VAEBRANIA 3 - Chasu New Testament 1967

Kristo ni m’baha kumvecha Mose

¹ Heicho, vandughu vezerire, kila mwe vamwe he mwitango wa uko wanga, mdunganyeni mno Ntume na Mtasi M’baha eye Yesu, twemzumira,

² eokie mkitengo he ula emvikie, sa vuntu Mose neye eokie, he nyumba yose ya Mrungu.

³ Ambu uo etarirwe kuti evaie ngazo mbaha kukela Mose, sa vuntu ula ehareha nyumba ena shima kukela iyo nyumba.

⁴ Ambu kila nyumba yeharehwe ni mntu, mira ula eharehe vintu vyose ni Mrungu.

⁵ Kididi, Mose eokie mkitengo he nyumba yose ya Mrungu sa mndima, aoke muonwa he vyose vyeneretetwa aho nyuma;

⁶ mira Kristo ni sa mwana, he nyumba ya Mrungu; eye uswi twe nyumba yakwe, kakicha twekigurana nezo na ndekero yetu na vwedi vwa ikuji letu mhaka mginto.

⁷ Heicho, sa vuntu Mpeho Wedi eti: “Yoo, kakicha mwekisikia izii lakwe,

⁸ Musighoshe ngoro jenyu nkuji, Sa igheri lila la kugera oro,

⁹ Misi ya kugheshwa uko nyika, Aho vavava venyu vekinighesha, vakanirereha; Na kuvona mihiro yangu miaka makumi mane.

¹⁰ Heicho nikavihiwa ulu lukolo, Nikati: ‘Misi yose ava ni vantu vena ngoro jehotoke; Tevemanyije nzia jangu.’

¹¹ Sa vuntu nekuhirighie he oro yangu, Tevekaingie he mhemijo wangu.”

Kitara kuoka mkitengo mhaka msirikijo

¹² Rehehani, vandughu vangu, henyu hasikete mmwe wenyu ena ngoro mbivi ya kusaitikija, he kukutanya na Mrungu mwenye moo.

¹³ Mira muchundane kila msi aho hecheri heitangwa, “yoo” nesa mmwe wenyu asighoshwe mkuji kwa kuishwa ni mabanu.

¹⁴ Ambu twaoka vamwe he Kristo, aho twekigurana na kivokio cha ndekero yetu kwa nzinya mhaka he mginto;

¹⁵ aho hecheri tetwa: “Yoo, kakicha mwekisikia izii lakwe, Musighishe ngoro jenyu nkuji, Sa igheri lila la kugera oro.”

¹⁶ Ambu ni vani vegerire oro vekinasikie? Si vala vose vefumie Misri vekitonjwa ni Mose?

¹⁷ Kana ni vani evavihiwe miaka makumi mane? Si vala veteshanye, evo miri yavo yegwie uko nyika?

¹⁸ Kangi ni vani ekurighie iti tevekaingie hena mhemijo wakwe, esire vala veberire?

¹⁹ Heicho tuvona iti teveidime kuingia vuntu vwa kusaitikija kwavo.