VAEBRANIA 10 - Chasu New Testament 1967

Itasi lakwe Kristo livecha matasi a Kimose

¹ Heicho, myomongwa kila e kivuri cha vila vyedi vyeneza, neri esi fwanyanyi yo njenye ya mburi ijo, kwa matasi ala ala veainkija genda, teiidima igheri lose kuvakoloshija vala vezengelela heo.

² Kari ni huvo, mitaso teyekihakana kuinkijwa? Varetasa vekikenja kuelijwa kantu kamwe, tevekikuvonawa iti vena mabanu.

³ Mira he ao matasi hena nkumbu ya mabanu avo kila mwaka.

⁴ Ambu sakame ya njekwana na ya nzenge teiidima kuvusha mabanu.

⁵ Heicho ekiza he si ii, eti: “Mtaso wa vintu vyeinkijwa tuviendie, Mira mwiri weuniringanyije;

⁶ Matasi a kushotwa na a mabanu teekuizihire;

⁷ Niho nekiti: ‘Rereha naza -hena kitabu neandikwe- Nikoloshe kikundire chako we Mrungu.’”

⁸ Aho kawanga, ekiti: “Mitaso na vyeinkijwa na vyeshotwa, na iyo ya mabanu tuikundie, neri teikuizihira” -vyeinkijwa sa vuntu myomo ngwa yeazere-,

⁹ niho akati: “Rereha, naza nikoloshe kikundire chako.” Evusha kila cha kuvoka, nesa aimukije cha keri.

¹⁰ Hena kikundire icho, twazerijwa he kuinkijwa mwiri wakwe Yesu Kristo kantu kamwe.

¹¹ Na kila mtasi eimuka kila msi ekitasa na kuinkija matasi ala ala kantu kajinki; nao teeidima neri kuvusha mabanu.

¹² Mira uu ekinainkije he vuntu vwa mabanu itasi imwe leikaa kae na kae, eikae he mkono wa kume wa Mrungu;

¹³ kuvokia aho akaikaa ekiinda mhaka vanzo vakwe vavikwe kijusi he mavato akwe.

¹⁴ Kwa mtaso mmwe akakoloshija avo veelijwa kae na kae.

¹⁵ Na Mpeho Wedi naye etutetia vuonwa; ambu, ekinakenje kuti:

¹⁶ “Iki ni kiaghano neneaghana navo nyuma ya misi ila, nivwo vuntu Mfumwa eti, Ninegera viziomo vyangu he ngoro javo, Nineviandika he madunganyo avo;

¹⁷ Mabanu avo na lubero lwavo sikaakumbuke kangi narini.”

¹⁸ Ambu hekinakete kushighiwa kwa ivyo, tehena kangi cheinkijwa vuntu vwa mabanu.

Kudindija na machundwe

¹⁹ Heicho vandughu, kila twena ndekero kuingia hala hezerire kwa sakame yakwe Yesu,

²⁰ nzia ila shaa etuvokiie, eyo moo, yevechija he pazia, ewo mwiri wakwe;

²¹ na kuketa mtasi m’baha hena nyumba ya Mrungu;

²² natuzengelele twena ngoro ya idi he mwitikijo wekoloke, twenyinyiriwe he ngoro jetu iti tushighe madunganyo mavivi; tweojijwe miri kwa mpombe yezerire.

²³ Natugurishe mwitikijo na kiariro chetu, kisigharuke; ambu ula eturaviie ni mkitengo;

²⁴ naturerehane uswi venye na venye na kukakashana he lukundo na ndima jedi;

²⁵ neri tusishighe kuvungana hamwezu, sa vuntu vangi vemanyere; mira tuchundane na kuzika kuketa huvo, sa vuntu mwevona iti ula msi wazengelela.

²⁶ Ambu, twekiketa mabanu kwa tiri aho twanaghuhia kumanya kwa idi, teheimie wa mtaso vuntu vwa mabanu;

²⁷ esire kuinda mlaho he kiitusho na moto mkai weringanywe kuvashota vankani.

²⁸ Mntu ebereshe viziomo vyakwe Mose, efwa chesina mbonea, he vuonwa vwa vantu veri kana vatatu.

²⁹ Muti ze? Tekimvaie mlaho m’baha kukela, mntu ula emvatira Mwana wa Mrungu, na kutara sakame ya kiaghano eelijwe niyo iti ni kintu cha sutwa, na kumketia Mpeho wa mbonea tiri?

³⁰ Ambu twemmanyije ye etie: “Sire ni yangu, nimi nenechwa.” Na kangi: “Mfumwa enevalaha vantu vakwe.”

³¹ Ni mburi yefolesha, kugwa he mikono ya Mrungu mwenye moo.

Machundwe a kuzika kudindija

³² Mira kumbukani ila misi ya kuvoka, eyo mukinakenje kuangajwa, mwegumirije mavoo mabaha a mavwasi;

³³ kakenda mukafaalajwa na kushaghwa na kurishwa vwasi, na kakenda mukaghenjanya na vala veketiwe ivyo.

³⁴ Ambu mwevasikie mbonea vala veho he kichungo, kangi mukakunda kwa kuizihirwa kughumbwa mari jenyu, mwekimanya he ngoro jenyu iti hena mari eyo yedi kukela, yesisia.

³⁵ Heicho musitaghe ikuji lenyu, ambu lina mhako m’baha.

³⁶ Ambu kimutara kugumirija, nesa mwekikenja kukolosha mikundire ya Mrungu muvone kila kiravo.

³⁷ “Ambu heimie kakenda kadorisha, Ula eza eneza, neri tekaikaishe.

³⁸ Mira mwenye singisirya wangu enekalama he mwitikijo; Na ula eganganya ngoro yangu teimwizihirwa.”

³⁹ Mira uswi tetuho mondo wa vala veganganya na kuteka, mira tuho mondo wa avo vena mwitikijo wa kutukija ngoro.