VAFILIPI 3 - Chasu New Testament 1967

Lumazo ludori he vintu vya kimwiri

¹ Cheshele, vandughu vangu, izihirwani he Mfumwa. Kumuandikia mburi jila mi tekunifikija, mira munemuveia unywi.

² Kucheieni he maguro, kucheieni he vala veketa vivivi, kucheieni he vala vekuchwa.

³ Ambu uswi tu venye kitavani, twemtasa Mrungu he Mpeho, na kukukaza he Kristo Yesu, neri tetuarira mwiri.

⁴ Mira mi nekiidima kuarira mwiri. Kakicha hena mntu edunganya iti ena cha kuarira mwiri, mi nekelile.

⁵ Nekitavanwe msi wa kanane, mi ni mntu wa mbari ya Israeli, wa lukolo lwakwe Benyamini, Mwebrania wa Vaebrania, he kugurisha myomongwa, mi ni Mfarisayo,

⁶ he kukudindija, mrarisha kanisa vwasi, he kitea chevonekia he viziomo, sekina nzune.

Ikuji lakwe Paulo kuketa vumwe ne Kristo

⁷ Mira vila vyekiniokie lumazo, he vuntu vwakwe Kristo nevitarire iti ni lutesho.

⁸ Yee, kuvecha ivyo, nitara vintu vyose ni lutesho, he vuntu vwa vwedi vwesina kiringanyo, vwa kummanya Kristo Yesu, Mfumwa wangu; eye he vuntu vwakwe neteshije vintu vyose, nekivitara iti ni sa mkuku, nesa nimmaze Kristo;

⁹ kangi nivoneke hena ye, nisikete kitea changu mwenye chevonekia he viziomo, mira kila chevonekia he mwitikijo weho he Kristo; kitea kila chefuma he Mrungu, kwa mwitikijo;

¹⁰ nesa nimmanye ye na nzinya ya kuvuka kwakwe he vefwie, na sanga yya mavwasi akwe, nekifwanana naye he kifwa chakwe;

¹¹ nesa kari kive niidime kufikia kuvuka he vefwie.

¹² Si iti nakenja kufika, kana iti nakenja kukoloka; hai! mira nisara, nesa niidime kugura kila echo cheshighie nekigurwa ni Kristo Yesu.

¹³ Vandughu, sikudunganya mi mwenye iti nakenja kugura; mira nironga kintu kimwe du; nekiivaa vila vyeho nyuma, nekijotia vila vyeho mozya;

¹⁴ nisara nifikie mginto wa kitumulilo cha mwitango m’baha wa Mrungu he Kristo Yesu.

¹⁵ Heicho uswi twekoloke natudunganye ivyo; neri na mukatedunganya vingi, Mrungu enemufunukurira hata icho.

¹⁶ Mira aho hantu twehafikie, natutongie aho aho.

Mfwanano wakwe Paulo uraterijwe

¹⁷ Vandughu, okani varateri vangu, varereheni vala vetongia he kuratera fwanyanyi twemuinkie unywi.

Vanzo va msalaba wakwe Kristo

¹⁸ Ambu vajinki veanga, evo nemuvwirire kantu kajinki mburi javo, na iki nimuvwirire kwa masoji, iti ni vanzo va msalaba wakwe Kristo;

¹⁹ mginto wavo kukondika, mrungu wavo ni ndeni, vekukaza na vintu vya soni, vedunganya vya kiisanga.

²⁰ Ambu uswi kaa yetu iho uko wanga. kufuma uko tumwinda Mkija, Mfumwa Yesu Kristo;

²¹ eye enegharusha mwiri wetu wa vusoka, uveiwe kufwanana na mwiri wakwe wa ngazo, he nzinya ila eyo eveiwa kuzima vintu vyose vimsikie.