VAEFESO 4 - Chasu New Testament 1967

Mwitaango wa Mrungu uenda vumwe

¹ Heicho nimusemba, mi ne mnkore he Mfumwa, mutonge sa vuntu chetara mwitango wenyu mweitangiwe;

² he kukuduisha kwose na vuhoo, he kugumirija mwekitikiana kwa lukundo;

³ na kukudindija kurinda vumwe vwa Mpeho he kichungo cha mporere.

⁴ Mwiri mmwe na Mpeho mmwe, sa vuntu mweitangwe he ikuji imwe la mwitango wenyu.

⁵ Mfumwa mmwe, mwitikijo mmwe, m’batizo mmwe.

⁶ Mrungu mmwe, naye ni Vava wa vose, eho wanga ya vyose, na he vyose, na ndeni he vyose.

⁷ Mira kila mmwe wetu einkiwe mbonea he kiringanyo cha ngero ya kiinkwa chakwe Kristo.

⁸ Heicho eti: “Ekinakwee uko wanga akataha mitahe, Akavainka vantu viinkwa.”

⁹ Huvo, icho kiteto: “Ekweie,” nikwo kuti ze, kakicha sikwo kuti iti, ye naye eseie mhaka myondo yeho si ya isanga?

¹⁰ Na ula eseie niye ekweie; wanga mno kuvecha wanga jose, nesa aviizuje vintu vyose.

¹¹ Naye evikie va kumwe kuoka ntume; na vangi kuoka varoti; na vangi kuoka vabirikiji, na vangi kuoka varisha na vacheji;

¹² nesa vezerire varinganywe, mhaka ndima ngwa ikoloke, mhaka wakwe Kristo ujengwe;

¹³ mhaka na uswi vose twekinefikia vumwe vwa mwitikijo na kumtwarija nezo Mwana wa Mrungu, mhaka kuoka mntu ekoloke, mhaka kufikia kiringanyo cha kueha chekoloke he Kristo;

¹⁴ nesa tusireoka kangi vujana vunyenke, twekiyunjwayunjwa, na kutikwa ni kila nkungu ya icha, he’kyavia cha vantu, kwa kuisha, twekiratera nzia ja kukengera.

¹⁵ Mira tutete idi he lukundo na kucha mhaka tumfikie ye eho he vyose, eye mtwi, Kristo.

¹⁶ He Ye mwiri wose wekizomanywa na kuguranywa he lughenjo lwa kila irungo, he kiringanyo cha ndima ya kila ifungu imwe imwe, eehija mwiri uidime kukujenga mjengo he lukundo.

Miikarire ya kae na mishaa

¹⁷ Heicho niteta kiteto iki, kangi, niteta vuonwa he Mfumwa, kuvokia iki, musitonge sa vuntu Vakiisanga vetonga, he vusoka vwa madunganyo avo;

¹⁸ evo macha avo egerirwe kija, navo vetanyijwe na nkalamo ya Mrungu, he mburi ya vurundu vweho ndeni hevo, vuntu vwa vukuji vwa ngoro javo;

¹⁹ evo vekikenja kufwa nkanju, vekugera he kumotoka, vaidime kuhirira mainkwe ose kwa mhelemeto.

²⁰ Mira unywi sivwo vuntu mwekuchejije Kristo;

²¹ kakicha mwemsikie mukachejwa heye, sa vuntu idi yeho he Yesu,

²² he miikarire yenyu ya kuvoka mukuhambue ula mntu wa kae, ekondika he kuratera tama jeisha.

²³ Mughoshwe vashaa he mpeho wa madunganyo enyu;

²⁴ mudoke mntu mshaa, erumbiwe kwa fwanyanyi ya Mrungu, hena kitea na kuzera kwa idi.

Mafundisho he miikarire ya kila msi

²⁵ Heicho kuhambueni mongo, mutete idi kila mntu na mghenji wakwe; ambu tu marungo, kila mmwe irungo la mghenji wakwe.

²⁶ Mukete oro, mira musikete mabanu; izuva lisirenyirika mwerena na mfundo;

²⁷ neri musimnke Shetani kapengere.

²⁸ Mkea asiive kangi; keba akudindije, ekironga ndima yedi kwa mikono yakwe mwenye, aidime kuketa kintu cha kumghavia msovu.

²⁹ Kiteto chochose e kivivi kisifume he momo wenyu, esire kila e chedi chemghenja ula eenda, kivainke mbonea vala vesikia.

³⁰ Neri musimvihije ula Mpeho Wedi wa Mrungu; eye heye mwegerirwe kisimbiko mhaka ula msi wa vukomboli.

³¹ Mifundo yose na oro na kuvihiwa na kilonzo na viraro vivuke he unywi, hamwe na kila vuvivi;

³² kangi ketani mbonea unywi venye na venye, venye mbazi, mwekishighiana sa vuntu Mrungu emushighiie unywi he Kristo.