VAEBRANIA 12 - Chasu New Testament 1967

Yesu ni mrevokija na mrekolosha wa mwitikijo

¹ Nirehuvo na uswi, kila twejungulukwe ni ijumbi ibaha la vaonwa mbare ii, natuvike na mondo kila mjigho weemee, na lila ibanu letulusa fiafia; na he ala makero evikiwe mozya hetu natudindike kwa kugumirija,

² twekimrereha Yesu eye mrevokija na mrekolosha mwitikijo wetu; eye he vuntu vwa kuizihirwa kwevikiwe mozya heye egumirije msalaba na kusasikia soni, akaikaa he mkono wa kume wa kichumbi cha kifumwa cha Mrungu.

Cheshigha hakete vurongori

³ Mkumbukeni nezo ula egumirije nkindwa mbaha sa iji ja vareketa mabanu he miri yavo, nesa musirefikwa, na kuchuchuntika.

⁴ Temunaomana na mabanu kiringanyo cha kuita sakame;

⁵ kangi mwaivaa ala marunge eteta na unywi sa kuteta na vana: “Mwanangu usibere machundwe a Mfumwa, Neri usivihiwe wekibohijwa niye;

⁶ Ambu ula Mfumwa emkundie emchunda, Naye em’bigha kila mwana emghuhia.”

⁷ He machundwe gumirijeni; Mrungu emuketia sa vana; ambu ni mwana ani esichundwa ni vavee?

⁸ Heicho kakicha temuchundwa, kuchundwa kwevatara vose, huvo mwaoka vana vighiria, neri temuvana va kaa.

⁹ Hamwezu na ivyo twekina na vavava vetu va kimwiri vekituchunda, na uswi tukavashimia, iki si chedi kukela kukuvikia kijusi ya Vava wa ngoro jetu tukakia?

¹⁰ Ambu ni cha idi, avo he misi mifuhi vekitushunda vuntu vevonie iti ni chedi hevo; mira ye he vuntu vwa lumazo lwetu, nesa tuoke vamwe he vwedi vwakwe.

¹¹ Kila ibigho he igheri lalo, tekivoneka iti ni kintu cha kuizihirwa, esire cha kushinirwa; mira uko nyuma linevaetie vala vemanyirijwe nilo ntunda ja kitea chena mporere.

¹² Heicho, rongani mikono yyeleghele na makunkuro choloje,

¹³ harehani maghu enyu nzia jerongeke, nesa kila cheholoje kisiteshwe, mira ni keba kikijwe.

Machundwe

¹⁴ Endishani kuketa mporere na vantu vose, na kuzera, ekwo hesina mntu enemvona Mrungu esina nakwo.

¹⁵ Mwekirerehisha mno mntu asiduikiwe ni mbonea ya Mrungu, kikolo cha vivivi kisireshosha na kumrisha vwasi, na vantu vajinki vakagerwa he vivivi vuntu vwacho.

¹⁶ Hasirevoneka mreshinda neri esimgurishe Mrungu, sa vuntu Esau, etaghie vupali vwakwe vwa mwana wa kikau kwa kijo kimwe.

¹⁷ Ambu mwemanyije iti hata uko nyuma ekienda kupala lutelwedi, akaimwa -ni hala esivonie igheri la kuchwa mti,- nziaho eluendishe na masoji.

Mtekano wa vintu vya kiisanga na vya kiuko wanga

¹⁸ Ambu temufikiie ntuvi yeve kukuntwa, yekiaka moto, neri ijumbi ijiru, na kija na kiryanzoni,

¹⁹ na izii la lugunda, na izii la viteto; elo vala velisikie vakasemba iti neri vasivwirwe kiteto kingi;

²⁰ ambu teveidime kugumirija kila kiteto cheamorwe, hata nyama yekikunta iyo ntuvi inebighwa na mabwe.

²¹ Na ivyo vyevoneke sa vuntu vyekifolesha, hata Mose akati: “Nagurwa ni fole na kuzingiza.”

²² Mira unywi mwafikia ntuvi ya Sayuni na muzi wa Mrungu mwenye moo, Yerusalemu ya uko wanga, na marivati a vamalaika viku vijinki,

²³ luvungano lubaha na kanisa la vana va kikau veandikwe uko wanga, na Mrungu mrechwia vantu vose, na mpeho ja vantu venye kitea vakoloke,

²⁴ ne Yesu ntume wa kiaghano kishaa, na sakame ya kuvwanzighiwa, yeteta vyedi kukela yakwe Abeli.

²⁵ Rerehani musimsue ula eye eteta. Ambu kari tevekiie vala vemsuie ula evarungie he vuntu vwa isanga, na uswi tetukakie twekikutanya na ula eturunga kufuma uko wanga;

²⁶ eye igheri lila izii lakwe lekushije isanga; mira iki arava ekiti: “Kantu kamwe wa ninekusha, si isanga du, mira hata uko wanga.”

²⁷ Mira kiteto kila: “Kantu kamwe wa,” kivonyesha kusamijwa he vila vyeve kutetemijwa sa vintu vyeterumbwa, nesa vila vyesive kutemijwa viikae.

²⁸ Heicho kila tweghuhia vufumwa vwesitetemijwa, natukete mbonea, eyo heyo tuinkija he Mrungu mtaso wa kumwizihija hamwe na kukuduisha na kufoleka;

²⁹ ambu Mrungu wetu ni moto wela.