MFUNUKURO 3 - Chasu New Testament 1967

Barua he kanisa la Sardi

¹ He malaika wa kanisa yeho uko Sardi andika: Ivi vitetwa ni ula ena jila Mpeho mfungate ja Mrungu, na jila ntondo mfungate. Nemanyije mihiro yako, iti una izina leti uho moo, uko wefwie.

² Yaa kiavi, dindija vila vyeshele vyeenda kufwa; ambu sivonie ndima jako iti jekoloke mozya he Mrungu wangu.

³ Heicho kumbuka vuntu weghuhie, na sa vuntu wekisikie; gurisha ivyo na kuchwa mti. Mira wekisayaa kiavi, nineza sa mkea, neri tukamanye saa nenezia hako.

⁴ Mira una mazina masiku uko Sardi, vantu vesigerire suke javo maikwe. Navo venetonjanya nami vedokie suke nyewa, ambu kivatara.

⁵ Ula evota enedokwa suke nyewa, neri sikavushe izina lakwe he kitabu cha nkalamo, nami izina lakwe ninelitetia vuonwa mozya he Vava wangu, na mozya he vamalaika vakwe.

⁶ Ula ena isikio, nasikie kiteto iki echo Mpeho evwira makanisa.

Barua he kanisa la Filadelfia

⁷ “He malaika wa kanisa leho uko Filadelfia andika: Ivi vitetwa ni ula ezerire, e wa idi, ehete funguo yakwe Davidi, niye ejuvua hesina eveiwa kufinga, naye ekifinga neri tehena eveiwa kujuvua.

⁸ Nemanyije mirongire yako. Rereha, nekunkie luvwi lwejuvuke mozya hewe, elwo hesina eveiwa kulufinga, ambu una kanzinya kadori, nawe werindie kiteto changu, neri tukanie izina langu.

⁹ Rereha, ninekunka vala va sinagogi yakwe Shetani, veti ni Vayuda, uko sivwo, mira veteta mongo. Rereha ninevakunka, vaze kukodeka he maghu ako, vamanyye iti nekukundie.

¹⁰ Kila wegurishe kiteto cha migumirijije yangu, nami ninekurinda usireingie he saa ya kugheshwa yeringanywe kuzia si ii, kuvaghesha vose veikaa he si ii.

¹¹ Niza fia. Gurisha kila wena nacho, hasikete mntu ekughumba ngoki yako.

¹² Ula evota, ninemghosha ngwijo he nyumba ya mtaso ya Mrungu wangu, neri tekazefuma aho narini, nami nineandika izina la Mrungu wangu na izina la muzi wa Mrungu wangu, ewo Yerusalemu mshaa, wesea kufuma uko wanga ha Mrungu wangu, na izina langu mwenye, lila ishaa.

¹³ Ula ena isikio, nasikie kiteto iki echo Mpeho evwira makanisa.

Barua he kanisa la Laodikia

¹⁴ “He malaika wa kanisa leho uko Laodikia andika: Ivi vitetwa ni ula eye Amen, Mwonwa e mkitengo na wa idi, eye wa kuvoka wa virumbe vyose vya Mrungu.

¹⁵ Nimanyije mihiro yako, iti tuhoie neri tusha; nanga keba wekihoa kana kusha.

¹⁶ Heicho kila wena ndughuri du, wesihoie neri kusha, ninekutahika ufume he momo wangu.

¹⁷ Kila weti, ‘Mi ni mzuri, sina cho nesovie, neri sina cho neenda;’ kave tumanyije iti u msoka, na wa kuvoneiwa, kangi u mkiva na ituntu, kangi uho kituhu.

¹⁸ Nikurunga: Zora hangu dhahabu yezerijwe he moto, nesa uoke mzuri; na suke nyewa nesa udoke, soni ya tuhu yako isivoneke; na mzighi wa meso wa kuvira meso ako, uidime kuvona.

¹⁹ Vala vose nevakundie nivabohia, na kuvatakua; heicho kudindije uchwe mti.

²⁰ Rereha, neimuke mpengeni, nikokonta; mntu ekisikia izii langu, na kujuvua luvwi, nineingia hakwe, nami ninela hamwe naye, naye hamwe nami.

²¹ Ula evota, ninemunka kuikaa hamwe nami he kichumbi changu cha kifumwa, sa vuntu nami nevotie nikaikaa hamwe ne Vava wangu he kichumbi chakwe cha kifumwa.

²² Ula ena isikio, nasikie kiteto iki echo Mpeho evwira makanisa.