TITO 3 - Chasu New Testament 1967

Miikarire ya Kikristo na kifumo chayo

¹ Uvakumbushe vantu vakuduishe he venye nzinya na vufumwa, na kuvasikia, na kukuringanyanya he kila ndima yedi;

² vasimrare mntu wo wose, vasioke vakwakwa, vaoke vedi, vekivonyesha vuhoo vwose he vantu vose.

³ Ambu na uswi aho kae twesena kucha, twe varekonda, twekiishijwe kangi twekihirira tama na vintu vijinki vya kukuizihija, twekiikaa hena vuvivi na tiri, twekivihija na kuvihijana.

⁴ Mira vwedi vwa Mkija wetu Mrungu na kukundo lwakwe he vantu, vwekinafunukurwe etukijije;

⁵ neri esi he vuntu vwa mihiro ya kitea twehirire uswi, esire ni kwa mbonea yakwe, he kuonjwa kwa kumoghwa ka keri na kughoshwa vashaa ni Mpeho Wedi;

⁶ emtukufutie mungisha, he vuntu vwakwe Yesu Kristo Mkija wetu;

⁷ nesa uswi twekitarirwa kitea kwa mbonea yakwe tughoshwe vapali va nkalamo ya kae na kae, sa vuntu twevikie ikuji letu.

⁸ Ni kiteto cha idi; na icho nienda ukitete kwa nzinya, hesa vala vemwitikija Mrungu vakumbuke kuikaa he mihiro yedi. Ivyo ni vyedi, kangi vina lumazo he vantu.

⁹ Mira mavwijo a vurundu utane nao, na mburi ja malukolo, na vukwakwa, na nkwani ja viziomo, ambu tevina lumazo, kangi ni vya sutwa.

¹⁰ Mntu mnkani, ukanamchunda kamwe kana keri, mshighe;

¹¹ wekimanya iti mntu sa uo akondika, ebana, ambu ekulaha nzune jakwe mwenye.

Vumondo vwa kuaghanya

¹² Igheri nenemtuma Artema, kana Tikiko hako, ukudindije kuza hangu kunu Nikopoli; ambu nedunganye kuikaa kunu igheri la kiho.

¹³ Zena, ula mremanya mburi ja vitabu, ne Apolo, ukudindije kuvazosha, vasisovekiwe ni kintu.

¹⁴ Vantu vetu navo vakucheje kuikaa he mihoro yedi, he vila vyetara vasioke vantu vesina ntunda.

¹⁵ Vantu vose nena navo vekukezya. Utukezijije vala vetukundie he mwitikijo. Mbonea na iikae na unywi vose.