VAEFESO 5 - Chasu New Testament 1967

¹ Huvo, okani varateri va Mrungu sa vana vakunde;

² mutongenihe lukundo, sa vuntu Kristo naye emukundie unywi; kangi akakuinkija ye mwenye vuntu vwetu, kuoka itasi na mtaso he Mrungu, wena mpungo yedi.

³ Mira kushinda na ihani na tama, visitetwe henyu neri, sa vuntu chevatara vezerire;

⁴ neri soni, neri viteto vya vurundu neri nkani, ivyo teviizihira; esire kutogola.

⁵ Ambu mburi ii mweimanyije nezo, iti tehena mrashinda neri mhani neri mwenye tama, eye mratasa mirungu, ena vupali he vufumwa vwakwe Kristo na Mrungu.

⁶ Mntuasimuishe na viteto vya sutwa; ambu he vuntu vwa ivyo, oro ya Mrungu ivazia vana na lubero.

⁷ Heicho, musikete sanga navo.

⁸ Ambu unywi aho kae mweki kija, mira iki mwaoka kianga he Mfumwa; tongani sa vana va kianga;

⁹ ambu ntunda ja kianga ni vwedi vwose, na kitea na idi;

¹⁰ mwekikonesha iti ni kini chemwizihija Mfumwa.

¹¹ Neri musikete sanga na mihiro ya kija yesimogha, mira muibohije;

¹² ambu ivyo vyeketika hevo kwa mpiso, ni soni hata kuviteta.

¹³ Mira vyose vyebohijwe vibunkulwa ni kianga, ambu kila chebunkuke ni kianga.

¹⁴ Heicho eti: “Avija, we wechunda, Uvuke he vefwie, Ne Kristo enekuangaja.”

¹⁵ Heicho, rerehishani vuntu mwetonga; si sa vantu vesina kiugho, mira sa vantu vena kiugho;

¹⁶ mwekimanya igheri, ambu misi ii ni mivivi.

¹⁷ Heicho, musirunde, mira mutwarije iti kikundire cha Mfumwa nini.

¹⁸ Kangi musiengee mawa, kila heo hena vubanu, mira muizujwe Mpeho;

¹⁹ mwekigaiana kwa mazumo na nyazi na nyimbo ja kimpeho, kangi mwekiimba na kumng’arira Mfumwa he ngoro jenyu;

²⁰ na kumwanjela Mrungu Vava misi yose he vintu vyose, he izina la Mfumwa wetu Yesu Kristo;

²¹ mwekisikijanya he kumfoleka Kristo.

Miikarire ya vandughu va Kikristo

²² Unywi vache, sikiani vome venyu sa kumsikia Mfumwa.

²³ Ambu mme ni mtwi wa mche, sa vuntu Kristo naye e mtwi wa kanisa; naye ni mkija wa mwiri.

²⁴ Mira sa vuntu kanisa yemsikia Kristo, nirehuvo, vache navo vavasikie vome vavo he kila kintu.

²⁵ Unywi vome, kundani vache venyu, sa vuntu Kristo naye ekundie kanisa, akakuinkija vuntu vwayo;

²⁶ nesa aizerije na kuioja kwa mpombe he kiteto;

²⁷ nesa akuetie kanisa yedisha yesina idamaro neri ikwinzo, na chochose sa ivyo; mira ioke yezerire yesina madamaro.

²⁸ Nirehuvo, kivatara vome navo kuvakunda vache vavo sa miri yavo venye. Ekunda mche wakwe ekukunda ye mwenye.

²⁹ Ambu narini tehena mntu edaa mwiri wakwe; mira eurera na kuusungajia sa vuntu Kristo naye eketia kanisa.

³⁰ Ambu tu marungo a mwiri wakwe.

³¹ Heicho, mntu enemshigha vavee na mlala wavo, enegurana na mche wakwe, na avo veri veneoka mwiri mmwe.

³² Mpiso iyo ni mbaha; esire iti mi niteta mburi yakwe Kristo na kanisa.

³³ Mira kila mntu amkunde mche wakwe sa vuntu ekukundie ye mwenye; neri mche asishighe kinyenyembwe he mghosiwe.