VAEBRANIA 11 - Chasu New Testament 1967Uguguti wa mwitikijo 1 Mwaitikijo ni kukonesha he vila vyevikiiwe ikuji, ni kusatatanya he vila vyesivonwa. 2 Hena icho vazima vetu vetetiiwe vuonwa. 3 He vuntu vwa mwitikijo twemanyije iti masanga erumbiwe kwa kiteto cha Mrungu, hata vintu vyevonwa teviharehwe kwa vintu vyevoneka boo. 4 Kwa mwitikijo Abeli emtasie Mrungu mtaso wedi kukela wakwe Kaini; heicho etetiiwe vuonwa iti ena kitea; Mrungu akaghuhia mtaso wakwe, heicho, nziaho efwie, echeri eteta. 5 Kwa mwitikijo Enoki akasamije; aho esinasamijwa ekitetiwe vuonwa iti emwizihije Mrungu. 6 Mira hesina mwitikijo tekive kumwizihija; ambu mntu emratera Mrungu kimtara aitikije iti ewaho, na kuti vala vemratera evainka mhako. 7 Kwa mwitikijo Noa ekinarungwe ni Mrungu he vila vyesinavoneka, sa vuntu emwitikije Mrungu, akahareha safina, aidime kukija kaa yakwe. Huvo akalaha masanga he mabanu, akaoka mpali wa kitea chefuma he mwitikijo. 8 Kwa mwitikijo Abrahamu ekinaitangwe akaitika, iti afume atonge hantu hala enehaghuha kuoka vupali; akafuma esimanyije hantu etonga. 9 Kwa mwitikijo akaikaa he vugheni he isanga la kiravo, sa e isanga esi lakwe, akaikaa he ihema ne Isaki ne Yakobo, vapali hamwe naye va kila kiravo. 10 Ambu ekiinda muzi wejengiwe misingi ewo mreuuka na kuujenga e Mrungu. 11 Kwa mwitikijo hata Sara mwenye einkiwe nzinya ya kujitoha, naye igheri lakwe levechije; ni kila emtarire ula emwarire iti ni mkitengo. 12 Heicho, vantu vajinki veringane sa ntondo ja uko wanga, na sa mzangalale weho he kijevu cha bahari, vesive tara, vakamoghwa ni mntu mmwe, naye eikee sa efwie. 13 Ava vose vakafwia he mwitikijo, vesinaghuha vila viravo, mira vakavivona noko hae, vakaving’arira, na kuzumira iti neki vagheni na vacharo he si ii. 14 Ambu avo veteta viteto sa ivyo vevonyesha boo iti veenda isanga lavo venye. 15 Na ukiche vekikumbuke isanga lila vefumie, vekivona igheri la kuhunduka. 16 Mira iki vesikie nkwina ya isanga ledisha, elo la uko wanga. Heicho Mrungu tesikia soni kuitangwa Mrungu wavo; ambu evaharehie muzi. 17 Kwa mwitikijo Abrahamu ekinagheshwe, akamwinkija Isaka aoke mtaso; na uo eghuhie ivyo viravo, emwinkije mwana wakwe eremmwe; 18 yee, ambu ula etiwe Isaki niye eneitangwa mbereko yako, 19 ekitara kuti Mrungu eidima kumvusha hata he vefwie; kufuma uko akamvona kangi kwa fwanyanyi. 20 Kwa mwitikijo Isaki akavainka Yakobo ne Esau lutelwedi, hata he mburi jeneoka nyuma. 21 Kwa mwitikijo Yakobo efekie kufwa, akavinka vana Yosefu kila mmwe lutelwedi, akatasa ekuchwighike na nzata yakwe. 22 Kwa mwitikijo Yosefu ekinafikie msio wakwe elangie mburi ya kufuma kwa vana Israeli; akaazera cha mavindi akwe. 23 Kwa mwitikijo, Mose ekinamoghwe, akaviswa ni vamoghi vakwe mieji mitatu, ambu vevonie iti ni mwana wedi; neri tevefoleke iamoro la mfumwa. 24 Kwa mwitikijo Mose ekinaoke mntu mzima, akasua kuitangwa mwana wa mwana Farao wa kiche; 25 akavona iti ni keba arishwe vwasi hamwe na vantu va Mrungu, kukela kuizijijwa hena mabanu kakenda; 26 ekitara iti kuberwa kwakwe Kristo ni vuzuri vubaha kuvecha ndungu ja Misri, ni hala ekiinda kuinkwa uo mhako. 27 Kwa mwitikijo akafuma Misri asifoleke oro ya mfumwa, ambu egumirije sa emvona ula esivoneka. 28 Kwa mwitikijo akavika Pasaka, na kuvwanzighia sakame nesa ula mrakonda vana va vwai asivakunte vo. 29 Kwa mwitikijo vakavecha ghati he bahari nkundu, sa vevecha he isanga ijomu; Vamisri vekiraghesha kuketa huvo vakamijwa ni mpombe. 30 Kwa mwitikijo malukuta a Yeriko akagomoka, ekinakenje kujungulekwa misi mfungate. 31 Kwa mwitikijo Rahabu, ula mreshinda, tekondiwe hamwe na vala varebera; ambu evaghuhiie vala vazighani kwa mporere. 32 Nami nitete ni wa? Ambu igheri lesekinikoloka iti nitete mburi jakwe Gideoni ne Baraka ne Samsoni ne Yefta ne Davidi ne Samweli na ja varoti; 33 evo kwa mwitikijo vevotie vifumwa, vakaketa singisirya, vakainkwa kiravo vakajiva myomo ya simba, 34 vakavota nzinya ya moto, vakakia he makai a mhandwi. Vekioka vasoka vakagerwa nzinya, ne vakai hena nkondo, vakaahija vankondo vajinki va mbari ngeni. 35 Vache vakaghuhia wa vefwie vavo vevushijwe he vefwie. Mira vangi vakarishwa vwasi uvivi na kukomwa, vasikunde vukomboli, nesa vavone kuvuka kwedi he vefwie; 36 vangi vegheshijwe kwa kusolwa na kubighwa, hata vichungo, na kugerwa he nyumba ya varechungwa; 37 vakabighwa na mabwe, vakachwiwa na misemeno, vakagheshwa, vakakomwa na mhandwi; vakajunguluka-junguluka vedokie mikota ya magonji, na ya mbuji; neki vasovu, vekirishwa vwasi na kuketiwa vivivi; 38 vantu evo isanga lesekivaenda; vekijunguluka-junguluka uko he nyika na he ntuvi na he mpanga na he makongo eho he msau. 39 Avo vantu vose vekinakenje kutetiwa vuonwa he vuntu vwa mwitikijo wavo, teveghuhie kiravo; 40 ambu Mrungu ekenjije kutuvikia uswi kintu e chedi, nesa vo vasikoloshijwe vesina na uswi. |
Chasu New Testament © Bible Society of Tanzania, 1967.
Bible Society of Tanzania