viinkwa vya Mrungu tevina mganyo, kana mwitango wakwe.

³⁰ Ambu savuntu unywi uko kae mwekim’berire Mrungu, mira iki mwavoneiwa vuntu vwa kubera kwavo;

³¹ nire huvo, hata vo iki vabera, nesa kwa kuvoneiwa kwenyu, navo vavoneiwe.

³² Ambu Mrungu evageranye vose hamwe he kubera, nesa avavoneie vose.

³³ Avaa! Vubaha vwa vuzuri na kuigho na kumanya kwa Mrungu! Milaho yakwe teisakika, na nzia jakwe tejiveenda!

³⁴ Ambu ni ani emanyije madunganyo a Mfumwa? Kana ni ani e mnjama wakwe?

³⁵ Kana ni ani erongemunka kintu nesa naye anaihwe?

³⁶ Ambu vyose vifuma hakwe, viho he nzinya yakwe, kangi vihunduka hakwe. Ngazo ni yakwe kae na kae. Amen.