VAEFESO 3 - Chasu New Testament 1967

Ndima yakwe Paulo ifunukura vimako vya Mrungu

¹ Heicho mi Paulo ni nkore wakwe Kristo Yesu vuntu vwenyu unywi Vakiisanga;

² kakicha mwesikie mburi ya uomboji wa mbonea ya Mrungu neinkiwe vuntu vwenyu;

³ iti nevonyeshwe mpiso iyo he kufunukirwa, sa vuntu nerongeandika viteto vighere.

⁴ Heicho, mwekivisoma, muidima kumanya mimanyije yangu he mpiso yakwe Kristo.

⁵ Mpiso iyo teimanyishwe vantu he marika angi; sa vuntu ntume vakwe vezerire na varoti vefunukurirwe misi ii ni Mpeho;

⁶ iti Vakiisanga ni vapali hamwe na uswi va vupali vumwe, na va mwiri mmwe, na va sanga hamwe na uswi va kiravo chakwe cheho he Kristo Yesu he nzia ya Mburi Yedi;

⁷ Mburi Yedi eyo neghoshijwe mndima wayo, he kiringanyo cha kiinkwa cha mbonea ya Mrungu neinkiwe he mirongire ya nzinya jakwe.

⁸ Mi ne mdori kuvecha ye e mdori wa vezerire vose, neinkiwe ii mbonea ya kubirikira Vakiisanga vuzuri vwakwe Kristo vwesina mginto;

⁹ na kuvaangaja vantu vose vamanye miidimire ya iyo mpiso, eyo too kae hose yekivisike he Mrungu erumbie vintu vyose;

¹⁰ nesa iki he nzia ya kanisa, kiugho cha Mrungu cha mbare nyingi kimanyike he vifumwa na nzinya uko wanga;

¹¹ he kiringanyo cha mrekero wakwe wa too kae, ekirekere he Kristo Yesu Mfumwa wetu.

¹² Heye tuna ndekero na nzinya kuzengelelia ikuji, kwa nzia ya kumwitikija.

¹³ Heicho nimusemba musileghele vuntu vwa mavwasi angu he vuntu vwenyu, ena ngazo henyu.

Iombi he kumanya Mburi Yedi

¹⁴ Heicho nimdunkutia Vava,

¹⁵ eye he izina lakwe vuvava vwose vwa uko wanga na vwa kunu si vweghuhiie izina,

¹⁶ he kiringanyo cha vuzuri vwa ngazo yakwe, amuinke kudindijwa kwa nzinya, he ndima ya Mpeho wakwe, he mntu wa uko ndeni.

¹⁷ Kristo aikae he ngoro jenyu he mwitikijo, mwekiketa miji na msingi he lukundo;

¹⁸ nesa hamwe na vezerire vose muidime kumanya vuntu e luaramu, na vueza na kueha na kusea;

¹⁹ na kumanya lukundo lwakwe Kristo, lwevecha kutwarija he vuntu e lujinki, muidime kukoloka he mikolokire yose ya Mrungu.

²⁰ Heicho, nakazwe ye eidima kuronga vya kimako mno kuvecha vyose vila tweomba, kana twevidunganya, he kiringanyo cha nzinya yeronga ndima he uswi;

²¹ yee, nakazwe he kanisa na he Kristo Yesu he marika ose kae na kae. Amen.