VAEBRANIA 13 - Chasu New Testament 1967

Machundwe a kukumanyirija

¹ Ikaeni he lukundo lwa kindughu.

² Musiivae kughuhia vagheni; ambu he nzia ii vangi vevaghuhiie vamalaika neri vesimanyije.

³ Vakumbukeni vala vechungiwe sa mwechungiwe hamwe navo; na vala veketiwa vivivi, ni hala na unywi mwereho he mwiri.

⁴ Unyumba uvikiwe shima ni vantu vose, na kiraro kizere; ambu vareshinda na varelambwia Mrungu enevalaha.

⁵ Musioke varekundisha fedha; mutishe he vila mwena navyo; ambu ye mwenye eti: “Tukasovekiwe ni kintu neri, neri sikakushighe.”

⁶ Heicho tukuoma kuteta iti: “Mfumwa niye enighenja, sikafoleke; Mntu eneniketaze?”

Kuvasikia varongori

⁷ Vakumbukeni vala vemurongorire, vemuvwirire kiteto cha Mrungu; rerehishani mno msio wa mitongire yavo, raterijani mwitikijo wavo.

⁸ Yesu Kristo niye ula, ighuo na yoo na kae na kae.

⁹ Musitahwe ni michejire ya kila mbare, na ya kigheni; ambu ni chedi ngoro jidindijwe kwa mbonea, neri si kwa vijo, evyo avo veviratere vesivonie lumazo.

¹⁰ Tuna meza ya mtaso, eyo vala vehirira lila ihema vesikundijwa kula vintu vyavo.

¹¹ Ambu nyama jila ejo sakame yajo yenaetwe hala hezerire ni mtasi m’baha vuntu vwa mabanu, vimba vyajo vishotwa nze ya kikalo.

¹² Heicho Yesu naye, nesa avaelije vantu na sakame yakwe mwenye, erishijwe vwasi nze ya mvera.

¹³ Heicho natufume tumratere noko nze ya kikalo, twetikie kiraro chakwe.

¹⁴ Ambu aha tetuna muzi weikaa, mira tuenda ula weneza.

¹⁵ Heicho, he nzia yakwe ye, natumunke Mrungu matasi a ngazo genda, eo ntunda ja myomo yezumira izina lakwe.

¹⁶ Mira musiivae kuronga vyedi na kuorana; ambu matasi sa ao nio emwizihira Mrungu.

¹⁷ Vasikieni varongori venyu, na kukuduisha hevo; ambu veyaa kiavi vuntu vwa ngoro jenyu, ambu nivo venevwijwa itaro, nesa vakete huvo kwa luzihiro, si kwa mdiho; ambu chesekimuvaia.

Vumondo vwa kuaghanya

¹⁸ Tuombieni; ambu tuitikija iti tuna izii ledi he ngoro, twekienda kuketa mitongire yedi he vintu vyose.

¹⁹ Nami nimusembisha mno kuketa huvo nesa nihunduwe henyu fia.

²⁰ Na Mrungu wa mporere emwetie Mrisha M’baha wa magonji kufuma he vefwie kwa sakame ya kiaghano cha kae na kae, eye Mfumwa wetu Yesu,

²¹ amukoloshe he kila ndima yedi, nesa muhire kikundire chakwe; naye aharehe he uswi cheizihe henaye, he Yesu Kristo; ngazo ni yakwe kae na kae. Amen.

²² Mira vandughu, nimusemba, mutikane na kiteto iki cha marunge; ambu nemuandikie kwa viteto vifuhi.

²³ Manyani kuti mndughu wetu Timoteo akenja kuchuguiwa; ekineza fia ninevonana na unywi hamwe naye.

²⁴ Vakezieni vose vemurongorira, na vezerire vose; na vala e va Italia vemukezya.

²⁵ Mbonea na iikae na unywi vose.