VAFILIPI 1 - Chasu New Testament 1967

Ngezya

¹ Paulo ne Timoteo vazoro vakwe Kristo Yesu, Ha vezerire vose he Kristo Yesu veho Filipi, hamwe na Vaaskofu na Vachungi.

² Mbonea na iikae na unywi na mporere kufuma he Mrungu Vava wetu na he Mfumwa Yesu Kristo.

Kuanjela na kuizihirwa kwakwe Paulo

³ Nimwanjela Mrungu wangu genda nekimukumbuka,

⁴ misi yose nimukumbuka, nekimuombia unywi vose na kuizihirwa he mitaso yangu,

⁵ he vuntu vwa vumwe vwenyu he kutonja Mburi Yedi, kuvokia msi ula wa kuvoka mhaka yoo ili.

⁶ Nami cho neitikija ni iki, iti Ye evokie ndima yedi he ngoro jenyu, eneikolosha mhaka msi wakwe Kristo Yesu;

⁷ sa vuntu chenitara kuririkana ivi he unywi vose; kila unywi mweho he ngoro yangu; ambu he kuchungwa kwangu na he ndima ya kulwania Mburi Yedi na kuikonesha, unywi vose mweketie sanga nami he ii mbonea.

⁸ Ambu Mrungu ni muonwa wangu, vuntu nemusikia nkwina unywi vose he ngoro yakwe Kristo Yesu.

Evaombia varasoma vakwe

⁹ Na uu niwo mtaso wangu, iti lukundo lwenyu luzike kuoka lujinki haiwa, he viugho na he kumanya kwose;

¹⁰ muveiwe kukunda vila e vyedi, nesa mukete ngoro jedi, mwesiteshanya, mhaka msi wakwe Kristo;

¹¹ uko mweizujwe ntunda ja kitea he nzia yakwe Yesu Kristo, he ngazo na nguma ya Mrungu.

Chefuma he kichungo chakwe

¹² Mira vandughu, nienda mumanye iti mburi jose jeniziie, kukela jevonekie he kutonja Mburi Yedi;

¹³ ambu na ere aha kitala hose na he vantu vangi, chavoneka boo iti vichungo vyangu ni he Kristo.

¹⁴ Kangi vajinki he avo vandughu veho he Mfumwa vekizikadinda he vuntu vwa kuchungwa kwangu, vakazika kutetisha kiteto cha Mrungu vesina fole.

¹⁵ Vangi vebirikira mburi yakwe Kristo kwa kusu na kilinganya; na vangi kwa kurekera kwedi.

¹⁶ Ava vem’birikira kwa lukundo, vekimanya iti nevikiwe nilwanie Mburi Yedi;

¹⁷ mira vangi vem’birikira Kristo kwa kilinganya, neri si kwa ngoro yeelile, vekirekera kuongeja mavwasi a kuchungwa kwangu.

¹⁸ Kikonga ni? mira he nzia jose, kakicha ni he vyavya, kana kakicha ni he idi, Kristo ebirikirwa; heicho niizihirwa, yee, mi nineizihirwa.

¹⁹ Ambu nemanyije iti, ivi vinenigharukia kuoka lukio lwangu, he vuntu vwa kutasa kwenyu na kuorwa Mpeho wakwe Yesu Kristo;

²⁰ sa vuntu nekiarire mno na kuvika ikuji, iti sisonike neri, mira he kudinda kwose, sa misi yose, na iki nirehuvo, Kristo enetogolwa he mwiri wangu; kakicha niho moo, kana kakicha niho he kifwa.

Kuikaa na moo na kufwa chedi nini?

²¹ Ambu hemi nkalamo ni Kristo, na kufwa ni lumazo.

²² Mira kakicha hemi, kukalama he mwiri nicho ntunda ya ndima; heicho, cho nesaghura sikimanyije.

²³ Nisisimwa ni vintu viri; nina nkwina kutonga nireikaa ne Kristo, ambu ni chedisha;

²⁴ mira kuikaa he mwiri kuendishwa mno vuntu vwenyu.

²⁵ Nami nekiarira ivyo, nemanyije iti nineteisha kuikaa hamwe na unywi vose, nesa muidime kuzikavecha, na kuizihirwa he mwitikijo;

²⁶ nesa muzikevona vwedi he Kristo Yesu, hemi, vuntu vwa kuikaa wa kwangu hamwe na unywi.

Machundwe a kukudoka

²⁷ Mira mitongire yenyu ioke sa vuntu chetara Mburi Yedi yakwe Kristo, nesa nekiza na kumuvona unywi, kana nesiwaho, nisikie mburi jenyu, iti muimuka na ndekero he mpeho mwe, kwa ngoro mwe mwekiomania mwitikijo wa Mburi Yedi;

²⁸ neri temuvafoleka vanzo venyu he mburi yoyose; hevo ni luvengo lwekoloke lwa kuteka, mira henyu unywi ni luvengo lwa lukio, ulwo lwefuma ha Mrungu.

²⁹ Ambu mweinkiwe he vuntu vwakwe Kristo, si kumwitikija du, mira na he kurishwa vwasi vuntu vwakwe; mwekiketa mavoo ala ala mweavonie hemi, na husikia iti nirena nao na iki.