VAROMA 1 - Chasu New Testament 1967

Ngezya

¹ Paulo mzoro wakwe Yesu Kristo, eitangwe kuoka ntuma, esaghurwe kubirikira Mburi Yedi ya Mrungu.

² Eyo Mrungu ekenjije kuivikia kiariro he momo wa varoti vakwe he maandiko ezerire,

³ eyo mburi ya Mwana wakwe, emoghiwe kimwiri he lukolo lwakwe Davidi;

⁴ na kufunyirijwa kwa nzia ya Mpeho wa kuzera, he kuvuka he vefwie, Yesu Kristo Mfumwa wetu;

⁵ eye heye tweghuhie mbonea na vuntume, nesa vaisanga vose vaidime kukuduisha he mwitikijo, he vuntu vwa izina lakwe.

⁶ Evo hevo na unywi mwaoka veitangwe kuoka vakwe Yesu Kristo.

⁷ He vose veho uko Roma vekundiwe ni Mrungu, veitangwe kuoka vezerire. Mbonea na iikae na unywi na mporere kufuma he Mrungu Vava wetu na he Mfumwa Yesu Kristo.

Paulo erekera kukusha Roma

⁸ Kuvora nimwanjela Mrungu wangu he Yesu Kristo he vuntu vwenyu vose, kwa kuti mwitikijo wenyu ubirikirwa he si jose.

⁹ Ambu Mrungu eye nemtasa he ngoro yangu he Mburi Yedi ya Mwana wakwe, ni mwonwa wangu vuntu nemlanga he maombi angu chesihakana,

¹⁰ misi yose he maombi angu nisemba iti, Mrungu ekikunda kunirongajija ntambo yangu, nize henyu.

¹¹ Ambu nina kwana mno kumuvona, nesa niidime kumuinka viinkwa vya kimpeho, nesa vimudindije;

¹² iti tutujane mi na unywi, kila mntu he mwitikijo wa mghenji wakwe, wenyu na wangu.

¹³ Mira vandughu vangu, sienda mwekisamanya, iti kantu kajinki neendie kuza henyu, nesa nigere ntunda he unywi sa he Vakiisanga vangi, nikakindwa mhaka iki.

¹⁴ Niavwa ni Vagriki na vala esi Vagriki, niavwa ni vakiugho na vala vesina viugho.

¹⁵ Heicho, mi mwenye nekuringanye kubirikira Mburi Yedi hata henyu, unywi mwetue Roma.

Kifumo cha Mburi Yedi

¹⁶ Ambu siisikiwa soni Mburi ngwa Yedi, ambu ni nzinya ya Mrungu yeete lukio he kila mntu eitikija, kuvoka Myuda hata Mgriki naye.

¹⁷ Ambu singisirya ya Mrungu ifunukurwa heyo, kufuma mwitikijo mhaka mwitikijo, sa vuntu eheandikwe: “Iki mwenye singisirya kwa mwitikijo enekalama.”

Vuvivi vwa Vakiisanga

¹⁸ Ambu oro ya Mrungu yafunukurwa kufuma uko wanga, vuntu vwa lubero lwose na vuvivi vwa vantu vekinda idi na vuvivi vwavo.

¹⁹ Ambu vila vya Mrungu vyemanyike vyafunyirijwa boo hevo, ambu Mrungu evafwinyirijije.

²⁰ Ambu vintu vila vyakwe vyesivoneke too kurumbwa kwa masanga, vyavoneka, ambu vimanyikia he vila vyerumbiwe; ejo nzinya jakwe ja kae na kae na Kimrungu chakwe; nesa vasivone cha kukukaniia;

²¹ ambu nziaho vekimmanyije Mrungu, tevemkazie sa Mrungu neri kumvikia mvera; mira vakateka he mburi ya misimo yavo, na ngoro javo jerundie jikagerwa kija.

²² Vekikuvona iti ni venye kiugho vakarunda;

²³ vakakoranya ngazo ya Mrungu esikondika, vakaifwanyanya na fwani ya mntu ekondika, na ya madeghe, na ya nyama ja maghu mane, na ya nyama jebulutika.

²⁴ Icho nicho cheshighie Mrungu ekivashigha he tama ja ngoro javo, iti varatere maikwe, na kukondiana shima ya miri yavo.

²⁵ Ambu vekoranye kweri ya Mrungu na kuighosha mongo, vakakodekia kila cherumbiwe na kukitasa hantu ha Mrerumba ekazwa kae na kae. Amen.

²⁶ Heicho Mrungu akavavokeja varatere tama javo ja soni, na vache vakakoranya msimo wa kimoghwa na msimo esi wa kimoghwa;

²⁷ vome navo vakashigha msimo wa mche wa kimoghwa, vakamotokiana, vome vakahira vyesitara, vakavona he mihiro yavo mahiri a kuteka kwavo evetara.

²⁸ Na sa vuntu vesuie kuanga na Mrungu he kutwarija kwavo, Mrungu akavashigha varatere macha avo esire, varonge vyesitara.

²⁹ Veizuwe ni malwiso a kila mbare, vuvivi, na kiherehere kivivi, veizue kusu, na vuko, i, na marenge, na kukenga; vantu va madunganyo mavivi, valuteta,

³⁰ varechungija, vemvihiwa Mrungu, vatiri, vekukweja na kukubaa, varevokija vivivi, vesivasikia vamoghi,

³¹ vesitwarija kintu, varekonda viaghano, vesikunda vandughu vavo, vesina mbonea;

³² nziaho vemanyije haiwa milaho ya Mrungu, iti veronga huvo kivatara kufwa, verraketa ivyo; neri si huvo du, mira vesikijanya na vala vevironga.