VAEFESO 1 - Chasu New Testament 1967

Ngezya

¹ Paulo, ntume wakwe Kristo Yesu, he mikundire ya Mrungu, Ha vezerire veho uko Efeso vemwitikije Kristo Yesu:

² Mbonea na iikae na unywi na mporere kufuma he Mrungu Vava wetu na he Mfumwa Yesu Kristo.

Kumkaza Mrungu

³ Mrungu nakazwe, Vava wa Mfumwa wetu Yesu Kristo, etwinkie lutelwedi he kila lutelwedi lwa kimpeho, lwa kiuko wanga, he Kristo;

⁴ sa vuntu ye etusaghure tuoke vakwe too aho ii si yesinarumbwa, nesa tuoke vezerire, vantu vesina nzune mozya heye.

⁵ Kwa lukundo erongetusaghura, nesa tughoshwe vanawe he nzia yakwe Yesu Kristo, yeteghanie he kikundire cha lukundo lwakwe.

⁶ Ngazo ya mbonea yakwe naikazwe, eye etulonzoshe he uo Mkunde.

⁷ Heye uo, he sakame yakwe, tuna vukomboli vwetu, kushighiwa mabanu, kiringanyo cha vuzuri vwa mbonea yakwe.

⁸ Naye eituongejije kwa viugho vyose na kumanya;

⁹ ekikenja kutumanyisha mpiso ya mikundire yakwe, yeteghanie he kuoga kwakwe ekirekere heye uo.

¹⁰ Nikwo kuti igheri letara enerunganya vintu vyose vya uko wanga na kunu si he Kristo. Yee, heye uo;

¹¹ kangi heye na uswi tukaghoshwa vupali, twekisaghurwa too kuvoka sa vuntu ye erekere, eye eronga mburi jose he mikundire yakwe.

¹² Na uswi he uo tweveiwe kuoka nguma ya ngazo yakwe, uswi twerongemvikia Kristo ikuji letu.

¹³ Huvo na unywi he uo mwakenja kusikia kiteto cha idi, Mburi Yedi ya lukio lwenyu; kangi mwakenja kumwitikija ye, na kugerwa kisimbiko ni Mpeho ula wa kiravo ula ezerire.

¹⁴ Niye mwikome wa vupali vwetu, nesa aete vukomboli vwa kifumwa chakwe, kuoka nguma ya ngazo yakwe.

Maombi he kummanya Mrungu. Nzinya ya Mrungu yevonyeshwe ni kuvuka he vefwie kwakwe Kristo

¹⁵ Heicho mi nami, too nekinasikie mburi ya mwitikijo wenyu he Mfumwa Yesu, na lukundo lwenyu he vezerire vose,

¹⁶ sishigha kuanjela he mburi yenyu; nekimukumbuka he maombi angu,

¹⁷ Mrungu wa Mfumwa wetu Yesu Kristo, Vava wa ngazo, amuinke unywi mpeho wa kiugho na wa mfunukuro he kummanya ye;

¹⁸ meso a ngoro jenyu aangajwe, mumanye ikuji la mwitango wakwe he vezerire vuntu vweikee;

¹⁹ na vwedi vwa vubaha vwa nzinya yakwe he uswi tweitikije vuntu vweikee; he kiringanyo cha nzinya ja mirongire yakwe;

²⁰ erongie he Kristo ekimvusha he vefwie, akamvika he mkono wakwe wa kume uko wanga;

²¹ wanga mno kuvecha vufumwa vwose, na vubaha, na nzinya, na kifumwa, na kila izina lelangwa, neri si he isanga ili du, mira na he lila leneza;

²² akavika vintu vyose kijusi he maghu akwe, akamvika aoke mtwi wa vintu vyose vuntu vwa kanisa;

²³ elo mwiri wakwe, vukoloki vwakwe, eye ekolosha vyose he vyose.