VAEFESO 2 - Chasu New Testament 1967

Lukio he mbonea ya Mrungu

¹ Na unywi emuvushije he vefwie, aho mwefwie vuntu vwa mateshanyo na mabanu enyu;

² oe kae mwekiangia heo he kuratera miikarire ya ki ili isanga, na he kumratera mfumwa wa nzinya ya ii wanga, mpeho ula eronga ndima iki he vana va lubero;

³ evo na uswi vose kae, twekitonjanya navo, hena tama ja miri yetu, twekiratera mikundire ya mwiri na madunganyo, tukaoka vana va oro he miikarire yetu sa avo vangi.

⁴ Mira Mrungu kila ena mbazi nyingi, he mikundire yakwe mibaha etukundie;

⁵ hata lila igheri twefwie vuntu vwa mateshanyo etu; akatukalamija hamwe ne Kristo; mwekijijwe kwa mbonea.

⁶ Akatuvusha he vefwie hamwe naye, akatuikaja hamwe naye uko wanga, he Kristo Yesu;

⁷ nesa igheri leneza afunyirije vuzuri vwa mbonea yakwe vwesina kiringanyo, he kutufwia mbazi he Kristo Yesu.

⁸ Ambu mwekijijwe kwa mbonea, he nzia ya mwitikijo; na icho tekifuma he unywi venye, ni kiinkwa cha Mrungu;

⁹ neri si he mihiro, hasireketa mntu wowose ekukaza.

¹⁰ Ambu tu ndima yakwe, twerumbiwe he Kristo Yesu, tukete mihiro yedi, eyo too kuvoka Mrungu eiringanye nesa tutongie heyo.

Vakiisanga na Vayuda veoka vamwe he Kanisa

¹¹ Heicho kumbukani iti, hala unywi mwe Vakiisanga he kimwiri, mwekiitangwa Vesitavanwe ni vala veitangwa Vakitavani, cherongiwe he mwiri kwa mikono;

¹² ambu aho kae temwekimna Kristo, mwetanie na mbari ya Israeli, vagheni vesina maaghano a kila kiravo. Temwekina ikuji, temuna Mrungu he ii si.

¹³ Mira iki, he Kristo Yesu, unywi mwekiho hae aho kuvoka, mwaetwe hafuhi ni sakame yakwe Kristo.

¹⁴ Ambu ye niye mporere yetu, etughoshije uswi vose twekiveri kuoka mmwe; akabaja vula vujigho vwa ghati vwekitutanyije.

¹⁵ Naye ekikenja kuvusha ila nzo kwa mwiri wakwe; niyo kiziomo cha maamoro cheho he maazero; nesa aghoshe avo veri kuoka mntu mshaa mmwe ndeni heye; akahareha mporere.

¹⁶ Akavakundanya vose veri na Mrungu he mwiri mmwe kwa nzia ya msalaba, ekikenja kukoma ila nzo kwa uo msalaba.

¹⁷ Akaza akabirikira mporere henyu unywi mwekiho hae, na mporere he vala veho hafuhi.

¹⁸ Ambu heye uswi vose twavona nzia ya kumfikia Vava he Mpeho mmwe.

¹⁹ Heicho, kuvokia iki unywi temuvagheni neri varavecha, mira unywi mu vakaa hamwe na vezerire, vantu va kaa hakwe Mrungu.

²⁰ Mwejengiwe he msingi wa ntume na varoti, ne Kristo Yesu ye mwenye ni ibwe ibaha la pembeni.

²¹ Heye ijengo lose liguranywa nezo na kueha mhaka lioke nyumba ya mtaso yezerire he Mfumwa.

²² Heye na unywi mwejengiwe hamwe kuoka kaa ya Mrungu he Mpeho.