VAROMA 10 - Chasu New Testament 1967

¹ Vandughu, cho neendisha he ngoro yangu na he maombi angu nemwomba Mrungu, ni vuntu vwavo, iti vakijwe.

² Ambu nivatetia vuonwa iti vekudindia he Mrungu, mira si kwa icha.

³ Ambu kila vesimanyije kitea cha Mrungu, na veenda kukonesha kitea chavo venye, tevekuvikie he kutetiwa ni kitea cha Mrungu.

⁴ Ambu Kristo niye msirikijo wa viziomo, nesa ye emwitikija atarirwe kitea.

Kutarirwa kitea ni nzia shaa he vose

⁵ Ambu Mose ekiandike mburi ya kitea chefuma he viziomo, iti, “Mntu eronga icho enekalama he vuntu vwacho.”

⁶ Mira kila kitea chevonekia he mwitikijo, kiti huvu, “Usitete he ngoro yako, ‘Ni ani enekwea uko wanga?’ (nikwo kuti kumwete Kristo aha si),

⁷ kana, ‘Ni ani enesea uko he nkoma?’ (nikwo kuti kumkweja Kristo wanga kufuma he vefwie).”

⁸ Mira, eti ze? Kila kiteto kiho hafuhi nawe, he momo wako na he ngoro yako; iti, ni kila kiteto cha mwitikijo twebirikira.

⁹ Ambu wekimzumira Mrungu na momo wako na kufunyirija iti Yesu ni Mfumwa, kangi wekiitikija he ngoro yako iti Mrungu emvushije he vefwie, niho wenekia.

¹⁰ Ambu kwa ngoro mntu eitikija na kuvona kitea; na he momo ezumira na kuvona lukio.

¹¹ Ambu iandiko liti: “Kila emwitikija tekasonike.”

¹² Ambu Myuda na Mgiriki tevetekane; ambu ye uo ni Mfumwa wa vose, ni mzuri wa vose vala vemwiaghia;

¹³ ambu, Kila eneitangwa izina la Mfumwa, enekia.

¹⁴ Ingeri venemlanga ze ula vesimwitikije? Kangi, venemwitikija ze ula vesinamsikia? Kangi vamsikie ze hesina m’birikiji?

¹⁵ Kangi veneidima ze kubirikira vesitumiwe? Sa vuntu cheandikwe: “Ni edi sani maghu a val vebirikira mburi ya vyedi!”

¹⁶ Mira si vose vezumira mburi yedi. Ambu Yesaya eti, “Mfumwa, ni ani eitikije mburi jetu?”

¹⁷ Heicho mwitikijo uvokia he kusikia; kusikia nakwo kuetwe ni kiteto chakwe Kristo.

¹⁸ Mira niti, Kana vo tevesikie? Yee, vesikie, “Izii lavo lagisha he masanga ose, Na viteto vyavo mhaka mginto wa masanga.”

¹⁹ Mira niti: Kana Vaisraeli tevetwarije? Kuvoka Mose eti: “Ninevagera kiru kwa vantu eseyo mbari, Ninevakweja oro kwa mbari yesitwarija.”

²⁰ Yesaya ena uguguti m’baha, eti: “Nevoniwe ni vala vesekinienda, Nefumirire he vala vesekinivwija.”

²¹ Mira he Vaisraeli eti, “Nevarongiie mikono msi di vantu vesisikia na vatiri.”