VAEBRANIA 6 - Chasu New Testament 1967

¹ Heicho, twekishigha michejire ya kuvoka yemteta Kristo, tutonge kimozya he kiteto chekoloke; tusivike wa msingi wa kuchwiia mti mihiro yefwie, na wa kuketa mwitikijo he Mrungu,

² na wa michejire ya m’batizo, na kuvikia mikono, na kuvushwa he vefwie, na mlaho wa kae na kae.

³ Ivyo tuneviketa aho Mrungu ekitukundija.

⁴ Ambu vala vekenjije kuangajwa, na kusagha kiinkwa cha uko wanga, na kughoshwa vumwe he Mpeho Wedi,

⁵ na kusagha kiteto chedi cha Mrungu, na nzinya ja ilo igheri leneza,

⁶ vekigwa nyuma ya ivyo, tekive kuvaghosha vashaa iti vachwe mti; ambu vamvamba Mwana wa Mrungu he msalaba vo venye, na kumsonisha boo.

⁷ Ambu sa vuntu kantu kajinki isanga lenwa mvua yelinwesha, na kugera ntunda jeghenja vala evo cheshigha lekiimwa, liinkwa mvono kufuma ha Mrungu;

⁸ mira lekimeja mivwa na midangu, lidawa na kuzengelela kurarwa, ekwo he msio walo e kushotwa.

⁹ Mira, vakunde, nziaho tuteta ivyo, he mburi jenyu, tweitikije vila e vyedi kukela, na vyena lukio.

¹⁰ Ambu Mrungu tena ibaa iti aivae ndima jenyu, na lukundo lula mwelufunyirije he izina lakwe, ambu mwevahiririe vala vezerire, na iki muravahirira.

¹¹ Na uswi tuendisha iti kila mmwe wenyu avonyeshe kula kukudindija, kwa ikuji lekoloke mhaka he msio;

¹² nesa musioke vadai, mira muoke varateri va varepala viravo kwa mwitikijo na kugumirija.

Viariro vya Mrungu visoseja ikuji

¹³ Ambu aho Mrungu ekimunka Abrahamu kiravo, kila hesina m’baha kumvecha akakurigha kwa ye mwenye,

¹⁴ ekiti: “Cha kididi hemi, kukunka ninekunka lutelwedi, na kuongeja ninekuongeja.”

¹⁵ Huvo, kwa kugumirija akavona kila kiravo.

¹⁶ Ambu vantu vekurigha he ula e m’baha kuvakela; na hevo mginto wa nkani jose ja viteto, ni kiugho, kwa kuvikonesha.

¹⁷ Heicho kiteto Mrungu ekienda kuvavonyesha kukela mno vapali va kila kiravo, sa vuntu mburi yakwe yesiveiwa kukoranyika, akavika kirigho aho ghati;

¹⁸ nesa he vintu viri vyesiveiwa kukoranyika, evyo hevyo Mrungu esiveiwa kuteta mongo, tuvone ituja ledindie, uswi twedindikie vila viariro vyevikiwe mozya hetu;

¹⁹ evyo twevigurire sa nanga ya ngoro, yena mporere, yena nzinya, yeingia mhaka uko ndeni he pazia;

²⁰ eho hantu Yesu eingie vuntu vwetu, mrongori wetu, aoka mtasi m’baha wa kae na kae, wa fwanyanyi yakwe Melkizedeki.