VAEFESO 6 - Chasu New Testament 1967

¹ Unywi vana, vasikieni vamoghi venyu he Mfumwa, ambu icho nicho chetara.

² Vavikie vaveo na mlala wenyu shima; iamoro ili nilo iamoro la kuvoka lena kiravo:

³ Uvone vwedi, uikae misi mingi he isanga.

⁴ Na unywi vavava, musivaendereje vana venyu; mira varereni kwa shima na machundwe a Mfumwa.

⁵ Unywi vazoro, vasikieni vala e vazima venyu he kimwiri, kwa fole na kuzingiza, na kwa ngoro yerongeke, sa mwetamsikia Kristo;

⁶ neri si kwa vuzoro vwa meso du sa varekuizihija he vantu, mira sa vazoro vakwe Kristo, mwekironga vyemwizihira Mrungu kwa ngoro;

⁷ kwa ngoro yedi sa kumhirira Mfumwa neri si vantu;

⁸ manyani iti kila kintu chedi mntu eronga, nirecho enerakiinkwa ni Mfumwa, kakicha ni mzoro kana ni nkombolwa.

⁹ Na unywi vazuri, vaketieni navo huvo huvo, mwekishigha kuvafolesha, kangi manyani iti, ye e Mfumwa wavo na wenyu eho uko wanga, neri heye tehena sombo.

Mata a Kikristo

¹⁰ Cha msirikijo, zikani kudinda he Mfumwa na he vubaha vwa nzinya yakwe.

¹¹ Dokani mavuta ose a Mrungu, muidime kukinda viavya vyakwe Shetani.

¹² Ambu ivoo letu si la kuomana na sakame na mwiri; mira ni na vifumwa na nzinya, na vabaha va kija iki, na irivati la nkondo ya mpeho mbivi jeho he wanga ii.

¹³ Heicho ghuhani mavuta ose a Mrungu, muidime kuomana he msi wa vuvivi, na mwekikenja kukolosha vyose, kuimuka.

¹⁴ Heicho imukani, mwedokie idi he vikwidi, na kudoka he mpafu kibao cha kighera cha kitea;

¹⁵ na kuchungiwa he maghu vila vyeringanywe, twevivonia he Mburi Yedi ya mporere;

¹⁶ chevecha vyose ghuhani ngao ya mwitikijo, eyo heyo mweneidima kujimija mivwi yose yena moto ya ulaa mvivi.

¹⁷ Kangi ghuhani chepeo ya lukio, na mhandwi wa Mpeho ewo kiteto cha Mrungu;

¹⁸ he mitaso yose na maombi, mwekiomba kila igheri kwa Mpeho, mwekiyaa kyavi kwa mburi iyo, na kuzika kuombia vezerire vose;

¹⁹ hata he vuntu vwangu mi, niinkwe kuteta he kuchungua momo wangu, nesa nibirikire kwa ndereko ila mpiso ya Mburi Yedi;

²⁰ eyo he vuntu vwayo mi ne mmondo he minyororo; mhaka nivone ndekero heyo, kuteta vuntu chenitara kuteta.

Msirikijo (Kol. 4:7-8)

²¹ Heicho, na unywi nesa mumanye mburi jangu vuntu jeikee, Tikiko, mndughu mkunde, e mndima erinda kitengo he Mfumwa, enemimanyisha mburi jose;

²² eye nemtuma henyu he iyo mburi, nesa muidime kumanya mburi jetu, naye amutuje ngoro jenyu.

²³ Mporere na iikae he vandughu, na lukundo, hamwe na mwitikijo, vyefuma he Mrungu Vava na he Mfumwa Yesu Kristo.

²⁴ Mbonea na iikae hamwe na vose vemkunda Mfumwa wetu Yesu Kristo, he miikarire yesikondika.