MFUNUKURO 5 - Chasu New Testament 1967

Kuvona kimpeho Mwana Ng’onji wa Mrungu

¹ Nikavonaa he mkono wa kume wa ula eikae wanga he kila kichumbi cha kifumwa, kitabu cheandikwe ndeni na nze, chevikiwe visimbiko mfungate.

² Nikavona malaika mwenye nzinya, ekibirikira na izii ibaha: “Ni ani eveiwa kutambarua kitabu, na kuchungua visimbiko vyacho?”

³ Tehevoneke mntu uko wanga, neri he si ii, neri kijusi ya isanga, eidime kuchungua icho kitabu neri kukirereha.

⁴ Nami nikaia mano, ni hala hesivoneke mntu chemfwenye kutambarua icho kitabu neri kukirereha.

⁵ Na mmwe wa vala vaghosi akaniti, “Usiie; rereha, Simba e wa mbari yakwe Yuda, kikolo chakwe Davidi, ye avota aidime kutambarua kila kitabu na vila visimbiko vyacho mfungate.”

⁶ Nikavona ghati he kila kichumbi cha kifumwa na jila nyama ne, na ghati ya vala vaghosi, Mwana Ng’onji eimuke, eikee sa ekomiwe, ena mpembe mfungate na meso mfungate, ejo Mpeho mfungate ja Mrungu jetumiwe he si ii yose.

⁷ Akaza akaghuha kila kitabu he mkono wa kume wa ula eikae si he kila kichumbi cha kifumwa.

⁸ Ekiraghuha kila kitabu, jila nyama ne na vala vaghosi makumi meri na vane vakagwa si mozya he Mwana Ng’onji, vose vekina mapango, vidende vya dhahabu vyeizue mafukijo, eo maombi a vezerire.

⁹ Navo vekiimba lwazi lushaa vekiti, “Chekufwenye we kughuha icho kitabu na kuchungua visimbiko vyacho; ambu wekikomiwe uka mzorira Mrungu vantu kwa sakame yako, va mbari jose na vitetire na malukolo na vaisanga,”

¹⁰ ukavaghosha kuoka vufumwa na vatasi he Mrungu wetu; navo venetetia ili isanga.

¹¹ Nikavona, niasikia maizii a vamalaika vajinki miondo yose yya kila kichumbi cha kifumwa, na ya jila nyama, na ya vala vaghosi, naa itaro lavo neki viku ikumi ka viku ikumi na kiku ka kiku,

¹² vekiketa na izii ibaha: “Chemfwenye Mwana Ng’onji ekomiwe, kughuha kifumwa na vuzuri na kiugho na nzinya na shima na ngazo na ntogolo.”

¹³ Na kila kirumbe cheho uko wanga na he isanga na kijusi ya isanga na wanga he bahari, na vyose vyeho ndeni heyo, nikavisikia vyekiti, “Ntogolo na shima na ngazo na vubaha ni vya ula eikae si he kichumbi cha kifumwa, na Mwana Ng’onji, kae na kae.”

¹⁴ Na jila nyama ne jikati, “Amen.” Na vala vaghosi vakagwa si vakamdunkutia.