TITO 2 - Chasu New Testament 1967

Miiharire ya Kikristo na kifumo chayo

¹ Mira we cheja michejire yena nkalamo.

² Vaghosi vaoke venye kiringanyo, vena shima, vechee, vegurishe mwitikijo, vena lukundo, vegumirija.

³ Nirehuvo na valala varongori vakete mitongire ya kuzera; vasioke varechingija, vasioke varenwa mvinyo mungi, mira vaoke varecheja vyedi;

⁴ nesa vavacheje vache vamarika kukunda vome vavo na vana vavo;

⁵ vaoke venye kiringanyo, veelile, na kuronga ndima ja kaa havo, e vedi vesikia vome vavo venye; nesa kiteto cha Mrungu kisirarwe.

⁶ Nirehuvo na vabwange, uvachunde kuketa kiringanyo.

⁷ He vintu vyose ukuvonyeshe kuoka fwanyanyi he mihiro yedi na he michejire yako, wekivonyesha vukoloshi na shima,

⁸ na viteto vyena moo, vyesishaghwa, nesa ula mnkani asonishwe, kila hari esina kiteto kivivi cha kutuchunga.

⁹ Vazoro vasikie vazuri vavo, na kuvaizihija he vintu vyose, vasigharushane navo,

¹⁰ vasioke vareivaiva; mira vavonyeshe ukitengo wose, nesa vahambe michejire ya Mrungu Mkija wetu he vintu vyose.

Miendire ya Kikristo

¹¹ Ambu mbonea ya Mrungu yekija vantu vose yafunukurwa;

¹² nayo itucheja kusua vivivi na kiherehere cha kimasanga; tuidime kuikaa kwa kiringanyo, na kitea na kuzera he si ii ya iki;

¹³ twekiinda ikuji lena lutelwedi, na kufunukurwa kwa ngazo yakwe Kristo Yesu, Mrungu m’baha na Mkija wetu;

¹⁴ eye ekuinkije ye mwenye vuntu vwetu, nesa atukombole he kukondika kwose; na kukuojija vantu vaoke va he kifumwa chakwe mwenye, vala vekudindija he mihiro yedi.

¹⁵ Teta viteto ivyo, runga na kuchunda na nzinya jose; hasikete mntu neri mmwe ekuberesha.