VAFILIPI 4 - Chasu New Testament 1967

Machundwe

¹ Heicho, vandughu vangu vakunde, nimusikiwa nkwina, ni unywi kuirihirwa kwangu na ngoki yangu; imukani ndi vakunde vangu he Mfumwa.

² Nimsemba Eudia, nimsemba ne Sintike, vakete madunganyo mamwe he Mfumwa.

³ Yee, nikusemba hata we mzoro mghenji wa idi, uvughenje avo vache; ambu veomanie Mburi Yedi hamwe nami, ne Klementi, na vala vangi verongie ndima hamwe nami, evo mazina avo eho he kitabu cha nkalamo.

⁴ Izihirwani he Mfumwa misi yose; kangi nimuti: Izihirwani.

⁵ Vuhoo vwenyu vumanyike he vantu vose Mfumwa eho hafuhi.

⁶ Musikubinushe he mburi yoyose, mira mburi jenyu jose jimanyike he Mrungu kwa kutasa na kuomba, hamwe na kuanjela.

⁷ Na mporere ya Mrungu yevecha macha ose inemurinda ngoro jenyu na madunganyo enyu he Kristo Yesu.

⁸ Cheshele, vandughu, vyose e vya idi, vyose e vya shima, vyose e vya kitea, vyose e vyedi, vyose vyeizihija, vyose e vya nguma yedi; na hena vwedi vwose, hena nguma yedi yoyose, vidunganyeni ivyo.

⁹ Vyose mwekuchejije hemi na kuvighuhia, na kuvisikia na kuvivonia hemi, viketeni ivyo; na Mrungu wa mporere eneikaa hamwe na unywi.

Kuanjela kwakwe Paulo vuntu vwa mbonea ya Vafilipi

¹⁰ Neizihirwe mno he Mfumwa, iti, iki he igheri ili lakenjija, madunganyo enyu a kuniondia avoneka wa, sa vuntu mwekiniganyija; mira kikahera.

¹¹ Siteta huvo iti henacho neenda; ambu nekuchejije kutisha he miikarire yo yose nena nayo.

¹² Nemanyije kuduishwa, kangi nemanyije kulozokiwa; he vyovyose na he vintu vyose, nechejijwe kuighuta na kusikia nza, kuketa vijinki na kuduikiwa.

¹³ Niidima vintu vyose he ula enigera nzinya.

¹⁴ Mira mwerongie chedi aho mwekiketa sanga he vwasi vwangu.

¹⁵ Na unywi venye, Vafilipi, mwemanyije he kuvoka kwa Mburi Yedi nekifuma Makedonia, tehena kanisa lingi leketie sanga nami he kuinkija na kughuha, esire unywi du.

¹⁶ Ambu hata Tesalonike mwenietie lughennjo he vila nevienda, ka kuvoka na ka keri.

¹⁷ Si iti nienda icho kiinkwa, mira cho neenda ni ntunda jeneongejika he itaro lenyu.

¹⁸ Mira nina vintu vyose na kukela, kangi naizua pacha, nikanaghuhie he mkono wakwe Epafradito vila vyefumie henyu, ni pupunte yedi, ni itasi lekundike, lemwizihija Mrungu.

¹⁹ Na Mrungu wangu enemuneshija kila mwekienda he kiringanyo cha vuzuri vwakwe, he ngazo yeho he Kristo Yesu.

²⁰ Iki Mrungu eye Vava wetu nakazwe, kae na kae, Amen.

Kuaghanya

²¹ Munikezijije vezerire vose he Kristo Yesu. Vandughu veho hamwe nami vemukezya.

²² Vezerire vose vemukezya, kuvecha ni vala veho he nyumba yakwe Kaisari.

²³ Mbonea ya Mfumwa Yesu Kristo naiikae hamwe na mpeho wenyu.