VAEBRANIA 2 - Chasu New Testament 1967

¹ Heicho kitutara kuvirereha kukela ivyo twevisikie tusirevisova.

² Ambu kakicha kila kiteto chetetiwe ni malaika chedindie, na kila iteshanyo na lubero levonie mhako wa singisirya,

³ uswi tuneveiwa ze kukia twekisashimia ulwo lukio lubaha huvo? elwo lwetetiwe ni Mfumwa aho kuvoka, na nyuma lukakoneshwa hetu ni vala vesikie;

⁴ Mrungu naye akateta vuonwa hamwe navo kwa maluvengo na virumo na nzinya ja mbare nyingi, na kwa mighavire ya Mpeho Wedi, sa vuntu ye mwenye ekundie.

⁵ Ambu ilo isanga ishaa tweliteta leneza, telivikiwe kijusi ya vamalaika,

⁶ mira mntu msiku etetie vuonwa hantu hasiku, ekiti: “Mntu ni kini iti umkumbuke, Kana mwana wa mntu iti umrerehe?

⁷ Kakenda kadori wemduishe kukela vamalaika, Wemdokie ngoki ya ngao ya shima, Wemgimbike kutetia ndima ja mikono yako;

⁸ Wevikie vintu vyose kijusi he maghu akwe.” Ambu he kuvika vintu vyose kijusi he maghu akwe, teimije kintu chesivikiwe kijusi yakwe. Mira iki tetunavona iti vintu vyose vyavikwa kijusi yakwe,

⁹ mira tumvona ula eduishwe kakenda kadori kukela vamalaika, eye Yesu, he vuntu vwa lusina lwa kifwa edokiwe ngoki ya ngazo na shima, nesa vuntu vwa mbonea ya Mrungu asaghe kifwa vuntu vwa vantu vose.

¹⁰ Ambu chekimvaie ye eye vuntu vwakwe na kwa nzinya jakwe vintu vyose vyeokie, ekiete vana vajinki vafikie ngazo, kumkolosha m’baha wa lukio lwavo kwa nzinya ya mavwasi.

¹¹ Ambu ula ezerija na avo vezerijwa vose vefuma he mmwe. Heicho tesonika kuvaitanga vandughu;

¹² ekiti: “Ninebirikira izina lako he vandughu, Ninekuimbia ngazo ghati he luvungano.”

¹³ Kangi: “Ninevika ikuji heye.” Na kangi: “Rereha, mi niwaha hamwe na vana neinkiwe ni Mrungu.”

¹⁴ Heicho, kila vana sakame na mwiri, naye nirehuvo, akaghuha mwiri weikee huvo, nesa kwa nzia ya kifwa amkome ula ekina nzinya ya kifwa, eye Shetani,

¹⁵ avakombole vose vala evo he igheri lavo lose he fole ya kifwa vekiikee sa vazoro.

¹⁶ Ambu ni cha kididi teghuhie kifumo cha vamalaika, mira eghuhie kifumo cha mlukolo wakwe Abrahamu.

¹⁷ Heicho chemvaie kufwanyanywa na vandughu vakwe he vintu vyose, nesa aveiwe kuoka mtasi m’baha mwenye mbonea, mkitengo he vintu vya Mrungu, nesa ahoije mabanu a vantu vakwe.

¹⁸ Na kila ye mwenye erishijwe vwasi aho ekighashwa, eidima kuvaghenja vala vegheshwa.