VAEBRANIA 4 - Chasu New Testament 1967

Mhemijo he vantu va Mrungu

¹ Heicho kari kiravo cha kuingia he mhemijo wakwe kireho, natufoleke, hasireketa mmwe wenyu evoneka iti ausova.

² Ambu ni cha idi, hata uswi twerebirikirwa Mburi Yedi savo. Mira kila kiteto chesikiwe, chasavaghenja avo, ni hala chasasankana na mwitikijo he avo vekisikie.

³ Ambu uswi tweitikije tuingia he ula mhemijo sa vuntu etetie: “Sa vuntu nekurighie he oro yangu, Tevekaingie he mhemijo wangu;” nziaho jila ndima jekikenjike too kuvikwa msingi wa si ii.

⁴ Ambu hantu hasiku eteta msi wa kafungate huvu: “Mrungu ekihemie msi wa kafungate, akashigha ndima jakwe jose;”

⁵ aha wa naho: “Tevekaingie he mhemijo wangu.”

⁶ Heicho kila heimie icho kiteto iti hena vantu veneingia ho; na vala vebirikirwe iyo mburi uko kave vesovie kuingia vuntu vwa kubera kwavo,

⁷ igheri iezisha lekinaveche, akavika wa msi ungi, niwo uu wa yoo, ekimvwira Davidi sa vuntu ekitetie: “Yoo, kakicha mwekisikia izii lakwe, Musighoshe ngoro jenyu nkuji.”

⁸ Ambu nenga Yosua ekivainkie mhemijo, esekirauteta msi ungi uko nyuma.

⁹ Heicho heimie mhemijo he vantu va Mrungu.

¹⁰ Ambu ula eingie he mhemijo wakwe, ehemie ye mwenye he ndima jakwe, na sa vuntu Mrungu naye ehemie he ndima jakwe.

¹¹ Heicho natukudindije kuingia he ula mhemijo, nesa hasireketa mntu neri mmwe egwa sa avo varebera.

¹² Ambu kiteto cha Mrungu kina moo, kangi kina nzinya, kangi chekehe kuvecha kila mhandwi wechwa myondo yose, kangi kisoma mhaka kutanya moo na mpeho, marungo na mizumo yeho heo; kangi, ni kijangu kutwarija madunganyo na miendire ya ngoro.

¹³ Neri mozya heye tehena kirumbe chesimanyike boo, mira vintu vyose viho kituhu na kufunukurwa he meso akwe, ye heye tweteta kiteto chakwe.

Yesu ni mtasi m’baha kumvecha Aroni

¹⁴ Kila twena mtasi m’baha eingie uko wanga, Yesu, Mwana wa Mrungu, natugurishe nezo mwitikijo wetu.

¹⁵ Ambu tetuna mtasi m’baha eherwa kutufwa mbazi he kusova vwetu; mira ye egheshijwe sa uswi he vintu vyose, neri esiketie mabanu.

¹⁶ Heicho tuzengelele he kichumbi cha mbonea twena ndekero, nesa tufwiiwe mbazi na kuinkwa mbonea yetughenja igheri la zusovu.