VAEBRANIA 5 - Chasu New Testament 1967

¹ Ambu, mtasi m’baha esaghurwe kufuma he vantu, evikiwe vuntu vwa vantu he vila vyemtara Mrungu, nesa ainkije matasi na mitaso vuntu vwa mabanu;

² eveiwa kuvagumirijija kwa vuhoo vala vesimanyije na vareteshanya, kila naye erena vusoka;

³ heicho kimtara kukutasia ye mwenye vuntu vwa mabanu, sa vuntu eravatasia vantu vangi.

⁴ Tehena mntu eidima kukuinka ii shima ye mwenye, esire ula eitangwe ni Mrungu se Aroni.

⁵ Nirehuvo, Kristo tekukwejije ye mwenye kukughosha mtasi m’baha, mira ye emvwirire: “Niwe Mwanangu, Mi yoo nakumogha.”

⁶ Sa vuntu eteta hantu hangi: “We u mtasi kae na kae, Wa fwanyanyi yakwe Melkizedeki.”

⁷ Ye he iyo misi erena na mwiri wakwe ekuinkije he ula eidima kumkija he kifwa, kwa maombi na kusembereka na kuia mno kwa masoji, akasikiwa kila emfoleka Mrungu;

⁸ nziaho ni Mwana ekuchejije kusikia vuntu vwa ao mavwasi eavonie;

⁹ naye ekinakoloshwe akaoka kiusho cha lukio lwa kae na kae he vantu vose vemsikia;

¹⁰ kangi elangiwe ni Mrungu iti ni mtasi m’baha wa fwanyanyi yakwe Melkizedeki.

Kitara kuketa maendeleo he Vukristo

¹¹ Tuna vijinki vya kuteta he mburi jakwe; mira ni kizinya kuvierereja kila mwaoka vadai va kusikaia.

¹² Ambu chekimutara kuoka vacheji ni hala igheri ieza lavecha, mira muenda kuchejwa vila vya kuvoka he viteto vya Mrungu; muraenda masusu na iki, neri si kijo kikuji.

¹³ Ambu kila mntu enwa masusu tenamanya nezo kila kiteto cha singisirya kila ere mwana mdori.

¹⁴ Mira kijo kikuji ni cha vantu vazima, evo kucha kwavo kwemanyirijwe kutanya vyedi na vivivi.