VAEBRANIA 1 - Chasu New Testament 1967

Kivokio

¹ Mrungu, kae etetie na vazima vetu he varoti, kwa mbare nyingi na kwa nzia nyingi;

² chakenjija he misi ii, etetie na uswi kwa Mwanawe, eye emvikie kuoka mpali wa vyose, kangi heye erumbie si ii.

³ Ye kila e sumpa ya ngazo yakwe, na fwanyanyi yakwe, evigurire vyose kwa iazero la nzinya yakwe, ekinaharere kizerijo chezerija he mabanu, eikae he mkono wa kume wa vubaha uko wanga;

⁴ akaoka wedisha kukela vamalaika, kila epalile izina la ngazo kukela lavo.

Mwana wa Mrungu ni m’baha kuvecha vamalaika

⁵ Ambu narini ni malaika uhi anamvwira: “Niwe Mwanangu, Nimi nakumogha yoo?” Kangi: “Mi heye nineoka vava, Naye hemi eneoka mwana?”

⁶ Kangi, aho ekimwete mwanawe wa kikau he si ii, eti: “Vamalaika vose va Mrungu navamdunkutie.”

⁷ Na he vamalaika eti: “Evaghosha vamalaika vakwe kuoka mpeho, Na vandima vakwe kuoka maluverevere a moto.”

⁸ Mira he Mwanawe eti: “We Mrungu, kichumbi chako cha kifumwa ni cha kae na kae; Na nzata yako ya kifumwa ni ya singisirya.

⁹ Wekundie kitea ukavihiwa lubero; Heicho Mrungu, Mrungu wako, akugera mafuta, Mafuta a mng’aro kukela vaghenji vako.”

¹⁰ Na kangi: “We, Mfumwa, aho kuvoka weharehe misingi ya ili isanga, Na uko wanga ni ndima ya mikono yako;

¹¹ Ivyo vyose vinekondika, mira we uikaa, Na ivyo vyose vinesakaa sa suke,

¹² Unevilusa sa suke, navyo vinekoranyika; Mira we nirewe ula, Na miaka yako teikarehakana.”

¹³ Hamao, narini hena malaika anavwirwa: “Ikaa mkono wangu wa kume, Mhaka nenevika vanzo vako vaoke kagonti kavikia maghu ako?”

¹⁴ Hamao, avo vose si mpeho vetumika, vekitumwa kuhirira vala venerepala lukio?