VAFILIPI 2 - Chasu New Testament 1967

Esemba hakete vumwe; he mburi ya kukuduisha

¹ Heicho, kakicha hena kutujwa he Kristo, kakicha hena luhembo lwa lukundo, kakicha hena vumwe vwa Mpeho, kakicha hena mbonea na mbazi,

² izujani kuizihirwa kwangu, nesa mukete madunganyo mamwe, vena mikundire mimwe, vena mpeho mwe, mwekigwia hamwe.

³ Misironge kintu chochose kwa kukanana, neri kwa kukubaa; esire he kukuduisha, kila mntu namtare mghenji iti ni wedi kumvecha.

⁴ Kila mntu asirerehe vyakwe mwenye, mira kila mntu arerehe vya vaghenji.

Mfwanano wakwe Yesu he kukuduisha na kukuinkija

⁵ Ketani madunganyo ao ao he unywi, eo ekireho he Kristo Yesu;

⁶ eye aho kuvoka ekina fwanyanyi ya Mrungu, naye tevonie iti kula kufwanana na Mrungu ni kintu cha kukuguranya nacho;

⁷ mira akakuosha iti tena ngazo, akaghuha fwanyanyi ya mzoro, akaketa fwani ya vantu;

⁸ kangi, ekinavoneke iti ena fwani sa ya mntu, akakuduisha, akaoka mresikia mhaka kufwa, yee, kifwa cha he msalaba.

⁹ Heicho Mrungu akamghibika mno, akamunka izina levechije mazina ose;

¹⁰ nesa he izina lakwe Yesu, kila ikunkuro lidunkute, la vintu vya uko wanga, na vya he masanga, na vya si ya masanga;

¹¹ na kila lumi luzumire iti YESU KRISTO NI MFUMWA, he ngazo ya Mrungu Vava.

Lukio luvonekie he miikarire

¹² Heicho vakunde vangu, sa vuntu mweokie varesikia misi yose, si igheri mi newaho du, mira iki muzike haiwa na ere aho mi nesiwaho, koloshani lukio lwenyu venye he kufoleka na kuzingiza.

¹³ Ambu Mrungu niye eronga ndima he unywi, kuenda na kwenyu na kuronga kwenyu he kukolosha kila chedi ye erekere.

¹⁴ Rongani vintu vyose hesina kudengereta kana nkani,

¹⁵ nesa muidime kuoka vana va Mrungu vesina cho veshaghwa, neri kuisha, vesina idamaro ghati he lukolo lwena tiri, lwehotoke, hevo unywi muvoneka sa vianga he ii si,

¹⁶ mwekigurisha kiteto cha nkalamo, nesa nivone kiusho cha kukukazia ula msi wakwe Kristo, iti sirekudundikira sutwa, neri sikurishije vwasi sutwa.

¹⁷ Yee, neri nekikufutwa wanga he itasi na mtaso wa mwitikijo wenyu, niizihirwa; kangi niizihirwa hamwe na unywi vose.

¹⁸ Na unywi nirehuvo, izihirwani, kangi izihirwani hamwe nami.

Timoteo

¹⁹ Mira niarira he Mfumwa Yesu kumtuma Timoteo amangeza henyu, nesa nami nitundanywe nekimanya vuntu mweikee.

²⁰ Ambu sina mntu ungi ena madunganyo mamwe nami eveiwa kurereha mburi jenyu nezosha.

²¹ Ambu vose veenda vyavo venye, si vila vyakwe Kristo Yesu.

²² Esire iti mwemanyije nguma yakwe, iti eherire hantu hamwe nami he vuntu vwa Mburi Yedi, sa mwana na vavee.

²³ Heicho, niarira kumtuma uo hala indi, aho nekinemanya vuntu mburi yangu yeneoka.

²⁴ Nami niitikija he Mfumwa iti nami mwenye nineza iki hafuhi.

Epafradito

²⁵ Mira navona iti, kinitara kumtuma Epafradito henyu, mndughu wangu, mndima mghenji, msikari mghenji; kangi ni ntume wenyu na mndima wa vila nevienda.

²⁶ Ambu ekina nkwina na unywi vose, akasikia vukiva haiwa, kila mwekisikie iti ekiwaa.

²⁷ Ambu cha kididi ekiwaisha, hafuhi na kufwa; mira Mrungu akamvoneia; neri siye mwenye, mira hata mi; nisirevona vukiva wanga he vukiva.

²⁸ Heicho nikakudoka haiwa kumtuma, nesa muizihirwe mwekinemvona wa, nami niduishijwe vukiva vwangu.

²⁹ Mghuhieni ra, he Mfumwa, na kuizihirwa kwose, kangi muvatare vantu veikee saye iti ni vareshimiwa.

³⁰ Ambu ekizengelele kufwa he vuntu vwa ndima yakwe Kristo, ekigera ngoro yakwe he mpwasi; nesa akoloshe vila mweimije kuniharehia.